Ադրբեջանի գլխավոր դատախազությունը միջազգային հետախուզում է հայտարարել Ռուսաստանի երեք քաղաքացիների՝ «Մոսկվա 24» հեռուստաալիքի հաղորդավար Իվան Կնյազևի, քաղաքական հարցերով խորհրդատու, մեդիափորձագետ Սեմյոն Ուրալովի և լրագրող, ՌԴ տրանսպորտի նախարարի խորհրդական Ալեքսեյ Չադաևի նկատմամբ:
Նրանց դեմ քրեական գործեր են հարուցվել «ահաբեկչության, պետական կարգը բռնի փոփոխելու և Ադրբեջանի տարածքային ամբողջականությունը խախտելու հրապարակային կոչերի», ինչպես նաև «ազգային ատելություն և թշնամանք հրահրելու» մեղադրանքներով:
Ինչպես ԱՊԱ գործակալությանը հայտնել են երկրի գլխավոր դատախազության մամուլի ծառայությունից, քրեական հետապնդման հիմքերը հայտնաբերվել են նախաքննության ընթացքում: Քննության վարկածով՝ 2026 թվականի հուլիսի 14-ին Կնյազևը, Ուրալովը և Չադաևը Սեմյոն Ուրալովի յութուբյան ալիքում հրապարակված «Чистота понимания» հաղորդման ընթացքում կոչ են արել «բռնի մեթոդներ կիրառել Ադրբեջանի դեմ, փոխել նրա սահմանադրական կարգը և խախտել երկրի տարածքային ամբողջականությունը»:
Քննությունը նաև պարզել է, որ օգոստոսի 13-ին նույն ալիքի եթերում մեղադրյալները, ինչպես պնդում է դատախազությունը, արտահայտվել են «Ադրբեջանի դեմ բռնի մեթոդների կիրառման և առանձին անձանց ֆիզիկական ոչնչացման սպառնալիքի, այդ թվում՝ նրանց թիրախային վերացման օգտին»: Այս հայտարարությունները դատախազությունը որակել է որպես «ահաբեկչության հրապարակային կոչեր»:
Կնյազևը, Ուրալովը և Չադաևը ներգրավվել են որպես մեղադրյալ: Քանի որ նրանք գտնվում են Ադրբեջանի տարածքից դուրս, նրանց նկատմամբ հետախուզում է հայտարարվել: Դատարանը որպես խափանման միջոց է ընտրել կալանավորումը:
Գլխավոր դատախազությունը դիմումներ է ուղարկել գործընկեր պետությունների իրավասու մարմիններին՝ մեղադրյալների գտնվելու վայրը պարզելու, նրանց ձերբակալելու և Ադրբեջանին հանձնելու համար: Բացի այդ, միջոցներ են ձեռնարկվել Ինտերպոլի գծով նրանց միջազգային հետախուզումը կազմակերպելու ուղղությամբ: