Ռուսաստանը սպասում է, որ Հայաստանը պարզաբանի սանիտարական խախտումների պատճառները և ներկայացնի դրանք ուղղելու ծրագիր, «Իզվեստիա» պարբերականին հայտնել են «Ռոսսելխոզնադզորում»՝ պատասխանելով արգելքների հնարավոր չեղարկման ժամկետների մասին հարցին։
Ռուսական կողմն ակնկալում է տեսնել քննության արդյունքները, արված քայլերը և այն մեխանիզմը, որով Հայաստանը կպահպանի ԵԱՏՄ անվտանգության կանոնները։
Ավելի վաղ ռուսական կողմը սահմանափակել էր հայկական մի շարք ապրանքների ներմուծումը՝ հանքային ջրերից ու ալկոհոլային խմիչքներից մինչև մրգեր, բանջարեղեն և կաթնամթերք։
Օգոստոսի 13-ին ՌԴ գյուղատնտեսության նախարար Օկսանա Լուտը ՀՀ էկոնոմիկայի նախարար Գևորգ Պապոյանի հետ հանդիպման ժամանակ հայտարարել էր, որ հայկական գյուղմթերքի անվտանգության ապահովումը կարևորագույն պայման է մատակարարումները վերականգնելու համար։ Դրա համար արտադրողները պետք է օգտագործեն սեփական հումքը, խիստ վերահսկեն թունաքիմիկատների կիրառումը և ապահովեն ապրանքների շարժի թափանցիկությունը։