ԱՄՆ նախագահ Դոնալդ Թրամփի իրավաբանները սպառնացել են զրպարտության հայց ներկայացնել ձախակողմյան վերլուծական կենտրոն Center for American Progress (CAP)-ի դեմ՝ նրա հրապարակած հետազոտության պատճառով, որը վերաբերում է ամերիկյան քաղաքներում Ազգային գվարդիայի ստորաբաժանումների տեղակայման արդյունավետությանը, հայտնում է CBS News-ը։
Հուլիսին CAP-ը հրապարակել է զեկույց, ըստ որի, չկա ապացույց, որ Ազգային գվարդիայի տեղակայումը հանգեցրել է բռնի հանցագործության մակարդակի նվազման։ Հեղինակները վերլուծել են այն քաղաքների տվյալները, որտեղ Թրամփի վարչակազմը զինվորականներ էր ուղարկել, և եզրակացրել, որ գվարդիականների ներկայությունն առանձնապես ազդեցություն չի ունեցել բռնի հանցագործությունների, սպանությունների և հրազենի կիրառման դեպքերի թվի վրա։
Օգոստոսի 17-ի նամակում Թրամփի փաստաբան Ալեխանդրո Բրիտոն հայտարարել է, որ զեկույցը պարունակում է ակնհայտ կեղծ տեղեկություններ, որոնք վնասում են նախագահի հեղինակությանը։ Նա պահանջել է մինչև ուրբաթ ժամը 17:00-ը հետ կանչել հրապարակումը, ներողություն խնդրել և փոխհատուցում վճարել Թրամփին։ Հակառակ դեպքում, զգուշացրել է փաստաբանը, նախագահը կարող է հայց ներկայացնել՝ պահանջելով առնվազն 5 մլրդ դոլար։
CAP-ի փաստաբան Քևին Մեցը պատասխանել է՝ պահանջներն «անհեթեթ» անվանելով և ընդգծելով, որ ճշմարիտ պնդումները չեն կարող համարվել զրպարտություն։ Ըստ նրա, կառավարության գործողությունները քննադատելու և նրա քաղաքականության հետ վիճելու իրավունքը ամերիկյան ժողովրդավարության հիմնարար սկզբունք է։
CAP-ի ղեկավար Նիրա Թանդենը նույնպես հայտարարել է, որ դատական հայցի սպառնալիքն ուղղված է կազմակերպությանը լռեցնելուն։ Ըստ նրա, փաստերի և վերլուծության հրապարակումը, որոնք հակասում են գործող վարչակազմի դիրքորոշմանը, պաշտպանված է ԱՄՆ Սահմանադրության Առաջին փոփոխությամբ։
Թրամփի վարչակազմը սկսել է Ազգային գվարդիայի ստորաբաժանումներ ուղարկել ամերիկյան քաղաքներ 2025 թվականին։ Սկզբում գվարդիականներին ուղարկել են Լոս Անջելես՝ ներգաղթի դեմ արշավանքների դեմ բողոքի ցույցերի ֆոնին, ապա՝ Վաշինգտոն։ Ավելի ուշ զինվորականներ են ուղարկվել նաև Մեմֆիս և Նոր Օռլեան։
Միաժամանակ, ՀԴԲ-ն անցյալ շաբաթ հայտնել է, որ 2025 թվականին ԱՄՆ-ում ընդհանուր առմամբ բռնի հանցագործության մակարդակը նվազել է։
CBS News-ի իրավաբան Ջեսիկա Լևինսոնի կարծիքով, Թրամփի հնարավոր հայցի հեռանկարները կասկածելի են։ Զրպարտության գործով հաղթելու համար հանրային գործիչը պետք է ապացուցի, որ պատասխանող կողմը գիտեր պնդման կեղծ լինելը կամ գործել է դրա արժանահավատության նկատմամբ անփույթ արհամարհանքով։ Նրա կարծիքով, վիճակագրական տվյալների շուրջ վեճը դժվար թե ինքնին դառնա զրպարտության հայցի հիմք։