Արարատի մարզի Մասիս խոշորացված համայնքի Հովտաշատ բնակավայրի Պարույր Սևակ փողոցի բնակիչների համար խմելու ջրի խնդիրը դեռ լուծված չէ։
Ինչպես ավելի վաղ հայտնել էր Shamshyan․com-ը, ավելի քան 250 բնակիչ շուրջ 20 օր զրկված է խմելու ջրից։
Այսօր խնդրի վերաբերյալ զրուցեցինք Հովտաշատի վարչական ղեկավար Նարեկ Տիգրանյանի հետ։ Նա հաստատեց, որ ջրամատակարարումը դեռևս չի վերականգնվել։
Տիգրանյանի խոսքով՝ այս պահին առանց ջրի շարունակում է մնալ 250-ից ավելի բնակիչ:
«Պատճառը մոտ 700 մետր երկարությամբ ջրատար խողովակի նորոգման աշխատանքներն են։ Հեշտ չէ։ Փորման աշխատանքներն արդեն ավարտվել են, իսկ այժմ ընթանում է վերականգնման և կառուցման փուլը»,- ABC Media-ին ասաց Տիգրանյանը։
Վարչական ղեկավարի փոխանցմամբ՝ աշխատանքներն ավարտելու և ջրամատակարարումն ամբողջությամբ վերականգնելու համար դեռ որոշակի ժամանակ է անհրաժեշտ։
Միաժամանակ, բնակիչները բարձրաձայնում են այլ խնդրի մասին։ Պարույր Սևակ փողոցում, նրանց խոսքով, կոյուղի չկա, իսկ գազատարի անցկացումն էլ խնդիրներ է ստեղծել։ Բնակիչները պնդում են, որ գազախողովակների տեղադրման հետևանքով որոշ հատվածներում անգամ դժվարացել է տներ մուտքն ու ելքը։