Հնագետները Իսպանիայի հյուսիս-արևելքում հայտնաբերել են հին կապարե պարսատիկի արկեր, որոնք, հավանաբար, վկայում են մ.թ.ա. 39 թվականին տեղի ունեցած՝ տեղական ցեղերից մեկի՝ սերետանների ապստամբության մասին Հռոմեական իշխանության դեմ։
Հետազոտության արդյունքները հրապարակվել են Բարսելոնայի Ինքնավար համալսարանի կայքում։
Գտածոները հայտնաբերվել են Արևելյան Պիրենեյներում՝ Սերդանյա շրջանում գտնվող հին հռոմեական Կոլետ դե Ժովել ռազմական ճամբարի ուսումնասիրության ընթացքում։
Հետազոտողների կարծիքով՝ արկերը օգտագործվել են հռոմեական զինվորների կողմից այն բանից հետո, երբ սերետանները՝ ժողովուրդներից մեկը, որը գրեթե երկու դար դիմադրել էր Պիրենեյան թերակղզու հռոմեական նվաճմանը, կազմակերպել էին հարձակումը։
Առանձնահատուկ արժեք ունեն CND տառերով երկու կապարե «գնդակները»։ Այս հապավումը վերաբերում է Իսպանիայի հռոմեական կառավարիչ Գնեոս Դոմիցիոս Կալվինուսին և թույլ է տալիս ճշգրիտ թվագրել իրադարձությունները մ.թ.ա. 39 թվականով։
Արկերից բացի, հնագետները գտել են զինվորական սանդալների երկաթե ցցեր, հագուստը ամրացնելու համար նախատեսված հռոմեական ֆիբուլաներ և մի քանի մետաղադրամ, որոնք հաստատել են ճամբարի տարիքը։
Հին հռոմեական պատմիչ Կասիոս Դիոնը գրել էր սերետանների ապստամբության մասին մ.թ.ա. 39 թվականին, սակայն նախկինում համարվում էր, որ այն տեղի է ունեցել զգալիորեն ավելի արևմուտք։ Նոր գտածոները ցույց են տալիս, որ բախումը տեղի է ունեցել հենց ժամանակակից Արևելյան Պիրենեյների տարածքում։
Հռոմը սկսել էր Պիրենեյան թերակղզու նվաճումը մ.թ.ա. 218 թվականին՝ Երկրորդ Պունիկյան պատերազմի ընթացքում։ Չնայած տեղական ցեղերի բազմադարյա դիմադրությանը, սերետանների ապստամբությունն ավարտվել է պարտությամբ, որից հետո հռոմեական իշխանությունները դաժանորեն ճնշել են դիմադրությունը։
Միևնույն ժամանակ պատիժ են կրել նաև որոշ հռոմեական զինվորներ, որոնք փախել էին ճամբարի վրա հարձակման ժամանակ։