Քիչ առաջ Ազգային ժողովի ամբիոնից տասը րոպե շարունակ հիմնավորվում էր, որ Հայոց ցեղասպանության միջազգային ճանաչման գործընթացը Հայաստանին պետք չէ և ավելին՝ վտանգավոր է նրա համար։ Այս մասին օգոստոսի 13-ին Ազգային ժողովի նիստում, ԱԺ արտաքին հարաբերությունների մշտական հանձնաժողովի նախագահի ընտրության հարցի քննարկման ժամանակ, հայտարարեց ընդդիմադիր «Հայաստան» դաշինքի պատգամավոր Քրիստինե Վարդանյանը։
Նա հարց բարձրացրեց՝ արդյոք միջազգային ճանաչման գործընթացը Թուրքիայի նկատմամբ ատելության հետևա՞նք է, և ինքն էլ պատասխանեց դրան՝ ընդգծելով, որ Ցեղասպանության ճանաչումն անհրաժեշտ է առաջին հերթին հենց Հայաստանի Հանրապետությանը, քանի որ այն նրա անվտանգության ապահովման առանցքային բաղադրիչներից մեկն է։
Պատգամավորը նաև նշեց, որ Ցեղասպանության ճանաչումը նոր ցեղասպանությունների իրականացումը կանխելու զսպող մեխանիզմ է։
Վարդանյանը հիշեցրեց, որ Հայոց ցեղասպանությունը ճանաչվել է տարբեր պետությունների կողմից նույնիսկ այն ժամանակներում, երբ անկախ Հայաստան պարզապես գոյություն չուներ։ Որպես օրինակ նա բերեց Ուրուգվայը՝ ընդգծելով, որ դա հնարավոր է դարձել Հայ դատի կառույցների գործունեության շնորհիվ, որոնց դեմ, խորհրդարանականի պնդմամբ, այսօր պայքարում են գործող իշխանությունները։
Պատգամավորը նշեց, որ իր դիրքորոշման և ներկայիս իշխանությունների դիրքորոշման միջև առանցքային տարբերություններից մեկը հենց «սպառնալիք» հասկացության սահմանման հարցն է։
Վարդանյանի խոսքով՝ Հայաստանի համար սպառնալիք են Թուրքիայի և Ադրբեջանի պետական քաղաքականությունները, մինչդեռ միջազգային հարաբերությունների մյուս սուբյեկտների քաղաքականությունը նա սպառնալիք չի համարում։
«Մենք կարծում ենք, որ Հայաստանի Հանրապետության ռեսուրսները պետք է ուղղվեն հենց այդ սպառնալիքներին հակազդելուն։ Հայաստանը ռեսուրսներ չունի, որպեսզի դառնա մի գերտերության գործիքը մյուսի դեմ։ Եթե Ռուսաստանը ցանկանա, որ մենք դառնանք գործիք Միացյալ Նահանգների դեմ, մենք չպետք է դա թույլ տանք․ դրա համար ռեսուրսներ չունենք։
Եթե որևէ այլ աշխարհաքաղաքական կենտրոն ցանկանա մեզ օգտագործել որպես գործիք Ռուսաստանի դեմ, մենք նույնպես չպետք է դա թույլ տանք․ մենք նման հնարավորություններ էլ չունենք։ Նույնիսկ առկա ռեսուրսները բավարար չեն այն սպառնալիքների դեմ պայքարելու համար, որոնց բախվում է հենց Հայաստանը», – հայտարարեց Վարդանյանը։