Հայաստանի Անվտանգության խորհրդի նոր քարտուղար Ալեն Սիմոնյանը 24news.am-ին տված հարցազրույցում հայտարարել է, որ մտադիր է մնալ ակտիվ հանրային քաղաքական գործիչ և բացահայտ արտահայտվել ոչ միայն անվտանգության հարցերի, այլև ներքաղաքական իրավիճակի մասին։ Նա նաև կոչ է արել պատգամավորներին անհարկի չօգտագործել իր անունը և նշել, որ ինքը կասի, թե ինչ ձևով կպատասխանի քննադատությանը։
Սիմոնյանը, մեկնաբանելով ընդդիմության ներկայացուցիչների, այդ թվում՝ Հայաստանի երկրորդ նախագահ Ռոբերտ Քոչարյանի և «Ուժեղ Հայաստան» կուսակցության առաջնորդ Սամվել Կարապետյանի հասցեին իր կոշտ հայտարարությունները, ասել է, որ անհրաժեշտ չի համարում սահմանափակել իրեն հանրային գնահատականներում։
«Ես, իհարկե, կիսում եմ իմ գործընկերների դիրքորոշումը, բայց ես արձագանքեցի։ Թող չբզբզան։ Այն, որ ես հիմա այս շենքում չեմ աշխատում, նրանց իրավունք չի տալիս ամեն հարմար և անհարմար առիթով որևէ կերպ հղում անել ինձ», — ասել է Սիմոնյանը։
Նրա խոսքով՝ ինքը կսահմանի, թե ինչպես արձագանքի իր հասցեին հնչող հայտարարություններին։
«Ես կորոշեմ, թե տվյալ պահին ինչպես արձագանքել։ Եթե որևէ տեղ և որևէ հարցում ես անցնեմ որոշակի սահման, կարծում եմ՝ գոյություն ունեն համապատասխան իրավական և ներմուսակցական մեխանիզմներ, որպեսզի իմ գործընկերները, ընկերները կամ համապատասխան կառույցները կարողանան արտահայտել իրենց կարծիքը։ Բայց ես արդեն շատ վաղուց հանրային քաղաքական գործիչ եմ», — հայտարարել է նա։
Սիմոնյանը նաև մերժել է այն պատկերացումը, թե Անվտանգության խորհրդի քարտուղարի պաշտոնը ենթադրում է առանձնահատուկ փակություն և զսպվածություն հանրային մեկնաբանություններում։
«Սա ստերեոտիպ է։ Ես լինելու եմ Անվտանգության խորհրդի ակտիվ քարտուղար, արտահայտվելու եմ ներքին քաղաքականության հետ կապված հարցերի վերաբերյալ, երբ դա անհրաժեշտ կհամարեմ։ Ես ձեզ հարցազրույցներ եմ տալու», — հայտարարել է նա։
Սիմոնյանի խոսքով՝ ժամանակակից տեղեկատվական տարածքում պաշտոնյաները չեն կարող իրենց պաշտոնի շուրջ անհասանելիության և խորհրդավորության կերպար ձևավորել։
«Մենք ապրում ենք տեղեկատվական դարաշրջանում, այլևս անհնար է որևէ բան թաքցնել։ Եվ այդ միստիկան՝ թե այս պաշտոնն այսպիսին է, դու պետք է այսպես երևաս, այսպես խոսես, պետք է թողնել։ Շատ մարդիկ նման լուրջ դեմքի արտահայտությամբ ու նման պատկերացումներով այնպիսի հիմարություններ են արել, որոնց հետևանքները մեր ժողովուրդը մինչ օրս փորձում է ուղղել», — ասել է Անվտանգության խորհրդի քարտուղարը:
Նա հավելել է, որ անհրաժեշտ չի համարում իր հանրային վարքագիծը հարմարեցնել բարձրաստիճան պաշտոնյայի կարգավիճակի մասին ձևավորված պատկերացումներին։
«Եթե չեք ուզում սա լուսաբանել՝ մի լուսաբանեք։ Եթե դա ձեզ հետաքրքիր չէ՝ մի լուսաբանեք։ Բայց ես կարծում եմ, որ սա կարծրատիպ է, այն էլ՝ հնացած կարծրատիպ», — ընդգծել է Սիմոնյանը։