Չեխիայի Սենատը դեմ է արտահայտվել այն օրինագծին, որով նախատեսվում էր սահմանափակել երկրի նախագահի՝ միջազգային կազմակերպություններում մշտական ներկայացուցչությունների ղեկավարներ նշանակելու և հետ կանչելու իրավունքը։ Ըստ այդ նախաձեռնության՝ նշված լիազորությունները պետք է փոխանցվեին արտաքին գործերի նախարարին։ Այս մասին հայտնում է Novinky-ն։
Միաժամանակ, սենատորները մերժել են նաև պետական ծառայողների մասին օրինագիծը, որի փաթեթում ներառված է եղել դիվանագիտական ծառայության մասին օրենքի առաջարկվող փոփոխությունը։ Սենատորներից շատերի կարծիքով՝ երկու նախաձեռնություններն էլ հակասում են Սահմանադրությանը։
«Այս օրենքն ունի հակասահմանադրական թերություն», — հայտարարել է Սենատի նախագահ Միլոշ Վիստրչիլը։
Սենատոր Միխայել Կանովը նույնպես նորմն անվանել է հակասահմանադրական՝ ընդգծելով, որ չի կարող քվեարկել մի փաստաթղթի օգտին, որն ակնհայտորեն հակասում է Հիմնական օրենքին։ Նա նաև հավելել է, որ մյուս սենատորների հետ մտադիր է դիմել Սահմանադրական դատարան, եթե խորհրդարանը կրկին հավանություն տա այս նախաձեռնությանը։
Նախագահի լիազորությունները սահմանափակելու առաջարկով հանդես է եկել «Ազատականներ» կուսակցության պատգամավոր Լիբոր Վոնդրաչեկը։ Ընդդիմության համոզմամբ՝ այս նախաձեռնությունը պատասխան քայլ է նախագահ Պետր Պավելի այն որոշմանը, որով նա հրաժարվել էր «Մոտորիստներ» կուսակցության պատգամավոր Ֆիլիպ Տուրեկին նախարար նշանակել։
Սենատի Սահմանադրական հանձնաժողովը նույնպես ավելի վաղ հակասահմանադրական է ճանաչել այս փոփոխությունը։ Հանձնաժողովի գնահատմամբ՝ ավելի ցածր իրավաբանական ուժ ունեցող օրենսդրական ակտը չի կարող փոփոխել ավելի բարձր իրավաբանական ուժ ունեցող նորմի դրույթները։
Սենատորները քննադատել են նաև այն հանգամանքը, որ պետական ծառայողների մասին օրենքի հարակից փոփոխությունները ներառված չեն եղել բուն քննարկվող օրինագծում։ Նրանց կարծիքով՝ երկու փաստաթղթերի փոխկապակցվածությունն ըստ էության թույլ չի տալիս դրանք առանձին դիտարկել։
Այժմ օրինագիծը վերադառնում է Պատգամավորների պալատ, որը կարող է այն վերստին քննարկել սեպտեմբերյան նիստում։ Իշխող «ANO», SPD և «Մոտորիստներ» կոալիցիան ստորին պալատում ունի 108 ձայնի մեծամասնություն։