ԱՄՆ նախագահ Դոնալդ Թրամփը հայտարարել է, որ Հորմուզի նեղուցը համարում է «ԱՄՆ տարածք»՝ Իրանի նավագնացության և նավահանգիստների նկատմամբ շարունակվող ամերիկյան շրջափակման ֆոնին։
«Մենք նույնիսկ չգիտենք՝ հաղթե՞լ ենք, թե՞ ոչ, որովհետև հիմա ես Հորմուզի նեղուցը դիտարկում եմ որպես ԱՄՆ տարածք», — ասել է Թրամփը Հարավային Կարոլինայում ունեցած ելույթի ժամանակ, որտեղ քարոզում էր Սենատի թեկնածու Դարլին Գրեմի օգտին։
Ավելի ուշ նախագահը կատակել է Իրանի դեմ հարվածների հնարավոր շարունակության մասին։
«Այսօր ուրբաթ է։ Մենք շատ ժամանակ ունենք», — ասել է Թրամփը, ապա մեջբերել The Snake բանաստեղծությունը, որը նա պարբերաբար օգտագործում է նախընտրական միջոցառումների ժամանակ։ «Էլ ի՞նչ անեմ, գրողը տանի։ Նորից մի քիչ չռմբակոծե՞մ Իրանը», — հավելել է նա։
ԱՄՆ Կենտրոնական հրամանատարության (CENTCOM) տվյալներով, մինչև ուրբաթ ամերիկացի զինվորականները վերահասցեավորել էին 68 առևտրային նավ՝ ստիպելով նրանց պահպանել շրջափակման պայմանները։
ԱՄՆ-ն և Իրանն առայժմ չեն կարողացել պայմանավորվել հակամարտության դադարեցման շուրջ, որը մոտենում է վեցամսյա սահմանագծին։ Թրամփի վարչակազմը ձգտում է ուժեղացնել տնտեսական ճնշումը Թեհրանի վրա՝ սահմանափակելով նավագնացությունը Հորմուզի նեղուցով, որը իրանական նավթի արտահանման առանցքային ուղի է։
Իրանի և Օմանի միջև գտնվող նեղուցով սովորական պայմաններում անցնում է համաշխարհային ծովային նավթամատակարարումների մոտ մեկ հինգերորդը։
Թրամփն առաջին անգամ անցյալ շաբաթ սպառնացել էր հայտարարել Հորմուզի նեղուցը ԱՄՆ տարածք։ Ավելի ուշ նա հայտարարել էր, որ փաստացի արդեն վերահսկում է ջրային ուղին՝ սահմանված շրջափակման շնորհիվ։
«Ըստ էության, հենց այդպես էլ կա։ Մենք շրջափակում ունենք։ Ոչ մի նավ չի անցնում, եթե մենք դա չենք ուզում», — ասել է նախագահը։
Երկուշաբթի Թրամփը հայտարարել էր, որ իրեն դուր է գալիս նեղուցը պաշտոնապես ամերիկյան տարածք հայտարարելու գաղափարը, ինչպես նաև սոցցանցում հրապարակել էր քարտեզ, որտեղ Հորմուզի նեղուցը նշված էր որպես «ԱՄՆ նոր տարածք»։
Իրանի արտաքին գործերի փոխնախարար Քազեմ Ղարիբաբադին դատապարտել է Թրամփի հայտարարությունները՝ դրանք անվանելով «զառանցանք»։