Իսպանիայում Airbus-ի հազարավոր աշխատակիցներ վերսկսել են գործադուլը այն բանից հետո, երբ մերժել են ընկերության վերջին առաջարկը՝ աշխատավարձերի և աշխատանքային պայմանների վերաբերյալ։ Արհմիությունները հայտարարել են, որ ակցիան, որը սկսվել էր երեքշաբթի, այժմ լինելու է անժամկետ։ Հինգշաբթի կողմերը պետք է անցկացնեն նոր նիստ՝ հակամարտությունը կարգավորելու համար, հայտնում է Reuters-ը։
Արհմիությունների տվյալներով՝ երեքշաբթի գործադուլին մասնակցել է մասնակցելու իրավունք ունեցող աշխատողների մոտ 90%-ը։ Միաժամանակ, ակցիան կազմակերպած երեք արհմիությունները ներկայացնում են Իսպանիայում Airbus-ի շուրջ 14 հազար աշխատակիցներից մոտ 40%-ին։ Գործադուլին մասնակցության վերաբերյալ տվյալները անկախ կերպով հաստատել չի հաջողվել։
Ներկայիս հակամարտությունը դարձել է հուլիսին տեղի ունեցած 22-օրյա գործադուլների շարունակությունը։ Աշխատողները մերժել են Airbus-ի առաջարկը, որը ներկայացվել էր անցած ուրբաթ միջնորդի հետ հանդիպման ժամանակ։ Արհմիությունների խոսքով՝ ընկերությունը չի առաջարկել հստակ ժամկետներ և ֆինանսական պարտավորություններ, իսկ առանցքային հարցերը՝ ներառյալ արձակուրդների տևողությունը, ճկուն գրաֆիկը և տրանսպորտային արտոնությունները, փաստացի հետաձգել է։
Աշխատակիցները պահանջում են աշխատավարձերի բարձրացում՝ հաշվի առնելով գնաճը, հեռավար աշխատանքի նախկին հնարավորությունների վերականգնում և հիվանդության թերթիկով վճարումների պահպանում։
UGT և CGT արհմիությունների ներկայացուցիչները հայտարարել են, որ գործադուլն արդեն հանգեցրել է ռազմական և քաղաքացիական արտադրանքի արտադրության դանդաղեցման և կարող է բարդացնել Airbus-ի՝ տարեկան 870 ինքնաթիռ մատակարարելու ծրագրի իրականացումը։ Ընկերությունը նախկինում հայտնել էր, որ վարչական և օժանդակ ստորաբաժանումների աշխատանքի խափանումները առայժմ չեն ազդել արտադրության վրա։
Գործադուլի ընթացքում Airbus-ը դադարեցրել է Իսպանիայում նոր աշխատակիցների նախատեսված հավաքագրումը, հայտնել է երկրում ընկերության արտադրական խորհրդի ղեկավար Ալֆոնսո Մորան։
Միաժամանակ Airbus-ն արդեն մասամբ զիջել է աշխատակիցներին հեռավար աշխատանքի հարցում։ Հուլիսյան բողոքներից հետո ընկերությունը հրաժարվել է տնից աշխատելու հնարավորությունը էապես կրճատելու ծրագրերից․ այժմ աշխատակիցները կկարողանան միջինում շաբաթական երկու օր աշխատել հեռավար։
Իսպանիայում Airbus-ն ունի ութ արտադրական հարթակ։ Դրանք արտադրում են ռազմատրանսպորտային ինքնաթիռներ, քաղաքացիական օդանավերի բաղադրիչներ և արբանյակներ։