Ազգային ժողովի «Հայաստան» խմբակցության ղեկավար Աննա Գրիգորյանը Հակակոռուպցիոն դատարանի մոտ լրագրողների հետ զրույցում հայտարարել է, որ Հայաստանի իշխանությունները փորձում են արագացնել երկրի երկրորդ նախագահ Ռոբերտ Քոչարյանի վերաբերյալ դատական գործընթացը՝ չնայած նրա վերջերս տարած վիրահատությանը։
«Ռոբերտ Քոչարյանին ստենտավորում են արել, և դրանից հետո որոշակի հստակ ժամանակահատված կա, որ նման միջամտությունից հետո պացիենտը պետք է մնա որոշակի պայմաններում և հետևի որոշակի ռեժիմի», — Հայաստանի Հակակոռուպցիոն դատարանի մոտ լրագրողներին ասել է Գրիգորյանը։
Նրա խոսքով՝ Քոչարյանի վերաբերյալ դատավարությունը փորձում են անցկացնել հնարավորինս սեղմ ժամկետներում, որպեսզի կատարեն վարչապետ Նիկոլ Փաշինյանի քաղաքական պատվերը։
«Բայց հիմա պարզ է, որ քանի որ պատվեր են իջեցրել, փորձելու են տեղավորվել ժամկետների մեջ, որպեսզի բավարարեն Նիկոլ Փաշինյանի բոլոր բոլորին նստեցնելու մոլուցքը և իրականացնեն այդ պատվերները։ Դա ակնհայտ է», — հայտարարել է պատգամավորը։
Գրիգորյանը պնդում է, որ քաղաքական մեծամասնության ներկայացուցիչները բացահայտ խոսում են իրավապահ համակարգի վրա ճնշում գործադրելու անհրաժեշտության մասին։
«Իրենք ասում էին. «Այո՛: Մենք իջեցրել ենք այդ պատվերը, և իրավապահ համակարգը պարտավոր է իրականացնել այդ պատվերները: Եվ նույնիսկ այն մարդիկ, ովքեր իրավապահ համակարգում փորձեն այլ կերպ մտածել կամ սխալ քայլ անել, դուրս են շպրտվելու իրավապահ համակարգից»», — ասել է նա։
Պատգամավորի կարծիքով՝ նման հայտարարությունները վկայում են պետական ինստիտուտների քանդման մասին։
«Այսինքն՝ սրանք պետական համակարգի ոտնահարման և ոչնչացման ակնհայտ դրսևորումներ են։ Նախկինում էլ են նման դրսևորումներ եղել, բայց դրանք ինչ-որ չափով քողարկված էին՝ մեկը ՍՄՍ էր գրում, կամ մեկը մյուսին զանգում ու փսփսում էր, իսկ հիմա դրա կարիքը չկա։ Նրանք այնքան են ցինիկացել, որ Ազգային ժողովի ամբիոնից արդեն կարող են նման հայտարարություններ հնչեցնել», — հայտարարել է Գրիգորյանը։
Մեկնաբանելով առաջիկա դատական նիստը՝ նա առանձնահատուկ ընդգծել է դատարանի նկատմամբ կիրառվող ճնշումը։
«Շատ հաճախ ասում են՝ «թող դատարանը արդար որոշում կայացնի»։ Իսկ հիմա այս դատավորը լսում է Նիկոլ Փաշինյանի այս ագրեսիվ հռետորաբանությունը, թե «նա պետք է նստի և վերջ»։ Հիմա, եթե նույնիսկ դատավորը ազնիվ մարդ է, եթե նույնիսկ ուզենա արդար որոշում կայացնել, նա իսկապես չի դիմանա նման ճնշմանը», — ասել է «Հայաստան» խմբակցության ղեկավարը։