Ինչպես ցույց են տալիս հանրաքվեի նախնական արդյունքները, Իսլանդիան մերժել է Եվրոպական միությանն անդամակցության շուրջ բանակցություններ սկսելու կառավարության առաջարկը, գրեթե բոլոր քվեները հաշվելուց հետո հայտնել է իսլանդական հանրային հեռուստառադիոընկերություն RÚV-ը։
Բանակցությունների մեկնարկի դեմ քվեարկել է ընտրողների 52,5%-ը, կողմ՝ 47,5%-ը։ Չհաշվված էին մնացել միայն մի քանի քվեաթերթիկներ վեց ընտրատարածքներից մեկում, որտեղ մեծամասնությունը նույնպես հակված էր բացասական պատասխանի։
«Ազգը մերժում է ԵՄ-ին անդամակցության շուրջ բանակցությունները», — արձանագրել է RÚV-ը։
Արդյունքը հարված կլինի Բրյուսելի համար, որը հույս ուներ ԵՄ ներգրավել հարուստ Իսլանդիային և պատրաստ էր վիճահարույց հարցերի շուրջ փոխզիջումներ փնտրել, որպեսզի հեշտացնի նրա միացումը։
Իսլանդիայի կառավարությունը քվեարկությունը անվանում էր պատմական հնարավորություն և, ըստ էության, ներկայացնում էր այն որպես սկզբունքային ընտրություն՝ սկսել բանակցությունները հիմա, թե հրաժարվել այդ գաղափարից անորոշ ժամկետով։ Վարչապետ Քրիստրուն Ֆրոստադոութիրը նախկինում հայտարարել էր, որ բանակցությունների հակառակորդների հաղթանակը հնարավորություն կտա փակել երկրի՝ ԵՄ անդամակցության հարցը։
Անդամակցության կողմնակիցները պնդում էին, որ անդամակցությունը կարող էր նպաստել բարձր տոկոսադրույքների նվազմանը և ապահովել երկրի համար լրացուցիչ անվտանգություն միջազգային անկայունության, Ուկրաինայում պատերազմի և ԱՄՆ նախագահ Դոնալդ Թրամփի՝ Գրենլանդիան ԱՄՆ-ին հնարավոր միացնելու մասին հայտարարությունների ֆոնին։
Անդամակցության հակառակորդները, ընդհակառակը, զգուշացնում էին, որ ԵՄ-ին միանալը վտանգի տակ կդնի Իսլանդիայի ինքնիշխանությունն ու նրա վերահսկողությունը ձկնային պաշարների և տարածքային ջրերի նկատմամբ։
Իսլանդիան առաջին անգամ ԵՄ-ին անդամակցության հայտ է ներկայացրել 2009 թվականին՝ ֆինանսական ճգնաժամի ֆոնին, որը լուրջ հարված էր հասցրել երկրի փոքր և խոցելի տնտեսությանը։ 2013 թվականին եվրասկեպտիկ տրամադրված կառավարությունը դադարեցրեց բանակցությունները։
Վերջին տարիներին անդամակցության հարցը կրկին հայտնվել է ուշադրության կենտրոնում՝ աշխարհաքաղաքական լարվածության, Մերձավոր Արևելքում պատերազմների և ԱՄՆ-ի առևտրային մաքսատուրքերի ֆոնին։ Հանրաքվեն դարձել է Իսլանդիայի և Եվրոպական միության հարաբերությունների շուրջ բազմամյա վեճերի հերթական փուլը։