Քյոլնում գերմանական Rheinmetall պաշտպանական կոնցեռնի դեմ հակապատերազմական ցույցն ավարտվել է մասնակիցների մի մասի և ոստիկանության միջև բախումներով, հայտնում է DW-ն։
Ակցիան անցկացվել է շաբաթ օրը «Խաղաղություն բոլորի համար մոլորակի վրա» կարգախոսի ներքո՝ «Ապազինել Rheinmetall-ը» շարժման բողոքի արշավի շրջանակում։
Ոստիկանության տվյալներով, ցույցին մասնակցել է մոտ հազար, մինչդեռ կազմակերպիչները մասնակիցների թիվը գնահատել են ավելի քան 3,5 հազար։ Երթի մեկնարկից կարճ ժամանակ անց դեմքերը ծածկած ցուցարարների մի խումբ ներկով փաթեթներ է նետել բանկի շենքի վրա և սկսել է հարձակվել ոստիկանների վրա։
Իրավապահների տվյալներով, ոստիկանների ուղղությամբ կրակել են պողպատե գնդիկներով, ինչպես նաև նրանց հարվածներ են հասցրել ձեռքերով ու ոտքերով և նրանց վրա ցողել կրակմարիչների պարունակությունը։ Ինչպես պնդվում է, ակցիայի երկու մասնակից փորձել են խլել ոստիկանության աշխատակցի ծառայողական զենքը։
Բախումների հետևանքով վնասվածքներ է ստացել 11 ոստիկան։ Իրավապահները շուրջ 300 մասնակցի բերման են ենթարկել՝ նրանց ինքնությունը պարզելու համար։ Ոստիկանությունը հայտարարել է, որ կիրառել է ֆիզիկական ուժ՝ հետագա հարձակումները կանխելու համար, և առանձնացրել է ագրեսիվ տրամադրված խմբին խաղաղ մասնակիցներից։
Միաժամանակ ցուցարարների մյուս մասը շարունակել է ակցիան առանց լուրջ միջադեպերի։ Կազմակերպիչները հայտարարել են, որ ոստիկանության գործողությունների հետևանքով տուժել է երթի ավելի քան 200 մասնակից։ Իրավապահները հարուցել են մի քանի քրեական գործ, այդ թվում՝ առողջությանը վնաս պատճառելու և հասարակական կարգի կոպիտ խախտման փաստերով։
Ակցիան դարձել է «Ապազինել Rheinmetall-ը» բազմօրյա բողոքի արշավի մի մասը, որը սեպտեմբերի 1-ից անցկացվում է Քյոլնում։ Դրա մասնակիցները հանդես են գալիս Գերմանիայի ռազմական ծախսերի աճի, սպառազինության արտադրության և վերազինման քաղաքականության դեմ։
Հինգշաբթի օրը ակտիվիստները նաև արգելափակել էին Քյոլնում ռազմական զորանոցի տարածք մուտքը, իսկ Բոննում ակցիա էին անցկացրել Rheinmetall-ի ձեռնարկության մոտ։