ԱՄՆ նախագահ Դոնալդ Թրամփի վարկանիշը նվազել է՝ հասնելով ռեկորդային ցածր մակարդակի։ Ամերիկացիները մտահոգված են բենզինի բարձր գներով և, կարծես, պատրաստ են նոյեմբերի 3-ին կայանալիք Կոնգրեսի ընտրություններում «պատժել» նրա ներկայացրած Հանրապետական կուսակցությանը. այս մասին են վկայում Reuters/Ipsos-ի հարցման տվյալները։
Ամերիկացիների մոտ 31%-ն է հավանություն տալիս Թրամփի գործունեությանը. սա մեկ տոկոսային կետով պակաս է երկու շաբաթ առաջվա ցուցանիշից և ամենացածր մակարդակն է նրա նախագահության ամբողջ ընթացքում։
Հարցին, թե ո՞ր կուսակցության օգտին կքվեարկեին, եթե Կոնգրեսի ընտրություններն այսօր անցկացվեին, համազգային հարցման մասնակից գրանցված ընտրողների մոտ 47%-ը նշել է դեմոկրատներին, իսկ 35%-ը՝ հանրապետականներին։ Դեմոկրատների 12 կետով առավելությունն ամենամեծն է ընթացիկ ընտրական ցիկլի ընթացքում և կարող է ամրապնդել դեմոկրատների հույսերը՝ ստանձնելու վերահսկողությունը ԱՄՆ Ներկայացուցիչների պալատի և Սենատի նկատմամբ։
Հանրապետականների համար պալատներից որևէ մեկի նկատմամբ վերահսկողությունը կորցնելը կարող է բարդացնել Թրամփի ծրագրերի իրականացումը նրա պաշտոնավարման վերջին երկու տարիների ընթացքում։
Երկու շաբաթ առաջ անցկացված Reuters/Ipsos-ի հարցումը ցույց էր տվել, որ դեմոկրատները հանրապետականներին գերազանցում են 7 կետով՝ 44% ընդդեմ 37%-ի։
Ամերիկացիների մոտ 68%-ը դժգոհ է տնտեսության ոլորտում Թրամփի գործելաոճից։ Հարցման մասնակից ընտրողները տնտեսության կառավարման հարցում դեմոկրատներին ավելի նախընտրելի են համարել, քան հանրապետականներին (40%՝ ընդդեմ 33%-ի)։
Առցանց անցկացված հարցմանը մասնակցել է ԱՄՆ 1679 չափահաս քաղաքացի, այդ թվում՝ 1279 գրանցված ընտրող։