PHP ծրագրավորման լեզվում թերությունների հայտնաբերումից հետո Եվրոպայի մի շարք երկրներում պետական կառույցներ, հիվանդանոցներ և այլ կազմակերպություններ ժամանակավորապես անջատել են իրենց կայքերը՝ կիբերհարձակումների վտանգը նվազեցնելու նպատակով։
Reuters-ի հաղորդմամբ՝ կանխարգելիչ միջոցառումներ են իրականացվել Գերմանիայում, Ֆրանսիայում, Բելգիայում, Նիդեռլանդներում և Ֆինլանդիայում։ Որոշ երկրներում, սակայն, խոցելիությունների շահագործման կամ տվյալների արտահոսքի դեպքեր չեն արձանագրվել։
OpenAI-ի տվյալներով՝ թերություններից մեկը հայտնաբերվել է արհեստական բանականության օգնությամբ՝ GPT-5.6 Sol մոդելի կիրառմամբ։ Երկու թերությունն էլ հայտնաբերել է նաև Google-ին պատկանող Wiz կիբերանվտանգության ընկերությունը։
PHP մշակողները թողարկել են անվտանգության թարմացումներ և օգտատերերին կոչ արել հնարավորինս արագ տեղադրել դրանք։ ԱՄՆ Ազգային անվտանգության գործակալությունը ևս զգուշացրել է, որ թերությունները կարող են հնարավորություն տալ կիբերհարձակում իրականացնողներին մուտք գործել սերվերների ֆայլային համակարգեր կամ տվյալների բազաներ։
Cloudflare-ը հայտնել է, որ արդեն արձանագրում է խոցելիությունների հետ կապված հարձակումների առաջին փորձերը։ Մասնագետները կազմակերպություններին խորհուրդ են տալիս անհապաղ թարմացնել խոցելի համակարգերը, իսկ անհրաժեշտության դեպքում՝ ժամանակավորապես անջատել դրանք մինչև խնդրի լուծումը։