ԿԺԴՀ առաջնորդ Կիմ Չեն Ընը չորեքշաբթի այցելել է Ճապոնական ծովում կառուցվող ժամանակակից ռազմածովային բազա, հաղորդում է Կորեայի կենտրոնական հեռագրական գործակալությունը (ԿԿՀԳ)։
«Կիմ Չեն Ընը (…) ընդգծել է ռազմածովային բազայի ռազմավարական կարևորությունը», — նշում է ԿԿՀԳ-ն։
Ըստ հրապարակման՝ ռազմածովային ուժերի բազայի շինարարությունն ընթանում է «կուսակցության IX համագումարի և կուսակցության իններորդ գումարման Կենտրոնական կոմիտեի II պլենումի որոշման համաձայն»։ Բազայի գտնվելու վայրը չի հստակեցվում։
Հյուսիսային Կորեայի առաջնորդը լսել է բազայի շինարարության ընթացքի վերաբերյալ զեկույցը։
Բացի այդ, նա «ցուցումներ է տվել ռազմավարական տարրերի տեղակայման վերաբերյալ՝ բազայի արդիականացումն ու բազմաֆունկցիոնալության ապահովումը հետևողականորեն իրականացնելու համար»։
«Կիմ Չեն Ընը նշել է, որ ժամանակակից ռազմածովային բազայի կառուցումը շարունակում է մնալ կարևորագույն և հիմնարար գործ, որն անմիջականորեն կապված է մեր պետության անվտանգության և ծովում ինքնիշխանության պաշտպանության հետ», — ասվում է հրապարակման մեջ։