Սոցիալական ցանցերում հայտնվել են տեսախցիկների տեսագրություններ, որոնցում երևում է Վիլնյուսի Աստծո ողորմածության սրբավայրի եկեղեցու խաչելությունը վնասած տղամարդը, հայտնել է LRT հեռուստաալիքը։
Ոստիկանությունը շարունակում է իրավախախտի որոնումները։
Միջադեպը տեղի է ունեցել նոյեմբերի 11-ին, տեղի ժամանակով ժամը 21:00-ի սահմաններում, Վիլնյուսի Դոմինիկոնու փողոցում գտնվող եկեղեցու ներքնաբակում։ Անհայտ տղամարդը կոտրել է փայտե խաչի վրա ամրացված Հիսուս Քրիստոսի ոսկեգույն քանդակը։
Ավելի ուշ տեսագրությունները հրապարակել է եկեղեցու ռեկտորի տեղակալ Էլիյաս Անատոլի Մարկաուսկասը։ Սոցիալական ցանցերում տարածվել է նաև մի տեսանյութ, որում տղամարդկանցից մեկը ծիծաղելով լուսանկարվում է խաչից հանված Հիսուսի քանդակի հետ, իսկ մյուսը լուսանկարում է նրան։ Երբ քանդակը կոտրվում է, տղամարդիկ վախենում են և փախչում դեպքի վայրից։ Հրապարակման համաձայն՝ նրանք խոսում էին անգլերեն։
Եկեղեցական թեմը խնդրում է օգնել պարզել տղամարդկանց ինքնությունը։ Կարևոր տեղեկություններ ունեցող բոլոր անձանց խնդրում են դիմել ոստիկանություն՝ +370 700 60 000 հեռախոսահամարով, կամ տեղեկությունները փոխանցել www.epolicija.lt պորտալի միջոցով։
Կասկածյալների նկատմամբ հատկապես ուշադիր լինելու կոչ են արել Հին քաղաքի և հարակից թաղամասերի բնակիչներին, ինչպես նաև հյուրանոցների և այլ հաստատությունների աշխատակիցներին։
Ոստիկանությունը մինչդատական քննություն է իրականացնում Լիտվայի քրեական օրենսգրքով նախատեսված հասարակական կարգի խախտման փաստի առիթով։
«Պարզվում է կասկածյալի ինքնությունը», — հայտնել են Վիլնյուսի շրջանի ոստիկանության գլխավոր կոմիսարիատից։