Լիբանանի խորհրդարանի պատգամավոր Ջեբրան Բասիլը ընդգծել է Լիբանանում և ընդհանրապես Մերձավոր Արևելքում քրիստոնյաների դերը՝ նրանց անվանելով համայնքների միջև «կամուրջ» և տարածաշրջանային համակեցության անկյունաքար, հայտնում է NNA-ն։
Խոսելով Լիբանանի սոցիալական մոդելի մասին՝ Բասիլն ասել է, որ երկիրը կրոնական համակեցության եզակի օրինակ է՝ զգուշացնելով, որ քրիստոնյաների մեկուսացումը կամ նրանց դերի անկումը կթուլացնի այդ հավասարակշռությունը և կխաթարի միջկրոնական ներդաշնակությունը։
Նա մատնանշել է Մերձավոր Արևելքում, այդ թվում՝ Իրաքում, Սիրիայում, Պաղեստինում և Լիբանանում քրիստոնյաների թվի կրճատումը՝ այս միտումը կապելով շարունակվող պատերազմների, անկայունության և տնտեսական սահմանափակ հնարավորությունների հետ, հավելելով, որ դրանք շարունակում են խթանել արտագաղթը։
Բասիլն ընդգծել է, որ քրիստոնյաները հաճախ տարածաշրջանային հակամարտությունների գլխավոր զոհերից են, և շեշտել է Լիբանանի չեզոքության պահպանման կարևորությունը՝ երկրի բազմազանությունն ու ազգային դերը պահպանելու համար։ Նա հավելել է, որ Լիբանանը պետք է խուսափի արտաքին հակամարտությունների մեջ ներքաշվելուց և փոխարենը առաջնահերթություն տա կայունությանը և իր բոլոր համայնքների, այդ թվում՝ հարավի քրիստոնյա բնակչության պաշտպանությանը։
Խոսելով Միացյալ Նահանգների դերի մասին՝ Բասիլը կոչ է արել տարածաշրջանի նկատմամբ ավելի հավասարակշռված և արդար մոտեցում ցուցաբերել՝ հայտարարելով, որ փոքրամասնական խմբերի թուլացնող քաղաքականությունը չի նպաստում երկարաժամկետ կայունությանը։ Նա եզրափակել է, որ Լիբանանի ուժը նրա բազմազանության մեջ է՝ ընդգծելով, որ քրիստոնյաները պետք է շարունակեն ակտիվ լինել քաղաքական և հասարակական կյանքում՝ երկրի ինքնության և ապագայի մեջ իրենց դերը պահպանելու համար։