ԵՐԵՎԱՆ, 12 մայիսի. /ԱՌԿԱ/. Հայաստանի ավտոապահովագրողների բյուրոն և InsurTech մասնագետների համաշխարհային ասոցիացիան (GAIP) երկուշաբթի համագործակցության համաձայնագիր են ստորագրել ԱՊՊԱ-ի և ապահովագրական տեխնոլոգիաների ոլորտում:
Փաստաթուղթը ստորագրել են ՀՀ Ավտոապահովագրողների բյուրոյի գործադիր տնօրեն Վաղինակ Եղիազարյանը և GAIP-ի հիմնադիր Աֆթաբ Հասանը:
Ստորագրումը նախորդում է InsureTek Armenia 2026 միջազգային համաժողովին, որը տեղի կունենա հունիսի 4-ին Երևանում՝ հայաստանյան և միջազգային ապահովագրական ու տեխնոլոգիական ոլորտների ներկայացուցիչների, ներդրողների և փորձագետների մասնակցությամբ:
Ինչպես հայտարարել է Եղիազարյանը, Հայաստանում ապահովագրության ոլորտը դեռևս առաջատար դիրքեր չի զբաղեցնում ֆինանսական համակարգում, սակայն ճյուղի զարգացման համար կարևոր է ընդլայնել թվային տեխնոլոգիաների և արհեստական բանականության կիրառումը:
Հասանն իր հերթին հայտնել է, որ InsureTek Armenia 2026 համաժողովին նախատեսվում է ոչ միայն տեղական ապահովագրական շուկայի ներկայացուցիչների, այլև միջազգային մասնագետների մասնակցությունը:
«Մենք Հայաստանը դիտարկում ենք որպես կարևոր ուղղություն ապահովագրության ոլորտում տարածաշրջանային ու միջազգային երկխոսության և նորարարությունների համար: Երկրում աճում է ոլորտի կարևորության գիտակցումը, իրականացվում են բազմաթիվ նախագծեր, ինչը մենք շատ ենք ողջունում: Տեսնում ենք գաղափարներ ու նախաձեռնություններ, որոնք պետք է դուրս բերվեն նոր մակարդակի», – ասել է Հասանը:
GAIP-ի մասին
InsurTech մասնագետների համաշխարհային ասոցիացիան (Global Association of InsurTech Professionals) միջազգային նորարարական կազմակերպություն է, որի գործունեությունն ուղղված է ապահովագրական ոլորտում տեխնոլոգիաների և նորարարությունների զարգացմանը:
GAIP-ի կենտրոնակայանը գտնվում է Դուբայում: Ասոցիացիան միավորում է ապահովագրության և տեխնոլոգիաների ոլորտի մասնագետներին՝ զարգացնելով համագործակցությունը, խթանելով հետազոտությունները և ներդնելով լավագույն փորձը ողջ ապահովագրական էկոհամակարգում: