Երեւանի քաղաքապետարանը 17 միլիոն դրամ է հատկացրել Լոնդոնի բլոգերներին գիշերակացով եւ սննդով ապահովելու համար։
Զբոսաշրջության կոմիտեի պաշտոնական էջից տեղեկանում ենք, թե ինչի մասին է խոսքը. «Մայիսի 9-ին, Երևան–Լոնդոն ուղիղ չվերթի մեկնարկին ընդառաջ, ՀՀ ԷՆ Զբոսաշրջության կոմիտեի և «Վիզ Էյր» ավիաընկերության համագործակցությամբ իրականացվող «Let’s Get Lost» արշավի շրջանակում Հայաստան ժամանեց «կորած» ինքնաթիռը՝ 100 բրիտանացի հյուրերով, լրագրողներով և սոցիալական հարթակներում հայտնի անձանցով (ինֆլուենսերներով)։
«Let’s Get Lost» արշավը «Վիզ Էյր» ավիաընկերության ամենամյա հատուկ նախաձեռնությունն է, որի շրջանակում մասնակիցները մեկնում են ճամփորդության՝ առանց նախապես տեղեկանալու իրենց վերջնական ուղղության մասին։ Այս տարի «կորած» ինքնաթիռը վայրէջք կատարեց Հայաստանում՝ հնարավորություն ընձեռելով հյուրերին բացահայտելու մեր երկրի հարուստ մշակույթը, համեղ խոհանոցը և անմոռանալի փորձառությունները»:
Մինչդեռ Երեւանի քաղաքապետի «գումար հատկացնելու» որոշման մեջ նշվում է 160 հյուրի մասին. ««Տուրիզմի Հայկական ֆեդերացիա» ՀԿ-ին հատկացնել 17000.0 հազար (տասնյոթ միլիոն) ՀՀ դրամ՝ ս.թ մայիս ամսին ՀՀ Էկոնոմիկայի նախարարության և Զբոսաշրջության կոմիտեի կողմից «Wizz Air» միջազգային ավիաընկերության հետ համատեղ իրականացվող և համաշխարհային շուկայում Հայաստանի և հայկական զբոսաշրջային արդյունքի պատշաճ ներկայացմանն ու խթանմանը նպաստող նախաձեռնության շրջանակում ՀՀ այցելող շուրջ 160 հյուրերի՝
Երևան քաղաքում գիշերակացի և հյուրընկալության ապահովման համար ֆինանսական
աջակցություն ցուցաբերելու նպատակով»: