«Արցախցիներից յուրաքանչյուրը պետք է անհատական դիմում ներկայացնի, որովհետև առկա դատական որոշումը համընդհանուր տարածելի չէ»,- լրագրողների հետ զրույցում հայտարարեց սահմանադրագետ Գոհար Մելոյանը՝ անդրադառնալով արցախցիների իրավունքներին վերաբերող դատական գործընթացներին։
Նրա խոսքով՝ թեև առկա է դրական դատական որոշում, այն իրավական տեսանկյունից ավտոմատ կերպով չի տարածվում բոլոր արցախցիների վրա։
«Շատ դատական գործեր կան, բայց, ցավոք սրտի, առաջին ատյանի դատարանի տվյալ որոշումը իրավական տեսանկյունից տարածելի չէ բոլոր արցախցիների վրա։ Եթե նման գործ կա, միևնույն է, նրանցից յուրաքանչյուրը պետք է իր գործով անհատական դիմում ներկայացնի»,- նշեց Մելոյանը։
Անդրադառնալով նախորդ օրը Միգրացիայի և քաղաքացիության ծառայության տարածած հայտարարությանը՝ նա ընդգծեց, որ տվյալ որոշումը նախադեպային ուժ չունի։
«Դա կոնկրետ գործով կայացված որոշում է և համընդհանուր տարածելի չէ։ Այն նախադեպ չի դառնում բոլորի համար»,- ասաց նա։
Միաժամանակ Մելոյանը պատրաստակամություն հայտնեց իրավական աջակցություն ցուցաբերել արցախցիներին՝ նշելով, որ փաստաբանական համայնքը ևս պատրաստ կլինի աջակցել։
«Ես պատրաստակամ եմ իրավական աջակցություն ցուցաբերելու, և կարծում եմ՝ մեր իրավական ու փաստաբանական համայնքից շատերը ևս պատրաստ կլինեն աջակցել արցախցիներին, եթե դրա նպատակն ու ցանկությունը լինի»,- ընդգծեց նա։