Լիբանանի հարավում «Հեզբոլլահի» անօդաչու թռչող սարքի հարձակման հետևանքով երկու իսրայելցի զինծառայող է վիրավորվել։ Այս մասին հայտնել է Իսրայելի պաշտպանության բանակը՝ հստակեցնելով, որ նրանց վնասվածքները գնահատվում են թեթև։
Զինվորականների տվյալներով՝ միջադեպը տեղի է ունեցել առավոտյան՝ սահմանամերձ շրջանում ընթացող մարտական գործողությունների ժամանակ։
Ավելի վաղ հաղորդվել էր, որ հանգստյան օրերին սպանվել է ևս երկու իսրայելցի զինվոր, ինչի հետևանքով երեք ամիս առաջ մարտերի վերսկսումից ի վեր զոհված զինվորականների ընդհանուր թիվը հասել է 26-ի։ Նաև, բանակի տվյալներով, այս ժամանակահատվածում զոհվել է Իսրայելի չորս խաղաղ բնակիչ։
Նշվում է, որ «Հեզբոլլահը» կիրառում է օպտիկամանրաթելային կաբելներով կառավարվող անօդաչու սարքեր, որոնք, ինչպես պնդում են, ընդունակ են շրջանցել ռադիոէլեկտրոնային հայտնաբերման համակարգերը։