Իրանի արտգործնախարարությունը խստորեն դատապարտել է Միացյալ Նահանգների իրականացրած «ագրեսիայի գործողությունները» Հորմուզի նեղուցում իրանական նավթային լցանավի և Քեշմ կղզում հեռահաղորդակցության աշտարակի դեմ՝ նախազգուշացնելով, որ Իսլամական Հանրապետությունը գործի կդնի «բոլոր հնարավոր կարողությունները» իր տարածքային ամբողջականությունն ու ազգային ինքնիշխանությունը պաշտպանելու համար։
Իրանի արտաքին քաղաքական գերատեսչությունը հայտնել է, որ հարձակումներն իրականացվել են վաղ առավոտյան՝ տարածաշրջանի երկու երկրների տարածքից։ ԱԳՆ-ում ընդգծել են, որ այդ հարձակումները ապրիլի 8-ի հրադադարի համաձայնագրի կոպտագույն խախտում են, ինչպես նաև միջազգային իրավունքի և Միավորված ազգերի կազմակերպության Կանոնադրության 2-րդ հոդվածի 4-րդ կետի ակնհայտ խախտում, որն արգելում է ուժի կիրառումը։
Հայտարարության մեջ դատապարտվում է նաև Միացյալ Նահանգների՝ տարածաշրջանային պետությունների տարածքների և օբյեկտների «գաղութատիրական օգտագործումը» Իրանի դեմ թշնամական գործողություններ իրականացնելու նպատակով։ Արտաքին գործերի նախարարությունը հատուկ մատնանշել է Քուվեյթի և Բահրեյնի ղեկավարների «ուղղակի և ակնհայտ պատասխանատվությունը» գիշերային հարձակումների համար։
ԻԻՀ ԱԳՆ-ում ընդգծել են, որ ցանկացած երկիր, որը թույլ է տալիս օգտագործել իր հողը, օդային տարածքը, ջրերը կամ ռազմական օբյեկտները Իրանի դեմ ագրեսիային աջակցելու համար, խախտում է միջազգային իրավունքի և բարիդրացիության հիմնարար սկզբունքները։ Նման գործողությունները համապատասխանում են ագրեսիայի սահմանմանը, որը շարադրված է ՄԱԿ-ի Գլխավոր ասամբլեայի 3314 բանաձևում։
Իրանը վերստին հայտարարել է, որ իրեն է վերապահում ինքնապաշտպանության անօտարելի իրավունքը՝ ներառյալ թշնամական հարձակումների աղբյուրներին և տեղակայման վայրերին հարվածներ հասցնելը։
Ավելի վաղ՝ չորեքշաբթի, Իսլամական հեղափոխության պահապանների կորպուսը (ԻՀՊԿ) հայտարարել էր, որ իր Ռազմատիեզերական ուժերը հրթիռային և անօդաչու թռչող սարքերի հարվածներ են հասցրել ԱՄՆ ռազմածովային ուժերի Հնգերորդ նավատորմի շտաբ-բնակարանին՝ ի պատասխան իրանական օբյեկտների վրա կատարված հարձակումների։