Հայաստանի ազգային հավաքականի և սերբական «Ցրվենա Զվեզդայի» պաշտպան Նաիր Թիկնիզյանը հայտնվել է եվրոպական առաջատար ակումբների ուշադրության կենտրոնում:
Այս տեղեկությունը «Sport-Express» պարբերականի հետ զրույցում հաստատել է 27-ամյա ֆուտբոլիստի շահերը ներկայացնող գործակալ Ալեքսանդր Կլյուևը:
Ավելի վաղ հայտնի մարզական լրագրող Էքրեմ Քոնուրը հայտնել էր, որ հայ խաղացողի ծառայություններով ակտիվորեն հետաքրքրված են իտալական «Կոմոն» և ֆրանսիական «Լանսը»:
«Նաիրի նկատմամբ իսկապես կա հետաքրքրություն եվրոպական թոփ-5 լիգաները ներկայացնող ակումբների կողմից: Ինչ վերաբերում է Հայաստանի ազգային հավաքականի հանդիպումներին սկաուտների հնարավոր ներկայությանը, ապա այդ մասին ոչինչ ասել չեմ կարող»,- նշել է Կլյուևը:
Հիշեցնենք, որ Նաիր Թիկնիզյանը մոսկովյան «Լոկոմոտիվից» «Ցրվենա Զվեզդա» է տեղափոխվել 2025 թվականի հուլիսի 1-ին: 2025/26 մրցաշրջանում բելգրադյան թիմի կազմում անցկացրած 47 հանդիպումներում պաշտպանը դարձել է 1 գոլի և 7 գոլային փոխանցման հեղինակ՝ թիմի հետ հռչակվելով Սերբիայի չեմպիոն:
Թիկնիզյանի գործող համաձայնագիրն ակումբի հետ ուժի մեջ է մինչև 2028 թվականի հունիսի 30-ը: Ըստ Transfermarkt պորտալի՝ հայ ֆուտբոլիստի տրանսֆերային արժեքը գնահատվում է 7 միլիոն եվրո: