Ատոմային էներգիայի միջազգային գործակալության (ԱԷՄԳ) Կառավարիչների խորհուրդը հավանություն է տվել բանաձևին, որը Իրանին պարտավորեցնում է բացահայտել տեղեկություններն իր հարստացված ուրանի պաշարների մասին և ապահովել գործակալության տեսուչներին հասանելիությունն այդ տվյալների ստուգման համար։
ԱԷՄԳ-ից հայտարարել են, որ որոշումը հրատապ բնույթ ունի և ուղղված է երկրի միջուկային ծրագրի նկատմամբ վերահսկողության ուժեղացմանը։ Կազմակերպությունն ընդգծել է տեսուչների լիակատար հասանելիության անհրաժեշտությունը բոլոր այն օբյեկտներին և տեղեկությանը, որոնք անհրաժեշտ են մշտադիտարկման համար։
Փաստաթղթի նախաձեռնողներն են հանդես եկել ԱՄՆ-ն, Միացյալ Թագավորությունը, Ֆրանսիան և Գերմանիան։ Բանաձևին կողմ է քվեարկել 21 պետություն, դեմ են արտահայտվել Ռուսաստանը, Չինաստանը և Նիգերը, տասը երկիր էլ ձեռնպահ է մնացել։
Ի պատասխան՝ Իրանի ներկայացուցիչները խիստ քննադատության են ենթարկել որոշումը՝ այն անվանելով քաղաքականապես կանխակալ և գործակալության մասնագիտական գործունեության հետ առնչություն չունեցող։