ԱՄՆ-ի Մերիլենդ նահանգում ավարտվել է որոնողափրկարարական գործողությունը մասնավոր ինքնաթիռի անհետացումից հետո․ Բոուի քաղաքի բնակելի թաղամասից ոչ հեռու գտնվող անտառապատ տարածքում հայտնաբերվել են բեկորներն ու օդանավում գտնվող երեք մարդկանց մարմինները, հայտնում է ABC News-ը։
Մերիլենդ նահանգի ոստիկանության տվյալներով, զոհվել են Piper Cherokee թեթև մեկշարժիչանի ինքնաթիռի օդաչուն և երկու ուղևորները։ Բոլոր երեք չափահաս տղամարդիկ տեղում մահացած են ճանաչվել այն բանից հետո, երբ փրկարարները ԱՄՆ մայրաքաղաք Վաշինգտոնից ոչ հեռու գտնվող անտառում հայտնաբերել են կործանման վայրը։
Զոհվածների անունները դեռևս չեն հրապարակվում․ իշխանությունները սպասում են հարազատների ծանուցմանը։
Իրավապահ մարմինները հայտնում են, որ ինքնաթիռը, ամենայն հավանականությամբ, պատկանել է Մոնտգոմերի շրջանի տեղական ավիացիոն դպրոցին և կարող էր ուսումնական թռիչք կատարել։ Ինքնաթիռը շաբաթ օրը տեղական ժամանակով մոտ 23:30-ին թռել է Օուշեն Սիթիից (Նյու Ջերսի) և ուղևորվել Մերիլենդի Մոնտգոմերի Քաունթի օդանավակայան։
Մոտավորապես 15 րոպե անց թռիչքից հետո Փրինս Ջորջի շրջանի արտակարգ ծառայությունները iPhone-ից ստացել են վթարային ազդանշան, որը մատնանշել է հնարավոր կործանում Բոուիի շրջանում՝ 50 և 301 մայրուղիների խաչմերուկի մոտ։
Դրանից հետո անմիջապես կազմակերպվել է ցամաքային և օդային որոնողական գործողություն՝ մի քանի ծառայությունների մասնակցությամբ։
Վայրը, որտեղ ընկել է ինքնաթիռը, գտնվում է բնակելի կառուցապատման անմիջական հարևանությամբ, սակայն, ըստ ոստիկանության տվյալների, գետնի վրա ոչ ոք չի տուժել։
Աղետի պատճառները պարզում են ԱՄՆ Տրանսպորտի անվտանգության ազգային խորհուրդը (NTSB) և ԱՄՆ Դաշնային ավիացիոն վարչությունը (FAA)։