ԱՄՆ բանակը ծրագրում է առաջիկա չորսից վեց շաբաթվա ընթացքում երկրի տարածքում ստեղծել առնվազն երկու ռազմադաշտ, որոնք կմոդելավորեն Ուկրաինայի մարտի դաշտին նմանվող իրատեսական պայմաններ։ Նախագծի մասին հայտնել է բանակի նախարար Դեն Դրիսկոլը, հաղորդում է CBS News-ը։
Նա նշել է, որ այդ հարթակներում հնարավոր կլինի վերստեղծել ռադիոէլեկտրոնային պայքարի համակարգերի և «վիճարկելի միջավայրի» պայմաններ, ինչպես նաև անցկացնել անօդաչու թռչող սարքերի ու դրանց հակազդման համակարգերի մշակողների համատեղ փորձարկումներ։ Նա հավելել է, որ զինծառայողները ևս կկարողանան մարզվել այդ ռազմադաշտերում՝ անմիջականորեն փոխգործակցելով տեխնոլոգիաների մշակողների հետ։
Դրիսկոլը հավելել է, որ ԱՄՆ-ում արդեն իսկ գոյություն ունեն անվտանգ թեստավորման վայրեր, սակայն բանակը դիտարկում է նաև երկրի սահմաններից դուրս արտասահմանյան ռազմադաշտերի ստեղծման հնարավորությունը՝ առավել «ագրեսիվ փորձարկումների», դրանց թվում՝ գերձայնային համակարգերի թեստավորման համար։ Միևնույն ժամանակ, նա հրաժարվել է հստակեցնել նման օբյեկտների հնարավոր տեղակայումը՝ վկայակոչելով պլանավորման վաղ փուլը։
Ամերիկյան զինվորականների՝ անօդաչուների դեմ պայքարի ընթացիկ պատրաստության մի մասը, ըստ CBS News-ի տվյալների, չի ներառում ռադիոէլեկտրոնային ճնշումը, քանի որ երկրի ներսում խլացուցիչ համակարգերի կիրառումը սահմանափակված է ԱՄՆ օրենսդրությամբ։
Այդ հայտարարությունները հնչել են պաշտպանական արդյունաբերության ներկայացուցիչների հետ հանդիպման ժամանակ, որը կազմակերպել էր բանակը՝ անօդաչուների և հրթիռների որսման համակարգերում Պենտագոնի կարիքների քննարկման շրջանակում։
Բանակի ռազմավարական սպառնալիքների գրասենյակի ներկայացուցիչ Դվեյն Հեյզը հայտնել է, որ Ռուսաստանն ամսական արտադրում է մոտ 3-5 հազար Shahed տիպի հարվածային անօդաչու սարք և շուրջ 600 հազար ավելի փոքր FPV-դրոն։ Ի պատասխան, ըստ նրա, Ուկրաինան ամեն ամիս թողարկում է մոտ 30 հազար որսացող անօդաչու սարք։
Հեյզը նշել է, որ ԱՄՆ-ն ուժեղ է բարձր ճշգրտության և թանկարժեք սպառազինությունների արտադրության մեջ, մասնավորապես՝ Patriot և THAAD համակարգերը, որոնց մեկ հրթիռի արժեքը հասնում է մինչև 4-5 միլիոն դոլարի, սակայն ժամանակակից հակամարտություններում անհրաժեշտ են նաև ավելի էժան որսիչներ, որոնք պիտանի կլինեն հյուծման պատերազմում զանգվածային կիրառման համար։
Ուկրաինայի պատերազմի և Իրանի հետ հակամարտության ֆոնին ԱՄՆ պաշտպանական ոլորտում ուժեղացել է ուշադրությունը սպառազինությունների արտադրության արագության և արժեքի հարցերին։ Նախագահ Դոնալդ Թրամփը հանդիպումներ է անցկացրել խոշոր պաշտպանական ընկերությունների հետ և մոտ ժամանակներս ծրագրում է նոր քննարկումներ նրանց հետ։
Պենտագոնը զուգահեռաբար առաջարկներ է հայցում ընկերությունների ավելի լայն շրջանակից՝ էժան որսման համակարգերի մշակման համար, որոնք կարող են լրացնել գոյություն ունեցող բարձր ճշգրտության համալիրները։
Դրիսկոլն ընդգծել է, որ նոր լուծումները չեն փոխարինի գործող համակարգերին, այլ կլրացնեն դրանք՝ դրանք համեմատելով բանակի զինանոցում եղած Ferrari-ի հետ, որին անհրաժեշտ են նաև ավելի զանգվածային և էժան նմանակներ։