Telegram հարթակի հիմնադիր Պավել Դուրովը ժամանել է Թբիլիսի։ Գործարարի հետ համատեղ լուսանկար է հրապարակել իշխող «Վրացական երազանք» կուսակցության խորհրդարանի պատգամավոր Վակո Տուրնավան, հաղորդում է «Նովոստի-Գրուզիա»-ն։
Դուրովի այցի մասին տեղեկությունը նախօրեին հայտնվել էր ռուսական թելեգրամյան ալիքներում, սակայն նրա Վրաստան կատարած ուղևորության պաշտոնական նպատակները դեռևս չեն բացահայտվում։
37-ամյա Տուրնավան նախքան 2024 թվականին քաղաքականություն մուտք գործելը հայտնի էր որպես տեխնոլոգիական գործարար։ Նրա հիմնադրած ընկերությունները գործում են էլեկտրոնային վճարումների և ֆինանսատեխնիկական լուծումների ոլորտում։ Դատելով սոցիալական ցանցերում նրա արած հրապարակումներից՝ Դուրովի հետ հանդիպմանը մասնակցել է նաև «Վրացական երազանքի» գլխավոր քարտուղար, Թբիլիսիի քաղաքապետ Կախա Կալաձեն։
«Ես հյուրընկալում եմ Պավել Դուրովին Թբիլիսիում և նրան ծանոթացնում Վրաստանի ՏՏ ոլորտի ներդրումային ներուժին»,- Business Insider Georgia-ին տված մեկնաբանության մեջ հայտարարել է Տուրնավան։
Վրաստանի վարչապետ Իրակլի Կոբախիձեն, պատասխանելով այցի բնույթի մասին հարցին, նշել է, որ Դուրովը երկրում է որպես մասնավոր անձ։
«Պարոն Դուրովը գործարար է։ Նա չի կարող պաշտոնական այց կատարել։ Մենք ողջունում ենք ցանկացած հաջողակ գործարարի գալուստը Վրաստան»,- ասել է Կոբախիձեն։
Ընդդիմադիր TV Pirveli հեռուստաալիքը, որը Դուրովին անվանում է «ռուս միլիարդատեր», ենթադրել է, որ այցը կարող է կապված լինել կրիպտոարժութային նախագծերի և «Ռուսաստանից «սև փողերի» հնարավոր ներհոսքի» հետ։ Ընդսմին, այդ վարկածի վերաբերյալ որևէ ապացույց չի ներկայացվում։