«Գազպրոմ»-ի բաժնետոմսերը հասել են վերջին գրեթե 18 տարվա ամենացածր մակարդակին։ Հուլիսի 15-ի առևտրային օրվա ավարտին մեկ բաժնետոմսի արժեքը կազմել է 88,44 ռուբլի, իսկ հուլիսի 16-ի առևտրի բացմանը նվազել է մինչև 86,80 ռուբլի։
Վերջին անգամ ընկերության բաժնետոմսերի գինը 90 ռուբլուց ցածր էր եղել 2008 թվականի նոյեմբերի 20-ին, իսկ նույն տարվա հոկտեմբերին այն հասել էր 84 ռուբլու մեկ բաժնետոմսի դիմաց։
Բաժնետոմսերի վրա ճնշում են գործադրում ամերիկյան լրատվամիջոցների հրապարակումները, ըստ որոնց՝ ԱՄՆ-ը կարող է ներմուծման մաքսատուրքեր սահմանել այն երկրների նկատմամբ, որոնք ռուսական գազի խոշոր գնորդներ են։
Բացասական ազդեցություն են ունեցել նաև տեղեկությունները, թե գարնանից դադարեցվել են Չինաստանի հետ «Սիբիրի ուժ-2» գազատարի կառուցման շուրջ բանակցությունները։
Հիշեցնենք, որ «Գազպրոմ»-ը չորրորդ տարին անընդմեջ շահաբաժիններ չի վճարում բաժնետերերին։ 2025 թվականի արդյունքներով ընկերության զուտ շահույթը, հաշվարկված Ֆինանսական հաշվետվությունների միջազգային ստանդարտների (IFRS) համաձայն, աճել է 7%-ով՝ հասնելով 1,307 տրիլիոն ռուբլու։
Միևնույն ժամանակ, ընկերության պարտքային բեռը վատթարացել է․ զուտ պարտք/EBITDA ցուցանիշը բարձրացել է մինչև 2,07։ Այս պայմաններում տնօրենների խորհուրդը խորհուրդ է տվել շահաբաժիններ չվճարել, և բաժնետերերի տարեկան ժողովը հաստատել է այդ որոշումը։