Ռուս միլիարդատերերն ու խոշոր գործարարները սկսել են հապշտապ կերպով իրենց ակտիվները տեղափոխել արտասահման՝ երկրից դուրս բերելով տասնյակ միլիարդավոր դոլարներ՝ տնտեսության վատթարացող վիճակի և սեփական գույքի անվտանգության նկատմամբ ունեցած լուրջ մտահոգությունների պատճառով։
Ինչպես հաղորդում է DW-ն, բիզնես էլիտան խորապես անհանգստացած է Ռուսաստանում բյուջետային աճող ճեղքվածքներով և պետության կողմից մասնավոր գույքի բռնագրավման աղմկահարույց դեպքերով, ինչն էլ ստիպում է նրանց փրկել սեփական միջոցները հնարավոր ազգայնացումից։
Աղբյուրների փոխանցմամբ՝ հսկայական կապիտալը երկրից դուրս բերելու համար օլիգարխներն ակտիվորեն օգտագործում են կրիպտոարժույթներ, ոսկի, արտասահմանյան անշարժ գույք և մասնավոր ներդրման ֆոնդեր՝ հիմնականում թիրախավորելով Պարսից ծոցի երկրները։
Խոշորագույն բռնագրավումների թվում առանձնանում է Ռուսագրոյի հիմնադիր Վադիմ Մոշկովիչի ակտիվների, բաժնետոմսերի ու հաշիվների պետականացումը, իսկ ընդհանուր առմամբ, ՌԴ գլխավոր դատախազության տվյալներով, միայն 2024 թվականին պետության օգտին բռնագրավվել է շուրջ 2.4 տրիլիոն ռուբլի արժողությամբ մասնավոր գույք, ինչն էլ, ըստ փորձագետների, դարձել է Ռուսաստանից կապիտալի փախուստի պատմական աճի գլխավոր խթանը։