Հարավային Կորեայի դատախազությունը մեկ տարվա ազատազրկում է պահանջել Սեուլում գտնվող Michelin-ի երկու աստղ ունեցող հայտնի ռեստորանի սեփականատիրոջ համար, ով մեղադրվում է աղանդերների ձևավորման մեջ օրենքով արգելված մրջյուններ օգտագործելու համար։
Ինչպես հաղորդում է Meduza-ն, տեղական օրենսդրությամբ խոհարարության մեջ թույլատրված է օգտագործել միջատների ընդամենը 10 տեսակ, որոնց ցանկում մրջյունները ներառված չեն, ինչն էլ հիմք է դարձել քրեական հետապնդման համար։
Բացի իրավական արգելքը խախտելուց, առողջապահական մարմինների ստուգումները ցույց են տվել, որ ռեստորանում օգտագործված մրջյուններում ծանր մետաղների կոնցենտրացիան 55 անգամ գերազանցել է սովորական ուտելի միջատների համար թույլատրելի նորման։ Թեև ռեստորանի անունը պաշտոնապես չի հրապարակվում, հայտնի է, որ դրա սեփականատերն ու խոհարարը մասնակցել են Netflix-ի հարավկորեական Culinary Class Wars հանրահայտ խոհարարական շոուին։