Իրանի ԱԳՆ պաշտոնական ներկայացուցիչ Իսմայիլ Բաղային մեկնաբանել է ԱՄՆ Կենտրոնական հրամանատարության (CENTCOM) ղեկավարի հայտարարությունը։ Նա այդ մասին գրել է X սոցիալական ցանցում։
Նրա խոսքով՝ CENTCOM-ի ղեկավարը բացահայտ հայտարարել է, որ Արաբական Միացյալ Էմիրությունները, Բահրեյնը, Կատարը, Քուվեյթը, Սաուդյան Արաբիան և Հորդանանը մասնակցում են Իրանի դեմ ԱՄՆ ռազմական գործողություններին։
«Եթե ԱՄՆ այս պնդումը չի համապատասխանում իրականությանը, ապա նշյալ երկրները պետք է պաշտոնապես և բացահայտ հերքեն դա»,- ընդգծել է Բաղային։
Իրանի ԱԳՆ ներկայացուցիչը հայտարարել է, որ եթե այս պայմաններում Թեհրանը, իրացնելով ինքնապաշտպանության իր օրինական իրավունքը, հարված հասցնի այդ երկրների տարածքներում տեղակայված ԱՄՆ ռազմաբազաներին և օբյեկտներին, ապա «Ինչո՞ւ Իրանը դա արեց» հարցը կլինի անազնիվ և անհիմն։
Բաղային նշել է, որ տարածաշրջանում անվտանգության ներկայիս ճգնաժամի և պատերազմի հիմնական պատճառը ԱՄՆ–ի և Իսրայելի կողմից Իրանի վրա շարունակվող հարձակումներն են։
Նա հավելել է, որ թույլ տալով իրենց տարածքը օգտագործել Իրանի դեմ ԱՄՆ ռազմական գործողությունների համար, այդ երկրները, համաձայն ՄԱԿ–ի Գլխավոր ասամբլեայի №3314 «Ագրեսիայի սահմանում» բանաձևի, իրենք են կատարում ագրեսիայի ակտ: Նրա խոսքով՝ նման գործողությունները խախտում են նաև բարիդրացիության սկզբունքը և ՄԱԿ–ի կանոնադրության 2-րդ հոդվածի 4-րդ կետը:
Եզրափակելով՝ իրանցի պաշտոնյան ընդգծել է, որ իր երկրի ինքնապաշտպանության լեգիտիմ միջոցները նպատակ ունեն վերականգնելու անվտանգությունն ու կայունությունը ամբողջ տարածաշրջանում: