ԱՄՆ-ի Վաշինգտոն նահանգում ձերբակալվել է Սփոքանի 37-ամյա բնակիչ, որին կասկածում են քաղաքի շրջանը պատած երեք խոշոր հրդեհներից ամենամեծը հրկիզելու մեջ, հայտնում է CBS News-ը։
Աարոն Ֆարինաչչին ձերբակալվել է Old Trails Fire հրդեհի հետ կապված առաջին աստիճանի դիտավորյալ հրկիզման կասկածանքով։ Նրան կալանքի տակ են վերցրել՝ 1 միլիոն դոլար գրավով, հայտնել են Սփոքան շրջանի շերիֆի գրասենյակից։
Ըստ շերիֆ Ջոն Նոուլզի՝ հետաքննությունը սկսվել է այն բանից հետո, երբ ականատեսը հայտնել է, որ տեսել է մի տղամարդու, որը ծնկել էր խոտի մոտ՝ հրդեհի բռնկման վայրում։ Ձերբակալության պահին Ֆարինաչչիի մոտ հայտնաբերվել են ջրակայուն լուցկիներ և գազային կրակայրիչ։
Իշխանություններն ընդգծել են, որ նրան մեղադրանք է առաջադրվել միայն Old Trails Fire հրդեհի գործով։ Տղամարդը նախկինում դատված է եղել անզգուշությամբ սպանության համար։
Սփոքանի շրջանում երեք հրդեհի պատճառով տարհանվել է մոտ 67 հազար մարդ։ Իշխանությունների տվյալներով՝ ոչնչացվել է ավելի քան 700 շենք, ևս մոտ 400 օբյեկտ դեռևս չեն ուսումնասիրվել։
«Մեր բոլոր հիշողություններն անհետացան»,- պատմել է տեղացի բնակչուհի Աննա Անդրեաչին, որի տունը այրվել է կրակից։
Վաշինգտոն նահանգի նահանգապետ Բոբ Ֆերգյուսոնը տեղի ունեցածն անվանել է «հավանաբար Սփոքանի պատմության ամենախոշոր բնական աղետը»։
Հրդեհները սկսվել են շաբաթ օրը՝ ուժեղ երաշտի, ծայրահեղ շոգի և պոռթկուն քամու ֆոնին։ Երեքշաբթի օրվա դրությամբ զոհերի մասին տեղեկություններ չեն ստացվել։ Բոլոր 14 բնակիչները, որոնց ավելի վաղ անհետ կորած էին համարում, հայտնաբերվել են։
Old Trails Fire և Fairview Fire հրդեհները շարունակվում են։ Փրկարարները շաբաթվա կեսերից սպասում են պայմանների վատթարացման՝ ջերմաստիճանի նոր բարձրացման պատճառով։
Հրշեջ ծառայությունների ներկայացուցիչների խոսքով՝ իրավիճակը բարդանում է նրանով, որ հրդեհները տեղի են ունենում այն գոտում, որտեղ բնակելի թաղամասերը սահմանակցում են անտառներին և չոր տարածքներին։ Իշխանությունները նշում են, որ հուլիսը տարածաշրջանում անցել է գրեթե առանց անձրևների, ինչի հետևանքով բուսականությունը դարձել է ծայրահեղ հրդեհավտանգ։
Ընթացիկ սեզոնը համարվում է ԱՄՆ-ի հյուսիս-արևմուտքի համար վերջին երեք տասնամյակի ամենածանրերից մեկը։ Վաշինգտոն նահանգում միաժամանակ մոլեգնում է առնվազն 16 խոշոր հրդեհ։