ՀՀ վարչապետի պաշտոնը զբաղեցնող անձն այնքան ասաց, որ կարևորը ոչ թե ԵՄ մտնելն է, այլ եվրոպական չափանիշներին համապատասխանելը, որ եվրոպացիք համարյա թե պատասխանեցին, թե մենք էլ էն գլխից միտք չունեինք մոտ ապագայում ձեզ ընդունել: Ռուսներն են, որ դա չեն «ուզում» հասկանալ ու Նիկոլից անընդհատ պահանջում են, որպեսզի ԵՄ-ի կամ ԵԱՏՄ-ի միջև ընտրություն կատարելու հանրաքվե անցկացնի: Խեղճ «հարիֆն» ինչ հիմքով անցկացնի, եթե ԵՄ-ից հրավեր չկա: Բայց այդ դեպքում հարց է ծագում, թե ինչո՞ւ բոբկացավ առանց ջուրը տեսնելու ու ԵՄ մուտքի առումով, թեկուզ անիմաստ, օրենք ընդունեց: Պատասխանեմ՝ որովհետև տեսավ, թե ինչ հեշտությամբ այդ հարցով ստորագրահավաք անցկացվեց: Ու հասկացավ, որ դա, այլ գործոնների հետ համատեղ, կլինի նախընտրական քարոզչության ընթացքում ընտրողներին մանիպուլյացնելու արդյունավետ գործիք:
Բայց այնպես չէ, որ ռուսները սխալ են: Նրանք իրավացիորեն պահանջում են, որպեսզի ինքն, այնուամենայնիվ, կողմնորոշվի՝ անկախ այն հանգամանքից, մեզ սպասում, թե չեն սպասում ԵՄ-ում: Հատկապես որ չկողմնորոշվելը ոչ թե իրենց, այլ հօգուտ Նիկոլի է աշխատում: Իսկ սահմանափակումները գործում են ընդդեմ հայաստանյան արտադրողների: Դրանք հարվածում են հենց մեր տնտեսությանը, բայց դա իրենց չի հուզում: Ինչո՞ւ պիտի հուզի, եթե ՌԴ-ում գյուղմթերքի վաճառքից գումար աշխատելով՝ իշխանությունը բարեկամություն է անում Ռուսաստանին թշնամի Եվրամիության երկրների հետ: Նույնիսկ կենցաղային մակարդակում հասկանալի չէր կարող լինել իրար թշնամի երկու ճամբարի միջև խաղեր տալու՝ նիկոլական վարքը: Նույնիսկ Բաքվի բռնապետը, որ թշնամություն է անում Ռուսաստանի հետ, արտաքնապես ՌԴ նախագահի հետ ավելի նորմալ հարաբերություններ ունի, քան հայաստանյան, այսպես կոչված, հզոր վարչապետը:
Ինչևէ, այսօր «Հրապարակ»-ին հայտնի է դարձել, որ հուլիսի կեսերին որոշված՝ 5 մլրդ դրամի պարգևավճարները բաժանվելու են թաքուն: Ասվել է, որ նույնիսկ նախարարություններում տեղյակ չեն լինելու՝ թե որ պաշտոնյային որքան գումար է հատկացվելու: Չգիտեմ, դա համապատասխանում է եվրոպական չափանիշներին, թե ոչ: Հիշելով, որ «հայաստանիների աղքատությունը նրանց գլխում է»՝ ինչպես ասել է վարչապետի աթոռից կառչած անձը, ենթադրում եմ, որ եվրոպական չափանիշներով տարված իշխանությունը պետք է որ այդ երևույթը փոխառնած լիներ այնտեղից:
Ճիշտ է, դա հակասում է երկրի կառավարման թափանցիկության և մասնակցայնության սկզբունքին, բայց դա ի՜նչ կարևոր է՝ երբ խնդիր է դրված համապատասխանեցնել մեր մարդկանց մտածողությունը եվրոպական չափանիշներին: Ի դեպ, նշված հարցի առումով «Հրապարակ»-ին հայտնի է դարձել, որ գերատեսչությունների աշխատակազմը խիստ զգուշացվել է, որ պարգևավճարի չափը պետք է գաղտնի պահել, այլապես ստիպված են լինելու աշխատանքից ազատվելու դիմումներ գրել։ Այս մեկը, որքան հասկանում եմ, հաստատ համապատասխանում է եվրոպական չափանիշներին: Քանի որ եթե այդպես չլիներ, ապա թե՛ Եվրամիությունը և թե՛ եվրոպական առանձին երկրները վաղուց էին ձեռ քաշել ժողովրդավարության անվան ներքո բռնապետություն հաստատած ղեկավարից: Որքան էլ նրա վարած քաղաքականությունը համապատասխաներ իրենց աշխարհաքաղաքական շահերին: