Իտալական ոստիկանությունը հայտնի հետաքննող լրագրող Սիջֆրիդո Ռանուչչիի տան մոտ տեղի ունեցած պայթյունի ենթադրյալ պատվիրատու է անվանել գործարար Վալտեր Լավիտոլային, որը նախկինում մոտ է եղել երկրի նախկին վարչապետ Սիլվիո Բեռլուսկոնիին, գրում է CBS News-ը։
Հռոմի կարաբիներները հայտնել են Լավիտոլայի ձերբակալության մասին՝ անցած տարվա հոկտեմբերին տեղի ունեցած հարձակման կազմակերպման կասկածանքով։ Պայթյունը տեղի է ունեցել Ռանուչչիի տան մոտ՝ Հռոմից մոտ 20 կմ հարավ գտնվող Պոմեցիա քաղաքում, և ոչնչացրել է լրագրողի երկու ավտոմեքենաները։ Ինքը՝ Ռանուչչին, չի տուժել։
Քննության վարկածով՝ Լավիտոլան մեկ այլ տղամարդու՝ Տավարես Գոմես Կլեշիոյին, հանձնարարել է գտնել կատարողներին։ Հարձակման ենթադրյալ չորս մասնակիցներին ոստիկանությունը ձերբակալել է հունիսին՝ Նեապոլի շրջանում։ Գոմեսը դեռ հետախուզման մեջ է։
Քննիչները կարծում են, որ Լավիտոլան և Գոմեսը նախօրոք զննել են լրագրողի տան մոտ գտնվող վայրը։ Ըստ գործի նյութերի՝ Լավիտոլան ակնկալել է, որ հարձակումը կբարձրացնի Ռանուչչիի ճանաչելիությունը և կօգնի նրան քաղաքական կարիերա սկսելու հնարավորության դեպքում։ Ընդ որում, ըստ քննության, ինքը՝ լրագրողը, ոչինչ չի իմացել իր ծանոթի ծրագրերի մասին։
Ռանուչչին իտալական Rai պետական հեռուստաալիքով հեռարձակվող հանրաճանաչ հետաքննողական «Report» հեռուստաշոուի վարողն է։ Նա երկար տարիներ զբաղվում է մաֆիայի գործունեության, կոռուպցիայի և քաղաքական կապերի հետաքննությամբ և 2021 թվականից գտնվում է ոստիկանական պաշտպանության ներքո՝ իր հասցեին հնչած սպառնալիքների պատճառով։
Լավիտոլան՝ նախկին լրագրող և գործարար, մոտ է եղել Սիլվիո Բեռլուսկոնիին։ 2015 թվականին առաջին ատյանի դատարանը նրան դատապարտել է երեք տարվա ազատազրկման՝ նախկին վարչապետի հետ կապված կոռուպցիոն սխեմայի շրջանակում սենատորին գումար փոխանցելու գործով։ Նույն գործով Բեռլուսկոնին նույնպես դատապարտվել է երեք տարվա ազատազրկման։
Ռանուչչիի տան մոտ տեղի ունեցած պայթյունը տեղի է ունեցել ճիշտ ութ տարի անց մալթացի հետաքննող լրագրող Դաֆնե Կարուանա Գալիցիայի սպանությունից, որը զոհվել էր 2017 թվականին ականապատված ավտոմեքենայի պայթյունի հետևանքով։