Աշխարհի թոփ 10 տնտեսություններում բնակչության թվաքանակը բաշխված է խիստ անհավասարաչափ։ Առկա ամենաթարմ տվյալներով՝ ամենամեծ բնակչությունն ունի Հնդկաստանը՝ մոտ 1․5 մլրդ մարդ, մի փոքր զիջում է Չինաստանը՝ 1․4 մլրդ մարդ։ Երրորդ տեղում է ԱՄՆ-ն՝ մոտ 0․4 մլրդ մարդ։
Թոփ տասնյակում բնակչության նվազագույն թվաքանակը հաստատվել է Իտալիայում՝ 59 մլն մարդ։ Սակայն միայն բնակչության թվաքանակների համեմատությունը բավարար չէ՝ հասկանալու, թե աշխարհի խոշոր տնտեսություններն ինչպիսի ժողովրդագրական խնդիրների են բախվում․
Կարևոր ցուցանիշ է պտղաբերության գործակիցը, որը ցույց է տալիս, թե ծննդաբերելու տարիքում գտնվող կանանց որքան երեխա է բաժին ընկնում։
Թոփ 10 տնտեսություններում պտղաբերության ամենաբարձր ցուցանիշը դիտվել է Հնդկաստանում՝ 1․94, իսկ ամենացածրը՝ Չինաստանում՝ 1․02։
Այս թվերը նշանակում են, որ Հնդկաստանում մեկ կնոջը բաժին է ընկնում մոտ երկու երեխա, իսկ Չինաստանում՝ ընդամենը մեկը։
Նորածինների մահացության ամենաբարձր ցուցանիշը գրանցվել է Հնդկաստանում, որտեղ 1000 ողջ ծնվածներից մոտ 22-ը մինչև մեկ տարեկանը մահանում է։ Ամենացածր ցուցանիշը Ճապոնիայում է՝ մոտ 2 մահ 1000 ողջ ծնվածների հաշվով։
Մարդկային կապիտալի զարգացման տեսանկյունից կարևոր ցուցանիշ է կրթության տևողությունը դպրոցում։
Այս ցուցանիշով ամենաբարձր արդյունքը՝ մոտ 14 տարի, պատկանում է Գերմանիային, իսկ ամենաքիչ տարիները՝ Հնդկաստանում՝ մոտ 7 տարի։
Հաջորդը սեռերի հարաբերակցությունն է, որը ցույց է տալիս, թե որքան տղամարդ է բաժին ընկնում 100 կնոջ հաշվով։
Ամենացածր ցուցանիշը պատկանում է Ռուսաստանին՝ մոտ 87 տղամարդ, իսկ ամենաբարձր ցուցանիշը՝ Հնդկաստանին՝ մոտ 106 տղամարդ։
- Վիճակագրական տվյալներից երևում է, որ բնակչության տարիքի մեդիանան ամենաբարձրը Ճապոնիայում է՝ մոտ 50 տարեկան։ Այս ցուցանիշը նշանակում է, որ ճապոնացիների 50%-ը 50 տարեկանից ցածր է, իսկ մյուս 50%-ը՝ բարձր։ Ամենացածր մեդիանան Հնդկաստանում է՝ մոտ 29 տարեկան։
Կյանքի սպասվող տևողությունը ամենաբարձրը Ճապոնիայում է՝ 85 տարի, իսկ ամենացածրը՝ Հնդկաստանում՝ մոտ 73 տարի։
Կախվածության ցուցանիշը, որը ցույց է տալիս տարեցների և աշխատունակ տարիքից ցածր տարիք ունեցողների մասնաբաժինն աշխատանքային տարիքի բնակչության մեջ, ամենաբարձրն է Ճապոնիայում՝ մոտ 70%, իսկ ամենացածրը՝ Չինաստանում՝ մոտ 44%։
Միգրացիոն հոսքերի արդյունքում բնակչության թվաքանակի փոփոխության առավելագույն մակարդակն արձանագրվել է Միացյալ Թագավորությունում, որտեղ բնակչության մոտ 1% աճը պայմանավորված է միգրանտներով։
Ամենացածր ցուցանիշը դիտվել է Գերմանիայում, որտեղ բնակչության թվաքանակի 0․4% անկումը պայմանավորված է միգրացիայով։