Թեև նրանք համաձայնության են եկել ժամանակավոր խաղաղության համաձայնագրի շուրջ անցյալ օգոստոսին, բայց, այնուամենայնիվ, Ստոկհոլմի միջազգային խաղաղության հետազոտությունների ինստիտուտի (SIPRI) կազմած տվյալների համաձայն՝ Հայաստանն ու Ադրբեջանը 2025 թվականին աշխարհում ունեցել են ՀՆԱ-ի համեմատ ամենաբարձր ռազմական ծախսերը․ գրում է eurasianet.org-ը։
Ադրբեջանը զբաղեցրել է 6-րդ տեղը (6.5 տոկոս), իսկ Հայաստանը՝ 7-րդ (6.1 տոկոս)։
Պաշտպանության վրա ամենաբարձր ծախսերը կատարած երկիրը, ինչը զարմանալի չէ, Ուկրաինան է՝ 40 տոկոսով։ Ռուսաստանը (7.5 տոկոս) զբաղեցրել է 4-րդ տեղը՝ Ալժիրից և Իսրայելից հետո։
Առաջին տասնյակում են նաև Պարսից ծոցի և Մերձավոր Արևելքի պետությունները։
Ադրբեջանը, որը 2023 թվականին վերահսկողություն է հաստատել Լեռնային Ղարաբաղի նկատմամբ, 2025 թվականին սահմանել է ռազմական ծախսերի ռեկորդ՝ հասցնելով դրանք գրեթե 5 միլիարդ դոլարի։ Սա նշանակալի աճ է 2024 թվականի մոտ 3.8 միլիարդ դոլարի պաշտպանական բյուջեի համեմատ։ Այս տարի ռազմական ծախսերը կանխատեսվում են մի փոքր ավելի բարձր, քան 2025 թվականին։
Նույն տարում Հայաստանը ևս ռեկորդային բարձր պաշտպանական ծախսեր է ունեցել՝ ընդհանուր առմամբ մոտ 1.7 միլիարդ դոլար, ինչը մոտ 18 տոկոսով ավելի է նախորդ տարվա 1.4 միլիարդ դոլարից։
Հայաստանի խորհրդարանը քվեարկել է 2026 թվականի ռազմական բյուջեն կրճատելու օգտին՝ մինչև մոտ 1.47 միլիարդ դոլար, որի մեծ մասը հատկացվելու է բանակի արդիականացմանը։
Միևնույն ժամանակ Eurasianet-ը նկատում է, որ երկու երկրների միջև անցյալ օգոստոսին Վաշինգտոնում նախաստորագրված խաղաղության համաձայնագրի ավարտման գործընթացում առաջընթացը կանգ է առել։
Հունիսի սկզբին Հայաստանում կանցկացվեն խորհրդարանական ընտրություններ, որոնք, հավանաբար, կորոշեն բանակցությունների հետագա ընթացքը ոչ միայն խաղաղության պայմանագրի, այլև TRIPP-ի կամ «Թրամփի երթուղու» զարգացման առումով, որը համարվում է «Միջին միջանցք» առևտրային ուղու հիմնական հանգույց։
