Ամերիկյան ռազմական կապալառուներին առնվազն երեք տարի կպահանջվի՝ երեք հիմնական սպառազինության համակարգերի պաշարները վերականգնելու համար, որոնք ակտիվորեն սպառվել են Իրանի հետ պատերազմի ընթացքում։ Դրա մասին ասվում է Վաշինգտոնի Ռազմավարական և միջազգային հետազոտությունների կենտրոնի (CSIS) նոր զեկույցում, որը տրամադրվել է The Associated Press գործակալությանը։
Վերլուծաբանները նախազգուշացնում են. հրթիռների դեֆիցիտը ԱՄՆ-ի համար վտանգավոր «խոցելիության պատուհան» է ստեղծում Չինաստանի հետ հնարավոր ռազմական հակամարտության դեպքում։
Խոսքը բարձրտեխնոլոգիական զենքի մասին է, որի արտադրությունը հնարավոր չէ ակնթարթորեն ավելացնել.
Tomahawk թևավոր հրթիռներ. օգտագործվում են հակառակորդի տարածքի խորքերում բարձր ճշգրտության հարվածներ հասցնելու համար։
Patriot հակահրթիռներ. Ինտերցեպտորներ, որոնք պաշտպանում են ռազմակայաններն ու դաշնակիցներին բալիստիկ հրթիռներից և անօդաչու թռչող սարքերից։
THAAD հակահրթիռներ. միջին հեռահարության հրթիռների բարձրլեռնային՝ մթնոլորտից դուրս որսալու համալիրներ։
«Միացյալ Նահանգներն Իրանի հետ ընթացիկ պատերազմի շրջանակում ցանկացած երևակայելի սցենարի համար բավարար զինամթերք ունի։ Սակայն պահեստների դատարկումը խոցելիության պատուհան է բացել Թայվանի նեղուցում հակամարտության դեպքի համար։ Այդ պաշարները վերականգնելու համար անհրաժեշտ ժամանակը գլխավոր գլխացավանքն է դարձել պլանավորողների համար»,- նշում են հետազոտության հեղինակներ Մարկ Կանսիանը և Քրիս Պակը։
Չնայած այն հանգամանքին, որ հրթիռների քանակի մասին ստույգ տվյալները գաղտնի են, փորձագետները ժամկետները հաշվարկել են ռազմական բյուջեի բաց տվյալների հիման վրա.
Tomahawk (թևավոր հրթիռներ). Իրանի հետ հակամարտության ընթացքում ԱՄՆ-ն արձակել է ավելի քան 1000 հրթիռ։ Մինչ պատերազմը, փոքր պատվերների պատճառով, արտադրող Raytheon-ը թողարկում էր տարեկան 200-ից պակաս միավոր։ Նույնիսկ Ալաբամայում և Արիզոնայում գործարանների ընդլայնումը՝ տարեկան 1000+ հրթիռ հզորությամբ, նախապատերազմյան պաշարների մակարդակը կվերականգնի միայն 2030 թվականի վերջին։
THAAD (ՀՀՊ համակարգեր). իրանական գրոհները հետ մղելու համար ծախսված մոտ 290 ինտերցեպտորները լրացնելու համար ԱՄՆ պաշտպանական արդյունաբերությանը կպահանջվի ժամանակ մինչև 2029 թվականի վերջը։ Ամերիկյան բանակի շահերի համար Lockheed Martin կորպորացիան ստիպված է եղել հերթում հետաձգել արտասահմանյան արտահանման պայմանագրերը։
Patriot (ՀՀՊ համակարգեր). ավելի քան 1000 ծախսված ինտերցեպտոր-հրթիռները փոխարինելու համար ժամանակ կպահանջվի մինչև 2029 թվականի կեսը։ Իրավիճակը բարդանում է նրանով, որ Պենտագոնը պետք է հավասարակշռություն պահպանի սեփական կարիքների, Ուկրաինային մատակարարումների և Patriot-ի 17 այլ օպերատոր երկրների առջև ունեցած պարտավորությունների միջև։
Դոնալդ Թրամփի վարչակազմը 2027 թվականի համար 1,5 տրիլիոն դոլարի չափով պատմական պաշտպանական բյուջե է հաստատել՝ շարունակելով Ջո Բայդենի վարչակազմի սկսած առաջադեմ սպառազինությունների ձեռքբերման միտումը։
Կոնգրեսը ռազմարդյունաբերական համալիրի ֆինանսավորման հարցում հազվադեպ երկկուսակցական համաձայնություն է ցուցաբերում։ Նախագահ Թրամփը և պաշտպանության նախարար Փիթ Հեգսեթը կոշտ ճնշում են գործադրում կապալառուների վրա՝ պահանջելով արագացնել արտադրական հոսքագծերը։ Հեգսեթն ավելի վաղ հայտարարել էր, որ ներդրումները գործարաններին կօգնեն կրկնապատկել կամ եռապատկել հզորությունները, իսկ Պենտագոնի պաշտոնական ներկայացուցիչ Շոն Փարնելը վստահեցրել է, որ բանակն «ունի ամեն ինչ՝ առաջադրանքները ցանկացած ժամանակ և ցանկացած վայրում կատարելու համար»։
Սակայն անկախ փորձագետներն ու վերլուծաբանները, մասնավորապես՝ POGO կազմակերպության ծովային հետևակի նախկին սպա Վիրջինիա Բերգերը, ահազանգում են. «Զինվորականները հիանալի գիտեին պահեստների իրական վիճակը և, հուսով եմ, նախազգուշացրել են ղեկավարությանը. «Հեյ, եթե մենք ներքաշվենք այս կռվի մեջ, ապա նույնիսկ ամենապահպանողական գնահատականներով՝ մեր պաշարները կիջեցնենք կրիտիկական մակարդակի»։ Խնդիրը փողի մեջ չէ. բարդ հրթիռային համակարգերը և դրանց ենթակապալառուները հնարավոր չէ գործարկել մատները թափահարելով»։
Խիստ լարված իրավիճակ. Փաշինյանի համար մեծ վեճ` թիվ 5 ավտոբուսում
Կանադան սկզբունքային համաձայնության է հասել Գերմանիա հեղուկացված բնական գազի արտահանման վերաբերյալ՝ Խաղաղ օվկիանոսի ափին նախատեսվող իր տերմինալից։ Դրա մասին հայտնում է AP-ն՝ հղում անելով բանակցությունների ընթացքին ծանոթ աղբյուրին։
Աղբյուրի տվյալներով՝ համաձայնագիրը կստորագրվի կանադական կողմի և գերմանական պետական էներգետիկ SEFE (Securing Energy for Europe) ընկերության միջև։ Մատակարարումներն իրականացվելու են Բրիտանական Կոլումբիայի ափին նախագծվող Ksi Lisims արտահանման համալիրից։
Մատակարարումների ծավալը կկազմի տարեկան մինչև 1 միլիոն մետրիկ տոննա հեղուկ բնական գազ։
Կանադայի համար այս պայմանագիրը չափազանց կարևոր աշխարհաքաղաքական նշանակություն ունի։ Կանադայի նոր վարչապետ Մարկ Քարնին ավելի վաղ հավակնոտ նպատակ էր դրել՝ առաջիկա տասնամյակի ընթացքում կրկնապատկել ԱՄՆ-ից դուրս գտնվող երկրների հետ առևտրի ծավալը։ Այսօր Կանադան, լինելով նավթագազային հարուստ տերություն, իր էներգետիկ արտահանման գրեթե ամբողջ ծավալն ուղղում է բացառապես ամերիկյան շուկա։
Բրիտանական Կոլումբիա նահանգի վարչապետ Դևիդ Էբին նշել է, որ Գերմանիայի հետ պայմանագիրը կատալիզատոր կդառնա Ksi Lisims նախագծի հետևում կանգնած կոնսորցիումի համար։ Դա ներդրողներին հնարավորություն կտա վերջնական ներդրումային որոշում ընդունել՝ 10 միլիարդ կանադական դոլար (մոտ 7,2 միլիարդ ԱՄՆ դոլար) ընդհանուր արժողությամբ գործարանի և արտահանման տերմինալի կառուցման վերաբերյալ։
Գազի գնորդը՝ գերմանական SEFE ընկերությունը, այսօր Գերմանիայի առաջատար պետական էներգետիկ ձեռնարկությունն է։ Դա ռուսական «Գազպրոմի» (Gazprom Germania) նախկին դուստր կառույցն է, որն ԳԴՀ կառավարությունը լիովին ազգայնացրել է 2022 թվականին։
Գերմանիան երկարաժամկետ պայմանագրերի սուր կարիք ունի։ Մինչև 2022 թվականը Բեռլինը կրիտիկականորեն կախված էր Ռուսաստանից ստացվող էժան խողովակաշարային գազից։ Ուկրաինայում պատերազմի սկսվելուց և ՌԴ-ից մատակարարումների դադարեցումից հետո Եվրոպան բախվեց էներգետիկ ծանրագույն ճգնաժամի, որն այժմ սրվում է Մերձավոր Արևելքում նոր պատերազմով։
Կանադական հեղուկ բնական գազը կոչված է փոխարինելու պակասող ծավալները, նվազեցնելու ռեկորդային գնաճը և կանխելու էներգատար գերմանական գործարանների փակումը։
