Իտալական Վերածննդի դարաշրջանի վարպետ Անտոնելլո դա Մեսսինայի չորս կտավների գողությունը հնարավոր է առնչվում է կազմակերպված հանցավորությանը և լուրջ հարցեր է առաջացրել Սիցիլիայում նկարչի հայրենի քաղաքում գտնվող թանգարանի անվտանգության վերաբերյալ, հայտարարել է տեղական պաշտոնյան։
Մեսսինայի մշակույթի հարցերով խորհրդական Էնցո Կարուզոն նշել է, որ դժվար է հասկանալ՝ ինչպես են գողերը կարողացել ընդամենը մի քանի րոպեում դուրս բերել նկարներն՝ առանց թանգարանի հատակագծի մասին մանրամասն պատկերացում ունենալու։
«Սա շատ, շատ տարօրինակ պատմություն է»,- Reuters-ին տված հարցազրույցում ասել է Կարուզոն։
Գողությունը տեղի է ունեցել շաբաթ օրը և ցնցել է Իտալիան՝ կրկին հիշեցնելով 1969 թվականին Պալերմոյի եկեղեցուց Կարավաջոյի գլուխգործոցի անհետացումը։ Այդ գործը վաղուց կապում են սիցիլիական Cosa Nostra մաֆիայի հետ, սակայն այն մինչ օրս մնում է չբացահայտված։
Չափազանց հայտնի են վաճառվելու համար
Կարուզոն հայտարարել է, որ Անտոնելլո դա Մեսսինայի գողացված աշխատանքներն այնքան հայտնի են, որ դրանք վաճառել նույնիսկ սև շուկայում գրեթե անհնար է։ Նրա կարծիքով՝ դա հավանականություն է ստեղծում, որ նկարները կարող են օգտագործվել որպես ճնշման լծակ կամ գրավ հանցավոր գործարքների շրջանակում։
«Մա՞ֆիա։ Միանգամայն հնարավոր է, որ նրանք փորձեն շանտաժի ենթարկել հենց պետությանը՝ նկարները վերադարձնելու դիմաց։ Դրանք այն գործընթացներն են, որոնք սովորական մարդիկ երբեք չեն տեսնում»,- ասել է նա։
Ըստ պաշտոնյայի՝ մեկ այլ հնարավոր սցենարն այն է, որ նկարները կարող են օգտագործվել որպես գրավ կամ յուրատեսակ արժույթ քրեական աշխարհի ներսում։
Գողերը շաբաթ երեկոյան ներթափանցել են Մեսսինայի Ակկասցինայի տարածաշրջանային թանգարան, երբ քաղաքում ընթանում էր կրոնական տոն, որը փողոցներում հավաքել էր հազարավոր մարդկանց։
Գողության մասին հայտնի է դարձել միայն մոտ երկու ժամ անց։ Զբոսաշրջիկները հայտնաբերել են Անտոնելլոյի երկու նկար՝ ըստ երևույթին հանցագործների կողմից թողնված, հենված թանգարանի ցանկապատին։
Կարուզոն նաև կասկածի տակ է դրել, թե որքան լավ էին գողերը պատրաստվել հանցագործությանը։ Նա ուշադրություն է հրավիրել այն փաստի վրա, որ երկու նկար թողնվել էին հենց փողոցում։
«Հնարավոր է՝ նրանք չէին սպասում, թե որքան ծանր կլինեն նկարները։ Դրանք փայտե վահանակներ են… Նկարները գողանալն այնքան հեշտ չէ, որքան կտավը, որը կարելի է կտրել շրջանակից»,- ասել է նա։
Նրա կարծիքով՝ արվեստի գործերի պրոֆեսիոնալ գողը սովորաբար տասնյակ միլիոնավոր եվրո արժողությամբ նկարների հետ շատ ավելի զգույշ կվարվեր։ Սակայն այս դեպքում, նշել է Կարուզոն, հանցագործները նույնիսկ չեն փորձել կտավները պաշտպանել։
Մեսսինա է ուղևորվում իտալական ոստիկանության արվեստի գործերի գողությունների դեմ պայքարի մասնագիտացված ստորաբաժանումը։ Ընդամենը երեք օր առաջ ստորաբաժանման աշխատակիցներն օգնել էին վերադարձնել Պիեռ-Օգյուստ Ռենուարի, Անրի Մատիսի և Պոլ Սեզանի նկարները, որոնք այս տարվա սկզբին գողացվել էին Պարմայի մերձակայքում գտնվող թանգարանից։
Արվեստի գործերի գողությունների քննությամբ զբաղվող Հռոմի ոստիկանության ստորաբաժանումն անհետացած գլուխգործոցներ հայտնաբերելու լուրջ փորձ ունի։ Սակայն Սիցիլիային մինչ օրս շարունակում է հետապնդել Կարավաջոյի անհետացած նկարի հիշողությունը։
«Այնպիսի զգացողություն ունեմ, որ գողերը կարող են Անտոնելլոյի նկարները պահել գաղտնի վայրում, մինչև իրավիճակը հանդարտվի,- ասել է Կարուզոն։- Կամ, հնարավոր է, դրանք անմիջապես ծովային ճանապարհով դուրս են բերել»,- հավելել է նա՝ նշելով, որ թանգարանը գտնվում է Մեսսինայի նեղուցից ոչ հեռու։
«Հույսն այն է, որ վաղ թե ուշ դրանք կրկին կհայտնվեն»։
Մաֆիայի առնչության վարկածը մնում է չհաստատված, իսկ հետագա քննությունը կենտրոնանալու է այն հարցի վրա, թե արդյոք թանգարանի աշխատակիցները կարող էին օգնել կազմակերպել գողությունը, քանի որ պաշտոնական տվյալներով ահազանգման համակարգն ու տեսահսկումը անխափան են աշխատել։
ՔՊ-ական տարածքային կառավարման և ենթակառուցվածքների նախարար Դավիթ Խուդաթյանն այսօր աշխատանքային այցով Գյումրիում էր։ Եկել էր տեղում ծանոթանալու քաղաքում իրականացվող ենթակառուցվածքային ծրագրերին, մասնավորապես՝ ճանապարհաշինական աշխատանքների ընթացքին։
Նա Շիրակի մարզպետ Դավիթ Առուշանյանի և պատասխանատու պաշտոնյաների ուղեկցությամբ այցելել է շինհրապարակներ։ Ուշադրության կենտրոնում են եղել նաև Վերակառուցման և զարգացման եվրոպական բանկի ծրագրով իրականացվող ճանապարհաշինական աշխատանքները։
Ուշագրավ է, որ ՔՊ-ական նախարարին Գյումրիում դիմավորել են Շիրակի մարզպետ Դավիթ Առուշանյանն ու մյուս համայնքների պաշտոնյաները, սակայն Գյումրու քաղաքապետի պաշտոնակատար Ավետիս Առաքելյանը հանդիպմանը ներկա չի եղել։
Ինչպես տեղեկացանք, Առաքելյանն այս պահին գտնվում է արձակուրդում, ինչը, թերևս, բացատրում է նրա բացակայությունը։ Բայց, այնուսմենայնիվ, քաղաքապետարանից հանդիպմանը ներկայացուցիչներ ներկա են եղել, այդ թվում՝ քաղաքաշինության ոլորտի պատասխանատուները։
Այցի ընթացքում լրագրողները Դավիթ Խուդաթյանին հարցրել են նաև Գյումրիում իշխանափոխության հնարավորության մասին՝ հետաքրքրվելով, թե արդյոք իշխանությունը հրաժարվել է այդ մտադրությունից։
Խուդաթյանը փաստացի չի հերքել, որ իշխանությունը Գյումրիում իշխանափոխության մտադրությունից չի հրաժարվել՝ նշելով, որ դրա ճանապարհը ընտրություններն են։
Սակայն այս դեպքում առաջանում է մեկ այլ հարց․ եթե Գյումրիում իշխանափոխությունը նախատեսվում է իրականացնել ընտրությունների միջոցով, ապա ի՞նչ մեխանիզմով են նախատեսում նոր ընտրությունների անցկացումը։
Մասնավորապես՝ քննարկվո՞ւմ է Գյումրին որպես խոշորացված համայնք ձևավորելու և հարակից բնակավայրերը քաղաքին միավորելու տարբերակը, թե՞ ընտրությունները կանցկացվեն գործող վարչատարածքային կառուցվածքի պայմաններում։ Խուդաթյանի խոսքով՝ այդ հարցն առայժմ չի քննարկվել։
Բելգիայի արևելքում՝ Գերմանիայի սահմանին մոտ գտնվող Բարձր Ֆենների (Hautes Fagnes) արգելոցում բռնկված խոշոր հրդեհը դեռևս ամբողջությամբ չի հաջողվել վերահսկել․ գրում են տեղական լրատվամիջոցները։
Հրդեհը, որը սկսվել է օգոստոսի 14-ին, արդեն ոչնչացրել է շուրջ 3000 հեկտար տարածք՝ դառնալով Բելգիայի պատմության անտառային խոշորագույն հրդեհներից մեկը։
Օգոստոսի 17-ի անձրևը, օդի խոնավության աճն ու քամու ուժգնության թուլացումը որոշ չափով նպաստել են հրդեհի տարածման դանդաղեցմանը։ Փրկարարները կարողացել են կանգնեցնել կրակի շարժը դեպի Գերմանիայի սահման, սակայն կրակը շարունակում է մխալ, ու հրդեհի՝ նոր թափով բռնկումը բացառված չէ։
Հրդեհի հավանականությունը զրույացնելը բարդ է նաև՝ պայմանավորված տարածքի ճահճային հողերով․ գետնի տակի տորֆը կարող է այրվել, ինչի հետևանքով կրակը կարող է դեռ երկար ժամանակ ծխալ։
Հրդեհի պատճառով Բելգիայի մի շարք բնակավայրերից մոտ 600 մարդ է տարհանվել։ Գերմանիայի սահմանամերձ Մոնշաու քաղաքում նույնպես մասնակի տարհանում է իրականացվել․ բնակիչներին զգուշացվել է ծխի և հրդեհի հնարավոր տարածման վտանգի մասին։ Հրդեհի դեմ պայքարում ներգրավված է ավելի քան 500 հրշեջ ու փրկարար, ինչպես նաև՝ տարբեր երկրների օդային ուժեր։
Թե ի՞նչն է հրդեհի բռնկման պատճառը դեռևս հայտնի չէ։
Հրդեհի դեմ պայքարին միացել են նաև հարևան երկրները։ Գերմանիան Բելգիային արդեն օգնություն է տրամադրել՝ ուղարկելով հրշեջների և փրկարարների։ Բելգիան նաև միջազգային աջակցություն է ստացել օդային տեխնիկայով։
NEWS.am-ը ներկայացնում է ռուսերեն լրատվական թողարկում՝ «Итоги дня» («Օրվա ամփոփում»)։ Այս ժամին Հայաստանում և նրա շուրջ տեղի ունեցող իրադարձությունների մասին բոլոր կարևոր տեղեկությունները` արագ, հակիրճ և օբյեկտիվ:
ՀՀ բարձր տեխնոլոգիական արդյունաբերության նախարար Դավիթ Թադևոսյանն օգոստոսի 17-ին ընդունել է պաշտոնական այցով Հայաստան ժամանած Հնդկաստանի պաշտպանության քարտուղար Ռաջեշ Կումար Սինգհի գլխավորած պատվիրակությանը։
Հանդիպման ընթացքում քննարկվել են Հայաստանի և Հնդկաստանի միջև համագործակցության ընդլայնման հնարավորությունները պաշտպանական արդյունաբերության և բարձր տեխնոլոգիաների ոլորտներում՝ կարևորելով գիտական հետազոտությունների, զարգացման և նորարարության ուղղությունները։ Ընդգծվել է ինստիտուցիոնալ կապերի ամրապնդման և հայկական ընկերությունների հետ գործընկերության զարգացման կարևորությունը։
Հանդիպման շրջանակում ստորագրվել է Հայաստանի Հանրապետության բարձր տեխնոլոգիական արդյունաբերության նախարարության և Հնդկաստանի Հանրապետության պաշտպանության նախարարության միջև «Պաշտպանական արդյունաբերության ոլորտում հետազոտության, զարգացման, նորարարության և համատեղ արտադրության համագործակցության վերաբերյալ» փոխըմբռնման հուշագիրը։
Փաստաթղթով կողմերն ամրագրել են պաշտպանական արդյունաբերության ոլորտում փոխշահավետ համագործակցության խորացման ուղղությունները՝ ներառյալ համատեղ գիտահետազոտական, նախագծային և նորարարական ծրագրերի իրականացումը, պաշտպանական տեխնոլոգիաների ստարտափների և ինկուբատորների զարգացումը, ինչպես նաև ոլորտի մասնագետների կարողությունների և փորձի փոխանակման ծրագրերը։
Հուշագիրը ստորագրել են ԲՏԱ նախարարության Ռազմարդյունաբերության կոմիտեի նախագահի պարտականությունները կատարող Արամ Ջիվանյանն ու Հնդկաստանի պաշտպանության քարտուղար Ռաջեշ Կումար Սինգհը։
Կողմերը պայմանավորվել են հետագա քայլերի շուրջ՝ ձեռք բերված պայմանավորվածությունների գործնական իրագործումն ապահովելու նպատակով։
Ամերիկյան «Ինտեր Մայամի» ֆուտբոլային ակումբի ավագ եւ հարձակվող Լիոնել Մեսսին սահմանել է տասներկուամյա հակառեկորդ։ Ինչպես տեղեկացնում է gazeta-ն, 39-ամյա ֆուտբոլիստը չի կարողացել իրացնել տուգանայինը՝ MLS Կանոնավոր Առաջնության շրջանակում «Նեշվիլի» հետ հանդիպման ժամանակ։ Այդ չխփված 11-մետրանոցը երրորդ բացթողումն է եղել Մեսսիի համար։ Նման բան տեղի էր ունեցել նաեւ 2014 թվականին։ Իսկ MLS շրջանակում Մեսին տուգանային չէր կարողացել իրացնել 25 թվականի սեպտեմբերին։
Օգոստոսին ոսկու գնի 9% աճը՝ մինչև մոտ 4400 դոլար մեկ ունցիայի համար, վկայում է այն մասին, որ թանկարժեք մետաղը կրկին սկսում է գրավել ինստիտուցիոնալ ներդրողներին և կենտրոնական բանկերին։ Դա պայմաններ է ստեղծում գների հետագա աճի համար, քանի որ շուկաներն աստիճանաբար հեռանում են Իրանի դեմ ԱՄՆ-ի և Իսրայելի պատերազմի պատճառած սկզբնական շոկից, հաղորդում է Reuters-ը։
Փետրվարի վերջում սկսված պատերազմը հանգեցրել էր ոսկու գնի անկմանը՝ հունվարին գրանցված ռեկորդային $5595 մեկ ունցիայի դիմաց մակարդակից մինչև հունիսին 4000 դոլարից ցածր։ Ներդրողները ձգտում էին պահպանել իրացվելիությունը, իսկ որոշ կենտրոնական բանկեր նավթի գների աճի ֆոնին ազգային տնտեսություններին աջակցելու համար օգտագործում էին սեփական պահուստները։
«Թվում է, թե վերջապես ոսկուց հանել են սահմանափակիչը»,- հայտարարել է անկախ վերլուծաբան Ռոս Նորմանը։
Օգոստոսին ոսկու գինը հաղթահարեց տեխնիկական դիմադրության երկու կարևոր մակարդակ։ Շուկային աջակցեցին նավթի գների նվազումը և ԱՄՆ-ում սպասվածից ավելի թույլ գնաճային տվյալները, որոնք նվազեցրին տոկոսադրույքների հետագա բարձրացման սպասումները։
«Եթե նավթը կրկին առաջին պլան չգա, Մերձավոր Արևելքում իրավիճակը չսրվի, և նավթի գները չցատկեն վեր, ապա, թվում է, ոսկու համար ճանապարհը բաց է հետագա աճի համար»,- ասել է HSBC-ի թանկարժեք մետաղների գլխավոր վերլուծաբան Ջեյմս Սթիլը։
Ըստ Սթիլի՝ վերջին երկու շաբաթվա ընթացքում գների վերականգնման ուժը վկայում է կենտրոնական բանկերի կամ ինքնիշխան հիմնադրամների հնարավոր ակտիվության մասին։ Միևնույն ժամանակ վերլուծաբանը շեշտել է, որ դա ենթադրություն է, ոչ թե հաստատված փաստ։
Կենտրոնական բանկերի կողմից պահանջարկ
Ոսկու համար աջակցության ևս մեկ հավանական աղբյուր է դարձել խոշոր ձուլակտորների նկատմամբ ինստիտուցիոնալ պահանջարկը։ Ասիական առևտրային հարթակներում, ներառյալ՝ Չինաստանում, ոսկու ապահովագները վկայում են գնման հետաքրքրության վերականգնման մասին։ Անցած շաբաթ Չինաստանում ոսկու ապահովագինը կազմում էր 1,50 դոլար մեկ ունցիայի համար։
«Ըստ իս, իրականում խոսքը վերաբերում է այն դիրքերի վերականգնմանը, որոնք խոշոր ինստիտուցիոնալ ներդրողները զբաղեցնում էին Իրանի հետ հակամարտությունից առաջ»,- նշել է Սթիլը։
Միաժամանակ ոսկու հետագա աճին խոչընդոտում են Իրանի հետ պատերազմի դադարեցման շուրջ բանակցությունների դանդաղ ընթացքը, ոսկերչական իրերի և ներդրումային մետաղադրամների նկատմամբ թույլ պահանջարկը, ինչպես նաև ոսկով ապահովված և տոկոսադրույքների փոփոխությունների նկատմամբ զգայուն բորսայական ֆոնդեր (ETF) միջոցների ներհոսքը։
Ոսկու համաշխարհային խորհրդի (World Gold Council) տվյալներով՝ օգոստոսի առաջին կեսին նման ֆոնդերի կառավարման տակ գտնվող ակտիվներն ավելացել են ընդամենը 7 միլիարդ դոլարով՝ հասնելով 582 միլիարդ դոլարի։
Տեխնիկական ցուցանիշները նույնպես մատնանշում են աճի հնարավոր սահմանափակումները։ Հարաբերական ուժի ինդեքսը (RSI) վկայում է, որ ոսկին մոտենում է կարճաժամկետ «գերգնվածության» գոտուն։ Բացի դրանից, 200-օրյա սահող միջինը, որը այժմ գտնվում է մեկ ունցիայի համար 4504 դոլարի մակարդակում, շարունակում է դիմադրության ուժեղ մակարդակ մնալ։
