Category: ABCNews

Հայաստանում սկսվել է դատավարություն Հայ եկեղեցու առաջնորդ Գարեգին Բ-ի և 6 եպիսկոպոսների դեմ: Դատավարության իրավական հիմքն արքեպիսկոպոսներից մեկի կարգալույծ լինելու շուրջ վեճն է, որը քողարկվում է Փաշինյանի և երկրի ամենաազդեցիկ հաստատության միջև առճակատմամբ: Երկրի բարձրաստիճան պաշտոնյաների հռետորաբանությունը բավականին կոշտ է դարձել․ գրում է Deutsche Welle-ն։

Ինչպես նշվում է, Փաշինյանը ցուցադրաբար հրաժարվում է օգտագործել Կաթողիկոսի հոգևոր տիտղոսը՝ նրան դիմելով բացառապես իր աշխարհիկ անունով՝ Կտրիճ Ներսիսյան: Փաշինյանը հրապարակավ մեղադրել է պատրիարքին իր կուսակրոնության ուխտը խախտելու համար, ինչը վրդովմունքի ալիք է առաջացրել ընդդիմության շրջանում:

Փաշինյանը նոր մեղադրանքներ է առաջադրել, այս անգամ՝ քաղաքական բնույթի: Նա պնդել է, որ Կաթողիկոսը պատվիրակություններ է ուղարկում երկրի շրջաններ՝ աշխարհիկ կառավարությունը տապալելուն ուղղված նոր հեղափոխական շարժում սկսելու համար:

Հարցումների համաձայն՝ Հայ առաքելական եկեղեցին վայելում է բարձր վստահություն և բանակի հետ միասին մնում է երկրի ամենաբարձր վարկանիշ ունեցող հաստատությունը:

ՀՀ սահմանադրության համաձայն՝ կրոնական կազմակերպությունները լիովին անջատ են պետությունից: Միաժամանակ, հիմնական օրենքը Հայ առաքելական եկեղեցուն շնորհում է հատուկ կարգավիճակ՝ ճանաչելով նրա բացառիկ պատմական առաքելությունը ժողովրդի հոգևոր կյանքում, ազգային մշակույթի զարգացման և ինքնության պահպանման գործում: Աշխարհիկ և կրոնական իշխանությունների փոխգործակցության իրավական շրջանակը կարող է լրացուցիչ կարգավորվել առանձին օրենքով, որը ներկայիս ճգնաժամի պայմաններում ավելի ու ավելի է դառնում բուռն քաղաքական բանավեճի առարկա։

Փաշինյանը հակադարձել է այս պնդումներին: Նրա խոսքով՝ Եկեղեցու և պետության սահմանադրական բաժանումը նրան չի տալիս իրավական շրջանակներից դուրս գոյություն ունենալու կամ «պետություն պետության մեջ» կառուցելու իրավունք:

Քաղաքագետները կանխատեսում են, որ հետագա սրացումն անխուսափելիորեն կհարվածի իշխող թիմի վարկանիշին։

Ռուսաստանի Դաշնության նախագահ Վլադիմիր Պուտինը շնորհավորել է ներկայում քրեակատարողական հիմնարկում գտնվող ՀՀ նախկին նախագահ Ռոբերտ Քոչարյանին ծննդյան օրվա առթիվ․ գրում է lenta.ru-ն։

«Անկեղծորեն մաղթում եմ Ձեզ առողջություն, հոգևոր ուժ և տոկունություն այն մարտահրավերների առաջ, որոնց Դուք և Ձեր ընտանիքը բախվում եք ներկայում», – գրել է Պուտինը։

Նա նշել է Քոչարյանի անձնական ներդրումը Ռուսաստանի և Հայաստանի միջև բարեկամական կապերի զարգացման գործում։

Երեկ՝ օգոստոսի 30-ին, ողբերգական ավտովթար է տեղի ունեցել Գեղարքունիքի մարզում։ Ժամը 22:05-ի սահմաններում Երևան-Սևան-Իջևան ավտոճանապարհի 56 կմ հատվածում՝ Գագարին բնակավայրի վարչական տարածքում, բախվել են «Toyota Alphard» մակնիշի ավտոմեքենան և «KamAZ» մակնիշի բեռնատարը. գրում է Shamshyan.com-ը։

Ինչպես դեպքի վայրից հայտնում է ֆոտոլրագրող Գագիկ Շամշյանը, վթարի հետևանքով 1 հոգի տեղում մահացել է, 4 հոգի տարբեր աստիճանի մարմնական վնասվածքներով տեղափոխվել են «Սևան» բժշկական կենտրոն։

Վիրավորներին առաջինը օգնության են հասել քաղաքացիները և ըստ նրանց հայտնածի՝ օպերատիվորեն ժամանած «Սևան» բժշկական կենտրոնի շտապօգնության բժիշկների հերթապահ խմբերը։ Բժիշկները վիրավորներին մինչև հիվանդանոց տեղափոխելը տեղում առաջին բուժօգնություն են ցուցաբերել։ Բախման հետևանքով «Toyota Alphard»-ը դուրս է եկել երթևեկելի գոտուց և կողաշրջված հայտնվել ծառերի մեջ։

Ռուսաստանին որպես դաշնակից չճանաչելը Հայաստանի կողմից ՌԴ-ի հետ ձեռք ձեռքի տված աշխատելու իր դժկամությունն արդարացնելու փորձ է․ EADaily-ի փոխանցմամբ՝ հայտարարել է ՌԴ դաշնային խորհրդի պետական ինքնիշխանության պաշտպանության և երկրի ներքին գործերին միջամտության կանխարգելման հարցերով հանձնաժողովի նախագահ Վլադիմիր Ջաբարովը։

ՀՀ կառավարության 2026-2031 թվականների ծրագրում Ռուսաստանն այլևս չի նշված որպես ռազմավարական դաշնակից։ Այս հայտարարությունը, ըստ Ջաբարովի, փորձ է արդարացնելու «ԵՄ-ի հետ կասկածելի կապերի ամրապնդումը և հետագայում ԵԱՏՄ-ից հնարավոր դուրս գալը, ինչը զգալի վնասներ կպատճառի Հայաստանի տնտեսությանը»։

Ըստ Ջաբարովի՝ Ղարաբաղյան երկրորդ պատերազմի ժամանակ Հայաստանն ինքը պաշտոնապես չի պաշտպանել Արցախը և հատուկ օգնություն չի խնդրել ՀԱՊԿ-ից։

Ավելին, Արցախը չի ճանաչվել որպես Հայաստանի մաս Երևանի կողմից։ Սա նշանակում է, որ ՀԱՊԿ-ը որևէ իրավական հիմք չուներ միջամտելու համար։

«Սա կարևոր է, քանի որ միջազգային իրավունքի և ՀԱՊԿ կանոնադրության համաձայն՝ կազմակերպությունը նախատեսված է անդամ պետություններին արտաքին ագրեսիայից պաշտպանելու համար։ Եթե տարածքն իրավաբանորեն չի պատկանում անդամ պետությանը, ապա այն չի կարող «պաշտպանվել» այս մեխանիզմի շրջանակում», – ընդգծել է Ջաբարովը։

Նրա կարծիքով՝ վաղաժամ է քննարկել ՀԱՊԿ-ից Հայաստանի դուրս գալու հարցը՝ չնայած Ռուսաստանի և ՀԱՊԿ-ի դերի վերաբերյալ Երևանի վերջին հայտարարություններին։

«Հայաստանն ինքնիշխան պետություն է, բայց կան կանոններ կազմակերպություններ մուտք գործելու և դուրս գալու համար։ Ոչ ոք դուրս չի հանի Հայաստանին ՀԱՊԿ-ից առանց պաշտոնական հարցման», – հայտարարել է սենատորը։

РИА Новости-ն գրում է, որ Եվրասիական տնտեսական միությունից Հայաստանի դուրս գալն ամենամեծ ազդեցությունը կունենա երկրի ալկոհոլի, ծաղիկների և ձկան արտահանման վրա, քանի որ տեղական արտադրողները կկորցնեն իրենց ամենամեծ շուկան՝ Ռուսաստանը։

Գործակալության վիճակագրության համաձայն՝ 2026 թվականի առաջին եռամսյակում Հայաստանը Ռուսաստան է արտահանել թունդ ալկոհոլ, որի բաժինն այս կատեգորիայի ընդհանուր արտահանման գրեթե 86%-ն է։ Հայաստանը Ռուսաստան է արտահանել 12.2 միլիոն դոլար արժողությամբ ծաղիկներ, որը կազմում է ընդհանուր արտահանման 88%-ը։ Ձկան արտահանումը հասել է 17.6 միլիոն դոլարի (98%), սուրճի՝ 11.6 միլիոն դոլարի (89%), իսկ սև մետաղների, հիմնականում ֆեռոհամահալվածքների և հարթ գլանվածքի արտահանումը՝ 8.8 միլիոն դոլարի (31%)։

Հայաստանից Ռուսաստան արտահանվող 10 խոշորագույն ապրանքներից են նաև օրթոպեդիկ արտադրանքը՝ 27.1 միլիոն դոլար (99.9%), կոշիկը՝ 14.7 միլիոն դոլար (96%), շոկոլադը և շոկոլադե արտադրանքը՝ 5.9 միլիոն դոլար (70%), իսկ հանքային և գազավորված ջուրը՝ հավելանյութերով, 5.6 միլիոն դոլար (89%)։

Վարչապետ Նիկոլ Փաշինյանը երկօրյա աշխատանքային այցով մեկնել է Ղրղզստանի Հանրապետություն. հայտնում են ՀՀ կառավարությունից։

«Վարչապետը Բիշքեկում կմասնակցի Շանհայի համագործակցության կազմակերպության գագաթնաժողովի ՇՀԿ+ ձևաչափի հանդիպմանը և դրա շրջանակում կայանալիք միջոցառումներին:

Այցի շրջանակում Նիկոլ Փաշինյանը երկկողմ հանդիպումներ կունենա արտերկրի գործընկերների հետ»,- ասված է հայտարարության մեջ։

Ֆրանսիացիների ճնշող մեծամասնությունը դժգոհ է Ֆրանսիայի նախագահ Էմանուել Մակրոնի գործունեությունից։ Նա կորցրել է հունվարից ի վեր քաղաքացիների շրջանում աստիճանաբար ձեռք բերած վստահության ողջ պաշարը։ Այս մասին վկայում են CSA ընկերության կողմից Le Journal du Dimanche թերթի պատվերով անցկացված հանրային կարծիքի հարցման արդյունքները։

Հարցմանը, որին մասնակցել է 1000 ֆրանսիացի, պետության ղեկավարի վարկանիշը նվազել է 7 տոկոսային կետով։ Այժմ Մակրոնի գործունեությանը հավանություն է տալիս հարցվածների միայն 21%-ը, մինչդեռ 79%-ը դժգոհ է նախագահի վարած քաղաքականությունից։

Ինչպես նշում է պարբերականը, նախագահը «կորցրել է իր ողջ վարկանիշը, որը այս տարվա հունվարից ի վեր աստիճանաբար ձեռք էր բերել»։ Միևնույն ժամանակ, նրա նկատմամբ դժգոհությունն աճել է նույնիսկ նրա հիմնադրած «Վերածնունդ» կուսակցության աջակիցների շրջանում։

ՌԴ նախագահ Վլադիմիր Պուտինը սեպտեմբերի 1-ին Բիշքեկում՝ ՇՀԿ գագաթնաժողովի շրջանակում, Հայաստանի վարչապետ Նիկոլ Փաշինյանի հետ հանդիպմանը ևս մեկ անգամ կներկայացնի Մոսկվայի դիրքորոշումը՝ Եվրամիությանը միանալու Երևանի մտադրության վերաբերյալ։ Այս մասին հայտարարել է ՌԴ նախագահի մամուլի քարտուղար Դմիտրի Պեսկովը։

«Բարձր մակարդակով յուրաքանչյուր շփում, իհարկե, կարևոր է։ Նախագահը, բնականաբար, կօգտվի այս հանդիպումից՝ ևս մեկ անգամ ներկայացնելու մեր փաստարկները։ Սակայն մենք չենք կարող ավելի հայ լինել, քան իրենք՝ հայերը։ Եվ, իհարկե, իրենց ճակատագրի վերաբերյալ որոշումը պետք է ընդունեն հենց իրենք՝ հայերը։ Մենք էլ հենց առաջարկում ենք նրանց դա անել՝ հանրաքվե անցկացնել»,- ասել է Պեսկովը։

Նա հիշեցրել է, որ նման դիրքորոշում են հայտնել նաև ԵԱՏՄ մյուս երկրների ղեկավարները, որոնք համապատասխան հայտարարություն են ընդունել Աստանայում կայացած վերջին գագաթնաժողովում։

«Հենց այդ մասին էլ կխոսվի»,- նշել է Կրեմլի ներկայացուցիչը։

Եվրոպա լիգայի 2026/27 մրցաշրջանի լիգայի փուլում իր պատմական ելույթները Հայաստանի գործող չեմպիոն «Արարատ-Արմենիան» կսկսի սեպտեմբերի 16-ին՝ սեփական հարկի տակ ընդունելով Պրահայի «Սպարտային»: ՈւԵՖԱ-ն պաշտոնապես հաստատել է մրցաշարի լիգայի փուլի խաղացանկը. գրում է Armsport.am-ը։

Երևանյան ակումբի հանդիպումների ամբողջական ժամանակացույցն ըստ Երևանի ժամանակի.

• 16 սեպտեմբերի, 20:45 | «Արարատ-Արմենիա» – «Սպարտա Պրահա» (Տնային)
• 15 հոկտեմբերի, 23:00 | «Յագելոնիա» – «Արարատ-Արմենիա» (Արտագնա)
• 22 հոկտեմբերի, 20:45 | «Արարատ-Արմենիա» – «ԱԶ Ալկմար» (Տնային)
• 5 նոյեմբերի, 00:00 | «Տորրենսե» – «Արարատ-Արմենիա» (Արտագնա)
• 26 նոյեմբերի, 21:45 | «Զալցբուրգ» – «Արարատ-Արմենիա» (Արտագնա)
• 10 դեկտեմբերի, 21:45 | «Արարատ-Արմենիա» – «ՆԵԿ Նայմեգեն» (Տնային)
• 21 հունվարի, 21:45 | «Արարատ-Արմենիա» – «Ցելյե» (Տնային)
• 28 հունվարի, 00:00 | «Միլան» – «Արարատ-Արմենիա» (Արտագնա)

Հիշեցնենք, որ «Արարատ-Արմենիան» հայկական ակումբային ֆուտբոլի պատմության մեջ առաջին թիմն է, որը հանդես է գալու Եվրոպա լիգայի խաղարկության լիգայի փուլում:

Երևանյան ակումբն այս ուղեգիրը նվաճեց ռումինական «Ունիվերսիտատեա Կրայովայի» նկատմամբ անցումային փլեյ-օֆֆում տարած դրամատիկ հաղթանակի (ընդհանուր՝ 2-1) շնորհիվ, իսկ վիճակահանությունից առաջ ընդգրկված էր 4-րդ զամբյուղում:

Այսօր Բակո Սահակյանի ծննդյան օրն է։ Ստեփանակերտում ծնված և իր ամբողջ կյանքն ու գործունեությունը Արցախի հետ կապած գործիչն այսօր իր 66-ամյակը դիմավորում է Բաքվի բանտում։

Բակո Սահակյանի կյանքի գրեթե յուրաքանչյուր փուլ կապված է Արցախի հետ՝ շարժում, պատերազմ, բանակ, անվտանգություն, նախագահություն։

88-ի շարժման ակտիվիստից` պատերազմի և անվտանգության համակարգի ղեկավար

1988-ին Բակո Սահակյանը միացավ Արցախյան շարժմանը, իսկ 1990-ից՝ ինքնապաշտպանական ուժերին։ Առաջին պատերազմի տարիներին զբաղեցրեց թիկունքի և Պաշտպանության բանակի համակարգում պատասխանատու պաշտոններ։ Պատերազմից հետո՝ 1999-ին, նշանակվեց ԼՂՀ ներքին գործերի նախարար, իսկ 2001-ին՝ Ազգային անվտանգության ծառայության տնօրեն։

85 տոկոս ձայներով՝ Արցախի նախագահ

2007 թվականի հուլիսի 19-ին կայացած նախագահական ընտրություններում Սահակյանը, որպես անկախ թեկնածու, ստացավ 59 326 ձայն(85.12 տոկոս): Սեպտեմբերի 7-ին երդվեց նախագահի պաշտոնում` Սահմանադրության և 17-րդ դարի Ավետարանի վրա։ Սահակյանը պաշտոնավարեց գրեթե 13 տարի՝ մինչև 2020-ի մայիսը՝ դառնալով Արցախի ամենաերկար պաշտոնավարած նախագահը։

13 տարվա նախագահություն՝ պետական ու տնտեսական զարգացում

Սահակյանի նախագահության տարիներին Արցախում իրականացվեցին խոշոր ենթակառուցվածքային ծրագրեր՝ կառուցվեցին և վերակառուցվեցին ճանապարհներ, ընդլայնվեց ջրամատակարարման համակարգը, զարգացան էներգետիկ ենթակառուցվածքները։ Արցախի բնակչությունը աճեց 10 հազարով, ՀՆԱ-ն 1490 դոլարից հասավ 4800 դոլարի։ Իսկ Արցախի համար արտադրվող և երկրի ներքին պաշարը բավարարող 90 կիլովատ էլեկտրաէներգիան հասավ արտահանման ծավալների` 479 միլիոն կիլովատի։

Քառօրյա պատերազմ՝ Սահակյանի ղեկավարման ծանր տարիներից մեկը

2016-ի ապրիլի 1-ի լույս 2-ի գիշերը ռազմաքաղաքական ղեկավարությունն արթուն է անցկացրել։ Բակո Սահակյանը պատմում է, որ ՊԲ հրամանատարի, ԱԱԾ ղեկավարի և Ոստիկանապետի հետ մինչև գիշերվա 01։30 քննարկում էին անելիքները հարձակման դեպքում։

«Տեղյակ էինք, որ հակառակորդը իրականացնում է որոշակի շարժ, և այդ տեղեկությունը արժանացել էր իմ ուշադրությանը, և ես հրավիրել եմ քննարկելու իմ գործընկերների հետ», – պատմել է Սահակյանը։

Պատերազմից հետո նախագահն այցելեց առաջնագիծ և մարտերից տուժած բնակավայրեր։ Մայիսյան եռատոնին ընդառաջ` մայիսի 8-ի պարգևատրման արարողության ժամանակ նրա խոսքն ամփոփում էր Արցախում այդ օրերի տրամադրությունը․ «Մենք պաշտպանում ենք մեր հայրենի հողը, մեր տունն ու ընտանիքը։ Սա սրբազան պայքար է, որտեղ հաղթանակը այլընտրանք չունի»։

Հայրենիքի կորուստ և գերեվարում

2020-ի 44-օրյա պատերազմի ժամանակ Սահակյանն արդեն նախագահ չէր․ նրա պաշտոնավարման ժամկետն ավարտվել էր նույն տարվա մայիսին։ 2023-ի սեպտեմբերյան ռազմական գործողությունից և Արցախի ամբողջական հայաթափումից հետո նա չլքեց Արցախը. ռազմաքաղաքական ղեկավարության հետ մնաց Արցախում։ Հոկտեմբերի 3-ին ադրբեջանական կողմը ձերբակալեց Բակո Սահակյանին և տեղափոխեց Բաքու։

2026-ի փետրվարին Բաքվի ռազմական դատարանը նրան դատապարտեց 20 տարվա ազատազրկման` խաղաղության և մարդկության դեմ հանցագործությունների, ռազմական հանցագործությունների շինծու մեղադրանքներով։ Օգոստոսի 6-ին վերաքննիչ դատարանը դատավճիռը թողեց անփոփոխ։

Բակո Սահակյանի կենսագրությունը սկսվեց Ստեփանակերտում՝ քարահատ բանվորի աշխատանքով։ Այնուհետև նա կռվեց Արցախի համար, ղեկավարեց նրա անվտանգության համակարգը, 13 տարի նախագահեց Արցախը, իսկ այսօր՝ Արցախի կորստից հետո երրորդ անգամ ծննդյան օրը դիմավորում է Բաքվի բանտում` հոգեբանական ու ֆիզիկական ճնշման ծանր պայմաններում։

«Զանգեզուրի պղնձամոլիբդենային կոմբինատ» ՓԲԸ-ն խորը ցավով տեղեկացնում է, որ այսօր՝ օգոստոսի 30-ին, ժամը 14:00-ի սահմաններում, Ընկերության բացահանքի տարածքում տեղի է ունեցել մահվան ելքով պատահար։ Նախնական տեղեկությունների համաձայն՝ հանքաքար տեղափոխող մեքենան կողաշրջվել է, ինչի հետևանքով վարորդը մահացել է։

Դեպքի մասին անմիջապես տեղեկացվել են իրավասու պետական մարմինները։ Դեպքի հանգամանքներն ու պատճառները քննվում են։

ԶՊՄԿ-ն, իրավասու մարմինների իրականացվող քննությանը զուգահեռ, կանցկացնի նաև ներքին հետաքննություն՝ պատահարի պատճառներն ու հանգամանքները պարզելու նպատակով։

Ընկերությունն իր խորին ցավակցությունն է հայտնում մահացած աշխատակցի ընտանիքին, հարազատներին և գործընկերներին։

Ընկերությունը իր բոլոր աշխատակիցներին և կապալառուներին խստագույնս հորդորում է պահպանել անվտանգության բոլոր կանոնները։