Աշխարհի առաջին քրիստոնյա երկիրը համարվող Հայաստանի առաքելական եկեղեցու առաջնորդը և վեց այլ բարձրաստիճան հոգևորականներ ուրբաթ կդատվեն Նիկոլ Փաշինյանի կառավարության հետ դաժան պայքարի վերջին սրման ֆոնին․ գրում է Reuters-ը։
Գարեգին Բ կաթողիկոսը, որը ղեկավարում է Եկեղեցին 1999 թվականից, մյուս մեղադրյալների հետ միասին մեղադրվում է այն բանի համար, որ չի կատարել քաղաքացիական դատարանի որոշումը, որով ժամանակավորապես վերականգնվել էր եպիսկոպոսներից մեկի (Արման Սարոյան) պաշտոնավարումը, որին Եկեղեցին նախկինում կարգալույծ էր արել։
Մեղավոր ճանաչվելու դեպքում նրանց սպառնում է մինչև 2 տարի ազատազրկում։
Այս գործը Հայ առաքելական եկեղեցու ղեկավարության համար մինչ օրս առկա ամենակարևոր իրավական մարտահրավերն է․ դա տեղի է ունենում Եկեղեցու և պետության միջև խորացող լարվածության ֆոնին։
Հունիսին վերընտրված Փաշինյանը ստացել է Եվրոպական միության ուժեղ աջակցությունը, քանի որ փորձում է Հայաստանը մոտեցնել Արևմուտքին և հեռու պահել Ռուսաստանի ուղեծրից։ Սակայն ընդդիմադիր քաղաքական գործիչները, Եկեղեցու առաջնորդները և քաղաքացիական հասարակության խմբերը պնդում են, որ կաթողիկոսի նկատմամբ քրեական հետապնդումը քաղաքական դրդապատճառներ ունի և կառավարության քննադատների նկատմամբ ավելի լայնածավալ հետապնդման մաս է:
«Իրավունքների պաշտպանություն առանց սահմանների» հայկական ոչ առևտրային կազմակերպության իրավաբան Աննա Մելիքյանն ասել է, որ գործը խախտում է Առաքելական եկեղեցու սահմանադրական անկախությունը։
«Սա գործադիր իշխանության ակնհայտ միջամտություն է Եկեղեցու գործերին», – նշել է նա։
Փաշինյանի գրասենյակը և դատախազությունը չեն արձագանքել մեկնաբանության խնդրանքներին: Փաշինյանը բազմիցս կոչ է արել Ամենայն հայոց կաթողիկոսին հրաժարական տալ և մեղադրել է Առաքելական եկեղեցուն՝ առանց ապացույցներ ներկայացնելու, որպես օտարերկրյա տերությունների, մասնավորապես՝ Ռուսաստանի լիազորված անձ գործելու համար: Եկեղեցին հերքում է դա։
Առաքելական եկեղեցին միլիոնավոր հետևորդներ ունի Հայաստանում և ամբողջ աշխարհում։ Եկեղեցու պաշտոնյաները պնդում են, որ վերջին տարիներին մի քանի հոգևորականների ձերբակալությունները քաղաքական դրդապատճառներ են ունեցել:
Երկու տարի առաջ մեկ այլ հայտնի հոգևորական՝ Բագրատ Գալստանյանը, որն այժմ տնային կալանքի տակ է՝ սպասելով դատավարությանը, գլխավորել է Փաշինյանի դեմ փողոցային բողոքի ցույցերն՝ Ադրբեջանին արված տարածքային զիջումների համար: Կաթողիկոսն ինքը կրկնել է վարչապետի հրաժարականի կոչերը։