Category: Armbanks

ԵՐԵՎԱՆ, 11 հունիսի. /ԱՌԿԱ/.   Արժույթի միջազգային հիմնադրամը շարունակական հանձնառություն ունի  Հայաստանի իշխանությունների հետ սերտ և երկարատև համագործակցության առումով։

Այս մասին ասվում է Արժույթի միջազգային հիմնադրամի գործադիր տնօրեն Կրիստալինա Գեորգիևայի՝ ՀՀ վարչապետ Նիկոլ Փաշինյանին ուղղված  շնորհավորական ուղերձում։

«Միջազգային անորոշության և տարածաշրջանային մարտահրավերների ժամանակաշրջանում Հայաստանի շարունակական հանձնառությունը երկխոսությանը, կայունությանը և խաղաղ հարաբերություններին առանձնահատուկ նշանակություն ունի ինչպես Հայաստանի, այնպես էլ ավելի լայն տարածաշրջանի համար»,-ասվում է ուղերձի տեքստում։

Կրիստալինա Գեորգիևայի խոսքով, վարչապետի առաջնորդությունն արժեքավոր հնարավորություն է տալիս առաջ մղելու քաղաքականության բարեփոխումները, որոնք կբարձրացնեն դիմադրողականությունը, կամրապնդեն մակրոտնտեսական կայունությունը, կխթանեն ներառական և կայուն աճը և կբարելավեն հայ ժողովրդի բարեկեցությունը։

Ընտրությունների մասին
 
ԱԺ ընտրությունները տեղի են ունեցել հունիսի 7-ին: Դրանց մասնակցել է 18 քաղաքական ուժ, որոնցից 15-ը չեն հաղթահարել խորհրդարան անցնելու համար անհրաժեշտ 4% նվազագույն շեմը:
Ըստ ընտրությունների նախնական արդյունքների՝ խորհրդարան են անցնում իշխող «Քաղաքացիական պայմանագիր» կուսակցությունը՝ 49,825% ձայներով, ընդդիմադիր «Ուժեղ Հայաստան» դաշինքը՝ 23,281% և «Հայաստան» դաշինքը՝ 9,934%:
Ընդդիմադիր «Բարգավաճ Հայաստան» կուսակցության օգտին քվեարկել է ընտրողների 3,996%-ը. նրան մի քանի տասնյակ ձայն չի բավականացրել անցողիկ շեմը հաղթահարելու համար:

Ընտրությունների վերջնական արդյունքները կհրապարակվեն հունիսի 14-ին:

Միևնույն ժամանակ, մի շարք ընդդիմադիր քաղաքական կուսակցություններ հայտնել են քվեարկության արդյունքների վերանայում նախաձեռնելու մտադրության մասին՝ հայտարարելով իշխանությունների կողմից վարչական ռեսուրսի կիրառման և ընտրողների նկատմամբ ճնշումների մասին: Երեք քաղաքական ուժ՝ «Բարգավաճ Հայաստան», «Միասնության թևեր» կուսակցությունները և «Հայաստան» դաշինքը, արդեն իսկ դիմում են ներկայացրել ԿԸՀ՝ 2005 ընտրական տեղամասերից 555-ում քվեարկության արդյունքների վերահաշվարկի պահանջով:

ԵՐԵՎԱՆ, 11 հունիսի․/ԱՌԿԱ/․ Իդրամն ու IDBank-ը շարունակում են արդեն ավանդույթ դարձած ֆինանսական և թվային գրագիտության դասընթացների շարքը։

Այս անգամ հերթը Արաբկիրի շախմատի դպրոցի սաներինն էր։ Դասընթացին մասնակցեց շուրջ 50 աշակերտ, ովքեր ստացան ֆինանսական աշխարհի, գումարի ճիշտ տնօրինման, զեղծարարություններից պաշտպանվելու մասին արժեքավոր գիտելիքներ։

Օրերս այստեղ անցկացվեց նաև Yerevan Spring ID Cup մրցաշարը, որի գլխավոր հովանավորն էր IDBank-ը։ Լարված պայքարի արդյունքում բացի հիմնական մրցանակներից, հաղթողները ստացան նաև IDBank-ի կողմից սահմանված դրամական պարգևներ։

Խոսելով արդեն ավանդույթ դարձած այս նախաձեռնության մասին՝ IDBank-ի և Իդրամի Հաղորդակցության և սոցիալական պատասխանատվության ծրագրերի վարչության ղեկավար Տաթևիկ Վարդևանյանն ընդգծեց դրա կարևորությունն ու թողած դրական ազդեցությունը դպրոցի սաների շրջանում․ «Շախմատն ու ֆինանսական գրագիտությունը շատ ընդհանուր գծեր ունեն. երկուսն էլ հիմնված են մաթեմատիկական մտածողության, ռազմավարության և ծրագրերը մի քանի քայլ առաջ պլանավորելու ունակության վրա։ Աշակերտները մեծ հետաքրքությամբ և ակտիվությամբ մասնակցեցին քննարկումներին, նաև ստացան իրենց հուզող հարցերի պատասխանները։ Ուրախ ենք, որ կարողանում ենք օգտակար լինել մեր հասարակությանը՝ բարձրացնելով ֆինանսական ոլորտի վերաբերյալ տեղեկացվածության մակարդակը»։

IDBank-ն ու Իդրամը շարունակում են «Ֆինանսապես գրագետ Իդրամի և IDBank-ի հետ» նախաձեռնությունը՝ նպատակ ունենալով նպաստել համայնքների զարգացմանն ու բնակչության շրջանում ֆինանսական և թվային գրագիտության տարածմանը։

ԸՆԿԵՐՈՒԹՅՈՒՆՆԵՐԸ ՎԵՐԱՀՍԿՎՈՒՄ ԵՆ ՀՀ ԿԲ ԿՈՂՄԻՑ

ԵՐԵՎԱՆ, 10 հունիսի․/ԱՌԿԱ/․ 2026 թվականի հունիսի 10-ին Հայաստանի արտարժույթի շուկայում ձևավորված ԱՄՆ դոլարի միջին փոխարժեքը հայկական դրամի նկատմամբ հունիսի 9-ի համեմատ նվազել է 0.01 կետով՝ կազմելով 368.44 դրամ։

Կենտրոնական բանկի կայքում նշվում է, որ եվրոն նույնպես նվազել է 0.56 կետով՝ կազմելով 425.59 դրամ, իսկ ռուբլին՝ 0.0002 կետով՝ կազմելով 5.1179 դրամ։

ԵՐԵՎԱՆ, 10 հունիսի․/ԱՌԿԱ/․ 2025 թվականի ընթացքում Հայաստանի հարկ վճարողներին է վերադարձվել շուրջ 409,2 մլրդ դրամ, ինչը 16,6 մլրդ դրամով կամ 4,2%-ով ավելի է նախորդ տարվա ցուցանիշից, հայտարարել է Պետական եկամուտների կոմիտեի  նախագահ Էդուարդ Հակոբյանը։

«Հիփոթեքային վարկերի գծով եկամտային հարկի վերադարձի մասով քաղաքացիներին է վերադարձվել շուրջ 95,6 մլրդ դրամ, ինչը 27 մլրդ դրամով կամ 39,4%-ով ավելի է նախորդ տարվա համեմատ», – ասել է Հակոբյանը ՀՀ ԱԺ Տնտեսական հարցերի մշտական հանձնաժողովի նիստում։

Նա նաև հայտնել է, որ սոցիալական ծախսերի փոխհատուցման ծրագրի շրջանակում, 2023–2024 թվականների համար ներկայացված հաշվարկներով, քաղաքացիներին է փոխհատուցվել 5,8 մլրդ դրամ։

«Այս ցուցանիշը 2024 թվականին վճարված փոխհատուցումների ծավալը գերազանցում է 5,4 մլրդ դրամով կամ 1604,6%-ով», — նշել է ՊԵԿ նախագահը։

Հակոբյանն ընդգծել է, որ փոխհատուցված սոցիալական ծախսերի գումարները ներառված չեն պետական բյուջեի եկամուտների ցուցանիշում, որը 2025 թ․-ի արդյունքներով ֆիքսվել է 2 տրլն 725,2 մլրդ դրամի չափով։