Category: Hraparak

«100+ հայ կանայք» նախաձեռնությունը նախորդ շաբաթ հրապարակել էր «Հանրային կոչ՝ կոտրել լռության շղթան» խորագրով բաց հայտարարությունը՝ միջազգային հանրության ուշադրությունը հրավիրելով Հայաստանում, նախաձեռնության գնահատմամբ, ժողովրդավարության, օրենքի գերակայության եւ մարդու հիմնարար իրավունքների պաշտպանության ոլորտներում առկա մտահոգիչ զարգացումների վրա։

Մեկ շաբաթ առաջ նախաձեռնությունը, որը միավորում է կին գիտնականների, մշակույթի գործիչների, ձեռներեցների եւ տարբեր ոլորտների քաղաքացիական առաջնորդների, պաշտոնական դիմում-բողոք էր ուղարկել Հայաստանում հավատարմագրված օտարերկրյա դիվանագիտական առաքելություններին եւ միջազգային կառույցներին։ Դիմումն ուղղված էր ԱՄՆ-ի, Եվրոպական Միության եւ ԵՄ անդամ պետությունների դեսպաններին, Հայաստանում ՄԱԿ-ի մշտական համակարգողին, Եվրոպայի խորհրդի, ԵԱՀԿ-ի, ԵԽԽՎ-ի, ինչպես նաեւ միջազգային իրավապաշտպան կազմակերպությունների ղեկավարներին։

Դիմումում ներկայացվել էին նախաձեռնության մտահոգությունները՝ կապված դատական իշխանության անկախության, օրենքի գերակայության, քաղաքական եւ քաղաքացիական իրավունքների պաշտպանության, խոսքի եւ ակադեմիական ազատությունների, սեփականության իրավունքի, ինչպես նաեւ՝ հանրային կյանքի ժողովրդավարական սկզբունքների պահպանման հետ։

Նախաձեռնության անդամներից մեկից՝ ԱԺ նախկին պատգամավոր Աննա Կոստանյանից, «Հրապարակը» հետաքրքրվեց` ի՞նչ շարժառիթով էին արել վերոնշյալ կոչը միջազգային հանրությանը: Քաղբանտարկյալ Արեգնազ Մանուկյանի թեման նույնպես կին ընդդիմադիր գործիչների ուշադրության կենտրոնում է, արդյո՞ք այն եւս նպաստել է նման հայտարարությամբ հանդես գալուն, թե՞ ոչ:

Կոստանյանը, մեզ հետ զրույցում անդրադառնալով թեմային, նկատեց. «Անկեղծ ասած, ինձ մոտ տպավորություն է, որ Արեգնազ Մանուկյանի մասին բավականին քիչ է խոսվում, եւ հիմնականում եթե խոսում են, խոսում են կանայք: Ինչ վերաբերում է հայտարարությանը, ապա այն Հայաստանի հետընտրական զարգացումներին, մասնավորապես` բռնաճնշումներին է վերաբերում:

Ընտրությունների օրվանից սկսած, տեղի են ունեցել տեսանելի խախտումներ, քվեներ են գողացվել` ԿԸՀ-ի կողմից, իսկ այդ ամենի նախադրյալները ստեղծել էր Նիկոլ Փաշինյանը` հաշվարկը չավարտված՝ որոշ հայտարարություններ անելով: 100-ից ավելի կանայք ստորագրել են այս նամակի տակ, իրենց համաձայնությունը տալով, որ այն ուղարկվի միջազգային կազմակերպություններին, ՀՀ-ում գտնվող որոշ դեսպանատների, խնդրելով հանդիպում տվյալ հաստատությունների ներկայացուցիչների հետ` դեմառդեմ, որպեսզի իրավիճակը ներկայացնենք ավելի կոնկրետ: Այս պահի դրությամբ չկա արձագանք եւ, հավանաբար, չի էլ լինի: Երբ նամակն ուղարկում էինք, չէինք էլ ակնկալում, որ այն անմիջապես արձագանք է ունենալու, սակայն մենք այս նամակով ցույց ենք տալիս, որ հայաստանյան հանրությունը քնած չէ եւ արձագանքում է ապօրինություններին: Նամակի տակ ստորագրած կանայք ոչ միայն Հայաստանից են, այլեւ՝ ողջ աշխարհից: Ներառված են տարբեր կանայք, ովքեր տարբեր ոլորտներում ունեն արձանագրած հաջողություններ: Ինչ վերաբերում է Արեգնազ Մանուկյանին, ապա պետք է նշեմ, որ կալանքը, որպես խափանման միջոց, նրա պարագայում անթույլատրելի էր, սակայն մենք պետք է առաջնորդվենք այն մտայնությամբ, որ ընդդիմադիր գործիչների դեմ հարուցված գործերն ունեն բացառապես քաղաքական ենթատեքստ, հետեւաբար, բոլոր հնարավոր միջոցները կիրառվում են: Կալանքը սովորաբար կիրառում են բացառիկ դեպքերում, երբ կա հիմնավորում: Արեգնազն ունի անչափահաս երեխա, եւ չկա որեւէ հիմնավորում, թե ինչու պետք է նա կալանքի տակ մնա: Ինչո՞վ, ինչպե՞ս պետք է նա խանգարեր գործի քննությանը կամ ինչո՞ւ պետք է լքեր երկիրը: Կալանքն օգտագործում են որպես պատժիչ միջոց, կա ակնհայտ կանխակալ վերաբերմունք ընդդիմադիր գործիչների նկատմամբ»:

Օգոստոսի 13-ին, Բերքառատի Սուրբ Նշան եկեղեցու օծման 14-րդ տարեդարձի առիթով, Ն.Ս.Օ.Տ.Տ. Գարեգին Բ Ամենայն Հայոց Կաթողիկոսի Հայրապետական տնօրինությամբ և Արագածոտնի Թեմի Առաջնորդ Գերաշնորհ Տեր Մկրտիչ եպիսկոպոս Պռոշյանի օրհնությամբ, Մայր Աթոռ Սուրբ Էջմիածնից ավանդաբար Բերքառատ կբերվի Հիսուս Քրիստոսի Խաչափայտի Մասունքարանը ու կմատուցվի Սուրբ և Անմահ Պատարագ, սկիզբը ժամը 10:00-ին:

Ուկրաինայի նախագահ Վլադիմիր Զելենսկին հայտարարել է, որ երկրի բանակցային թիմը առաջարկներ է ներկայացրել ամերիկյան կողմին՝ ռուս-ուկրաինական պատերազմում հետագա գործողությունների վերաբերյալ։

Նա նշել է, որ լսել է բանակցային թիմի զեկույցը և նաև նշեց, որ Ուկրաինան առաջարկներ է ներկայացրել ամերիկյան կողմին։

«Ամերիկան ​​կարող է օգնել մեր պաշտպանությանը, հիմնականում՝ օդային պաշտպանության ոլորտում, և ճնշում գործադրել Ռուսաստանի վրա՝ փոխելու նրա ծրագրերը՝ պատրաստվելով պատերազմի ավարտին, այլ ոչ թե դրա երկարաձգմանը», – ասել է Ուկրաինայի առաջնորդը։

ԱԺ-ում ելույթ ունենալով՝ «Ուժեղ Հայաստան» խմբակցության պատգամավոր Հարություն Հարությունյանն անդրադարձել է ապօրինի գույքի բռնագանձման ինստիտուտին՝ ընդգծելով, որ իր և խմբակցության վերաբերմունքն այդ գաղափարի նկատմամբ դրական է։

Նրա խոսքով՝ ապօրինի ձեռք բերված գույքի վերադարձը պետությանը լայնորեն կիրառվող պրակտիկա է զարգացած երկրներում, սակայն առանցքային հարցը դրա իրականացման մեթոդներն են։

«Այո, պետությունից թալանելն աններելի է, և թալանված յուրաքանչյուր կոպեկ պետք է վերադարձվի Հայաստանի Հանրապետությանը։ Մենք այս գաղափարի կրողն ենք և պետք է նպաստենք դրա իրագործմանը, բայց դա չի կարող իրականացվել քաղաքական ճանապարհով»,- հայտարարել է պատգամավորը։

Հարությունյանի համոզմամբ՝ գործընթացը պետք է իրականացվի բացառապես իրավական մեխանիզմներով։ Նա նշել է, որ գործող օրենսդրությամբ նախատեսված կարգավորումները բազմաթիվ քննադատությունների տեղիք են տալիս։

Անդրադառնալով դատական համակարգին՝ ընդդիմադիր պատգամավորը քննադատել է նաև իշխանությունների վերաբերմունքը դատարանների և դատավորների նկատմամբ։ Նրա խոսքով՝ ՔՊ-ն նախկինում շրջափակել է դատարանները և նշանակել իր նախընտրած դատավորներին։

Հարությունյանի պնդմամբ՝ դատական համակարգը կախվածության մեջ է գործադիր իշխանությունից, իսկ իշխանության հետ չհամագործակցող դատավորները տարբեր ճնշումների են ենթարկվում։ Նա մասնավորապես նշել է, որ նման դատավորների նկատմամբ կարգապահական վարույթներ են հարուցվում, որոնք կարող են ավարտվել նրանց լիազորությունների դադարեցմամբ։

Պատգամավորը նաև պնդել է, որ հատկապես Վարչական դատարանում որոշ դատավորներ ծանրաբեռնվում են մեծաքանակ գործերով, ինչը, նրա գնահատմամբ, հետագայում կարող է օգտագործվել նրանց նկատմամբ կարգապահական գործընթացներ նախաձեռնելու և պաշտոնից հեռացնելու նպատակով։

Ելույթի ավարտին Հարությունյանը ողջունել է, իր բնորոշմամբ, բոլոր քաղբանտարկյալներին՝ նշելով, որ իր բազմամյա փաստաբանական գործունեության ընթացքում Հայաստանում երբևէ չի հանդիպել քաղաքական դրդապատճառներով ազատազրկվածների նման մեծ թվի։

Այսօր՝ օգոստոսի 12-ին, Երկիր մոլորակի վրա սպասվում է G1 մակարդակի մագնիսական փոթորիկ։ Այս մասին հայտնում են ռուս գիտնականները։ Արեւային ակտիվությունը տեւել է մոտ երեք ժամ՝ ժամը 10։00-13։00-ն, ըստ Երեւանի ժամանակի։Դրանից հետո արդեն մագնիսական փոթորկը կսկսի հանգել։ Օգոստոսի 13-ին երկրամագնիսական սթրեսների եւ մագնիսական փոթորիկների հավանականությունը կլինի 55 տոկոս։ Գիտնականները նաեւ նշում են, որ ընթացիկ շաբաթը երկրամագնիսական սթրեսների եւ մագնիսական փոթորիների առումով լինելու է հարաբերականորեն հանդարտ։

«Հայաստան» դաշինքի պատգամավոր Աղվան Վարդանյանի ելույթը
Ազգային ժողովի 2026թ. օգոստոսի 11-ի նիստում

Երեկ տիկին Ջուլհակյանը մի ուշագրավ միտք ասաց. «Եթե ժողովուրդը նոր Սահմանադրություն է ուզում, արդյո՞ք պատգամավորները կարող են ընդիմանալ»։ Սա շատ հետաքրքիր ճանապարհային քարտեզ է, բայց դրան դեռ անդրադառնալու առիթներ կունենանք։
Երեկ պարոն Արմեն Խաչատրյանը, ներողություն խնդրելով, ինձ խորհուրդ տվեց։ Պարոն Խաչատրյան, այս ընթացքում ես գուցե 100 եւ ավելի անգամ եղել եմ կալանավայրերում, շփվել եմ տասնյակ ու տասնյակ աշխատակիցների հետ, որոնց բոլորին շատ հարգում եմ։ Նրանք էլ ինձ են հարգում շատ։ Խնդրում եմ՝ ինձ խորհուրդ չտալ։
Տիկին Բաղդասարյան, Նազելի, եթե հիշում ես՝ կամուրջ ես միշտ եմ եղել։
Այժմ բուն թեման, որ, կարծում եմ, ուղիղ վերաբերում է այս պետա-իրավական օրակարգին։
Նախորդ ելույթի ժամանակ խոստացել եմ՝ անում եմ։
Իշխանության բնույթի մասին

Մենք խորհրդարանական համակարգ ունեցող երկիր ենք արդեն 11 տարի։ Ի՞նչ էր ժամանակին ենթադրվում, երբ կատարվում էր այս անցումը։

Մեջբերում եմ՝ կլինի միասնական գործադիր իշխանություն՝ վարչապետի գլխավորությամբ։ Հանրապետության նախագահը կլինի վերկուսակցական, անաչառ արբիտր։ Խիստ կնվազի իշխանության անձնավորումը։
Չի լինի իշխանության գերկենտրոնացում գործադիր իշխանության ղեկավարի ձեռքում, իսկ կառավարության քաղաքական պատասխանատվությունը խորհրդարանի առջեւ կնպաստի կոլեգիալ կառավարմանը։

Կբարձրանա խորհրդարանի ինչպես օրենսդիր, այնպես էլ վերահսկողական դերակատարությունը։ Երկրում աստիճանաբար կձևավորվի իշխանություն-ընդդիմություն երկբևեռ դասական քաղաքական համակարգ։

Պետությունում կբացառվի քաղաքական, տնտեսական և վարչական ներուժի սերտաճումը։ Կլինի իրավունքի գերակայություն, մարդու հիմնական իրավունքները ու ազատությունները կապահովվեն։

Մեծամասնություն լինել չի նշանակում բոլոր հարցերի ճիշտ լուծումները իմանալ։ Քաղաքական մեծամասնությունը ու քաղաքական փոքրամասնությունը ոչ թե հակառակորդներ են, այլ մեր պետության առջեւ կանգնած խնդիրների լուծման տարբեր ճանապարհներ տեսնող մարդիկ։

Հայաստան-Արցախ-Սփյուռք եռամիասնությամբ, համագործակցաբար, ուս-ուսի տված, տարբեր մոտեցումների համադրմամբ, մենք կարող ենք հասնել արդյունավետ լուծումների։ Մեր ուժը մեր բազմակարծության մեջ է։

Արցախի հարցում ստատուս քվոյի պահպանումը մեզ համար ընդունելի է, բայց միայն ու միայն հիմնահարցի համապարփակ կարգավորման դեպքում։ Արցախի ինքնորոշման իրավունքի իրացման ու ժողովրդի անվտանգության երաշխավորման ամրագրումն այլընտրանք չունի։

Ահա այսպիսին էր նոր սահմանադրական կարգի ընձեռած հնարավորությունների պատկերացումը այն ժամանակ։

Ի՞նչ ունենք այսօր։ Իմ մեջբերումից որեւէ բան կգտնե՞ք այսօրվա իրականությունում, թե՞ ամբողջովին հակառակ պատկերն ունենք։
Պատճառը. փողոցից իշխանության եկած ուժը, ժողովրդի մեծամասնության ոգևորության ու միամտության ինչ-ինչ հաշվարկների արդյունքում, ձևավորեց մեծամասնություն խորհրդարանում, սեփականաշնորհեց գործադիր իշխանությունը և առաջնորդվում է ես եմ պետությունը, ես եմ գործադիր, օրենսդիր, դատական իշխանությունը, ուժային կառույցներն իմ ենթականերն են նարատիվներով:

Ով չի ընդունում խաղի իմ կանոնը, ներքին թշնամի է, հակապետական տարր։ Այստեղից էլ՝ ատելություն, անհանդուրժողականություն, սեփականության իրավունքի բռնաբարում, ընտրության կեղծում, քաղբանտարկյալներ։

Դեռևս 2018-ի սեպտեմբերին եմ մեջբերել՝ «ցանկացած իշխանություն այլասերում է, իսկ բացարձակ իշխանությունը՝ այլասերում է բացարձակ»։
Հայաստանում մեկ մարդու բացարձակ իշխանություն է, այն էլ՝ մի մարդու, ում համար իշխանությունը գերագույն նպատակ է։ Դրանից դուրս նա գոյություն չունի։
Մնացածը՝ պետական կառույցներ, սեփական կուսակցություն, կուսակցականներ դեկորացիաներ են՝ գերնպատակին ծառայող։

Պատկերացնո՞ւմ եք՝ որևէ կառույցի ղեկավար չենթարկվի քմահաճույք-հրահանգին, գիշերային SMS-ով դուրս կշպրտվի։
Պատկերացնո՞ւմ եք, որ որևէ քպ-ական պատգամավոր, կամ նախարար, կամ պետական պաշտոնյա Փաշինյանին հակադրվի, նրա կարծիքին հակառակ տեսակետ հայտնի։
Սա ներքին կյանքում։ Նույնը՝ արտաքին ճակատում։ Պատկերացնո՞ւմ եք, որևէ քպ-ական կամ պետական պաշտոնյա մի կծու խոսք ասի Իլհամ Ալիևի հասցեին։ Այն Ալիևի, ով Նիկոլ Փաշինյանին բազմիցս վիրավորել է ամենածաղրալի որակաորումներով։

Հարգելի հայրենակիցներ,
Բայց ե՞րբ է վերջանում ցանկացած իշխանություն կամ ե՞րբ է մոտենում նրա վերջի ժամանակը։
Ես մի չափանիշ գիտեմ՝ երբ այդ իշխանության խոսքն ու գործը, հայտարարածն ու իրականացրածը՝ հակասում են միմյանց։ Որքան խորանում, տեսանելի է դառնում հասարակության համար այդ անջրպետը, նույն արագությամբ վերջն է մոտենում։
Ասել՝ սիրում եմ ձեզ ու ատելություն տարածել, ասել՝ հպարտանում եմ ձեզանով ու մտքում ատել, ասել՝ փառք նահատակներին ու հայրենիքի համար զոհվածների մայրերին քարշ տալ ասֆալտով, հայրերին բանտարկել, ասել՝ ինքնիշխանություն, երբ օկուպացված ես, երբ Բաքվում պատանդներն են, ասել՝ Արցախը Հայաստան է եւ վերջ, հետո ասել՝ Արցախը Ադրբեջան է եւ բացականչական նշան, ասել՝ ձեռքս կկտրեմ, բայց մի ամբողջ խմբակցություն կտրել, ասել՝ Տիգրան Մուկուչյան, դարձնել Վահագն Հովակիմյան։

Հիմա այդ ընթացքն է, և հուսով եմ՝ երկար չի տևելու։ Ոչինչ հավերժ չէ։
Բայց ո՞րն է մեր նպատակը։ Որ ժամանակի մեջ հարատևի մեր ժողովուրդը ու մեր անկախ պետականությունը։

Ահա թե ինչու նույնիսկ այս անբնական տոտալ իշխանության պայմաններում մենք պարտավոր ենք ձևակերպել, թե ինչպիսի Հայաստան ու ինչպիսի հասարակություն ենք ունենալու այս մղձավանջի ստույգ ավարտից հետո։
Այդ մասին սակայն, ինչպես կասեր ԱԱԾ-ում այսօր վրեժխնդրության զոհ դարձած պարոն Ծառուկյանը, կխոսեմ հաջորդ դասին։