Category: News.am

Լիբանանի և Իսրայելի պատվիրակությունները մայիսի 13-15-ը հանդիպում կունենան Վաշինգտոնում՝ կրակի դադարեցման գործող ռեժիմի երկարաձգման պայմանները քննարկելու համար։ Դրա մասին մայիսի 6-ին հայտնել է LBCI հեռուստաալիքը՝ հղում անելով ԱՄՆ Պետքարտուղարության աղբյուրներից ստացված տեղեկությանը։

Բանակցություններում լիբանանյան կողմը կներկայացնի դիվանագետների և զինվորականների խումբը՝ ԱՄՆ-ում նախկին դեսպան Սիմոն Քարամի գլխավորությամբ։ Ավելի վաղ հանրապետության նախագահ Միշել Աունը նշել էր, որ այս փուլը հիմք կդնի ուղիղ բանակցությունների ձևաչափին անցնելու համար։ Կողմերի երկխոսությունն ընթանում է Պետքարտուղարության շենքում՝ Դոնալդ Թրամփի վարչակազմի միջնորդությամբ, և արդեն իսկ թույլ է տվել ապրիլի 17-ից հաստատել «լռության ռեժիմ», որը հետագայում երկարաձգվել էր ևս երեք շաբաթով։

Ինչպես ընդգծել է լիբանանյան կողմը, Բեյրութի համար առաջնահերթություն է զինադադարի նոր երկարաձգումը և երկրի հարավային շրջաններից օկուպացիոն ուժերի դուրսբերման ժամանակացույցի հաստատումը։ Միևնույն ժամանակ, Իսրայելն առաջադրում է ավելի կոշտ պայմաններ՝ պնդելով շիական «Հըզբոլլահ» միլիցիայի լիակատար զինաթափումը և երկարաժամկետ խաղաղության համաձայնագրի ստորագրումը։ Այսպիսով, առաջիկա հանդիպումը պետք է որոշի՝ կհաջողվի՞ արդյոք կողմերին փոխզիջում գտնել անվտանգության պահանջների և տարածքային հավակնությունների միջև։

Սպիտակ համայնքի Շենավան բնակավայրի վարչական ղեկավար Մխիթար Մխիթարյանը NEWS.am-ի հետ զրույցում կտրականապես հերքում է տարածված այն լուրը, թե ինքը ծեծի է ենթարկել Սպիտակ քաղաքի բնակիչ Գոռ Ակուլյանին։

«Նման բան չկա, հերքում եմ այդ լուրը։ Կարող եք Գոռի հետ էլ խոսել, մենք մտերիմներ ենք»,- ասաց նա և այլ բան չավելացրեց։

Մենք կապ հաստատեցինք նաև Գոռ Ակուլյանի հետ, որն ըստ լուրերի, մարմնական վնասվածներով տեղափոխվել է հիվանդանոց, հերքում էր, թե իրեն ծեծել են։

«Չկա նման բան։ Մի քաղաքի տղա ենք, ճանաչում ենք իրար։ Ես ոչ մի վնասվածք չեմ ստացել»,- պնդեց նա։

Մեր ճշտող հարցին, թե արդյո՞ք իրեն վախեցրել են, որ չխոսի դեպքի մասին, Գոռը հերքեց ու այլ հարցերի չպատասխանեց։

Հատկանշական է, որ Քննչական կոմիտեում առողջությանը միջին ծանրության վնաս պատճառելու դեպքի առթիվ կա նախաձեռնված քրեական վարույթ և կատարվում է նախաքննություն։

Ավելի վաղ «Իշխանություն» լրատվականն էր գրել, որ Շենավան բնակավայրի վարչական ղեկավար, ՔՊ-ական Մխիթար Մխիթարյանը դաժան ծեծի է ենթարկել Սպիտակ քաղաքի բնակիչ Գոռ Ակուլյանին, վերջինս մարմնական վնասվածնքներով տեղափոխվել է հիվանդանոց։ Դեպքը տեղի էր ունեցել շաբաթ օրը, Սպիտակի գազալցակայաններից մեկում։

Ցանկացած հարևանի, ներառյալ՝ Թուրքիայի հետ պետական հարաբերությունների կառուցումը պետք է հիմնված լինի բացառապես ազգային շահերի և սեփական արտադրողի պաշտպանության, այլ ոչ թե գործող իշխանությանը մատուցվող նախընտրական նվերների վրա: Մայիսի 6-ին իր համակիրներից մեկի հետ զրույցում հայտարարել է «Ուժեղ Հայաստան» կուսակցության առաջնորդ Սամվել Կարապետյանը։

Պատմելով Արմավիրի և Արարատի մարզերի բնակիչների հետ իր վերջին հանդիպումների մասին՝ փորձագետը նշել է տարածաշրջանում գյուղատնտեսության օրհասական վիճակը, որտեղ, նրա տվյալներով, մշակվում է հողերի միայն 10%-ը։ Մարդիկ խոր դժգոհություն են հայտնում վերջին ութ տարիների ընթացքում կառավարության աջակցության բացակայության և արտադրանքի իրացման հարցերում առկա անորոշության վերաբերյալ։ Ինչպես ընդգծել է Կարապետյանը. «Ինձ համար շատ զարմանալի էր, որ Արարատյան դաշտում մշակվում է հողերի ընդամենը 10%-ը, իսկ մարդիկ չեն հասկանում՝ ինչպես վաճառեն իրենց բերքը»։ Որպես համակարգային լուծում՝ նա առաջարկել է մթերման կայանների ցանցի ներդրումը, ինչը ֆերմերներին հնարավարություն կընձեռի հաշվարկել շահույթը դեռ տարեսկզբին։

Անդրադառնալով հայ-թուրքական հարաբերություններին և հունիսի 4-ին սահմանի բացման մասին լուրերին՝ քաղաքական գործիչը կարծիք է հայտնել, որ Անկարայի և Բաքվի նման քայլերը «նախընտրական նվերներ» են՝ Նիկոլ Փաշինյանին իշխանության ղեկին պահելու համար։ Սամվել Կարապետյանը նշել է. «Մենք նորմալ հարաբերություններ ենք կառուցելու Թուրքիայի հետ, սակայն ելնելով Հայաստանի շահերից. մենք սահմանի բացումը կենսական հարց չենք համարի, եթե դրանից տուժելու է մեր գյուղատնտեսությունը»։ Նա հավելել է, որ տեղական արտադրությանը սպառնացող վտանգի դեպքում անհրաժեշտ սահմանափակումներ կմտցվեն։

Զրույցում առանձնահատուկ ուշադրություն է դարձվել միջազգային հարթակներում Հայաստանի ղեկավարության պահվածքին, մասնավորապես՝ Արցախի առաջնորդների և ժողովրդի հասցեին Իլհամ Ալիևի կտրուկ հայտարարություններին արձագանքի բացակայությանը։ Կարապետյանն ընդգծել է, որ ընթացիկ քաղաքական դասավորվածության մեջ հայկական իշխանությունները փաստացի զրկված են ձայնի իրավունքից և ստիպված են լուռ լսել հայրենակիցների հասցեին հնչող մեղադրանքները։ Ըստ նրա՝ Ալիևը բացահայտորեն ցույց է տալիս եվրոպական կառույցների դիրքորոշման արհամարհումը, մինչդեռ Փաշինյանը միայն հաստատում է իր կախվածությունը հարյուր հազարավոր մարդկանց Հայաստան վերաբնակեցնելու արտաքին ծրագրերից։ Եզրափակելով միտքը՝ «Ուժեղ Հայաստան» կուսակցության առաջնորդ Սամվել Կարապետյանը շեշտել է, որ վերադարձն արժանապատվությանն ու տնտեսական աճին անհնար է առանց ներկայիս քաղաքական կուրսից վճռական հրաժարման։

ՀՀ պաշտպանության նախարար Սուրեն Պապիկյանի և Լեհաստանի փոխվարչապետ, ազգային պաշտպանության նախարար Վլադիսլավ Կոշինյակ-Կամիշի առանձնազրույցին հաջորդել է հանդիպում՝ պատվիրակությունների ընդլայնված կազմով։ Այս մասին NEWS.am-ը տեղեկանում է Պաշտպանության նախարարությունից։

Կողմերը գոհունակություն են հայտնել համագործակցության ներկայիս մակարդակի վերաբերյալ՝ ընդգծելով, որ այն արդյունավետորեն իրականացվում է երկու երկրների պաշտպանության նախարարությունների միջև ստորագրված 2026 թվականի երկկողմ պլանի համաձայն։

Որպես հետագա համագործակցության առաջնահերթ ուղղություններ՝ առանձնացվել են ռազմական կրթությունը, փորձի փոխանակումը և համատեղ վարժանքներին մասնակցությունը։

Քննարկվել է նաև ընթացիկ տարվա փետրվարին ստորագրված ռազմատեխնիկական գործակցության մասին համաձայնագրի շրջանակում ռազմատեխնիկական համագործակցության իրականացման կարևորությունը։

Նախարարները պայմանավորվել են շարունակել քննարկումները Երևանում։ Սուրեն Պապիկյանը Վլադիսլավ Կոշինյակ-Կամիշին հրավիրել է այցելել Հայաստան։

Պայմանավորվածություն է ձեռք բերվել նաև առաջիկայում Վարշավայում ՀՀ դեսպանությունում պաշտպանության հարցերով կցորդի գրասենյակ բացելու վերաբերյալ։

Զրուցակիցները կարծիքներ են փոխանակել տարածաշրջանային և միջազգային անվտանգության հարցերի վերաբերյալ:

Հանդիպմանը մասնակցել է նաև Լեհաստանում Հայաստանի արտակարգ և լիազոր դեսպան Ալեքսանդր Արզումանյանը։

ԱՄՆ նախագահ Դոնալդ Թրամփը PBS հեռուստաընկերությանը տված հարցազրույցում հաստատել է Իրանի հետ մասշտաբային համաձայնագրի նախապատրաստումը, որը կարող է ստորագրվել մինչև մայիսի 14-15-ը նախատեսված նրա այցը Չինաստան։ Գործարքի առանցքային և անզիջում պայմաններից մեկը ամերիկյան առաջնորդն անվանել է իրանական միջուկային վառելիքի ամբողջական տեղափոխումը Միացյալ Նահանգների տարածք։ Ըստ Թրամփի՝ դա սոսկ «հնարավոր» տարբերակ չէ, այլ Վաշինգտոնի հաստատված պահանջը։

Ըստ քննարկվող ծրագրի՝ Թեհրանը պետք է դադարեցնի իր ստորգետնյա միջուկային օբյեկտների աշխատանքը և համաձայնի ավելի քան 10 տարի ժամկետով ուրանի հարստացման ծրագրի սառեցմանը։ Միևնույն ժամանակ, Թրամփը կտրականապես հերքել է այն տեղեկությունը, ըստ որի այդ ժամկետի լրանալուց հետո Իրանին կրկին կթույլատրվի ուրանը հարստացնել մինչև 3,67% մակարդակը։ Այդ պայմանների կատարման դիմաց ԱՄՆ-ն խոստանում է թուլացնել պատժամիջոցների ճնշումը և դիտարկել իրանական ակտիվների ապասառեցման հարցը։

Դիվանագիտական գործընթացն ակտիվացել է պակիստանցի միջնորդների միջոցով փոխանցված՝ կոմպրոմիսի գնալու Թեհրանի պատրաստակամության ազդակներից հետո։ Ի պատասխան դրան՝ Սպիտակ տունն արդեն դադարեցրել է «Project Freedom» ռազմական գործողությունը Հորմուզի նեղուցում։ Ակնկալվում է, որ կողմերը կթևակոխեն 30-օրյա բանակցային փուլ՝ բոլոր վիճելի հարցերի վերջնական համաձայնեցման համար, ներառյալ ծովային ուղիների անվտանգության ապահովումը։

Չնայած գործարքի հաջողության «շատ լավ հնարավորություններին»՝ Դոնալդ Թրամփը պահպանում է ծայրահեղ կոշտ դիրքորոշում երկխոսության հնարավոր ձախողման դեպքում։ Նախագահն ընդգծել է, որ եթե մոտ ժամանակներս համաձայնությունը ձեռք չբերվի, Միացյալ Նահանգները կվերադառնան ակտիվ ռազմական գործողությունների։ «Մենք ստիպված կլինենք դարձյալ անխնա ռմբակոծել նրանց։ Ամեն ինչ շատ պարզ է»,- ամփոփել է երկրի ղեկավարը։

Առողջապահության համաշխարհային կազմակերպության ղեկավար Թեդրոս Ադհանոմ Գեբրեյեսուսը պաշտոնապես հերքել է այն մտավախությունները, թե MV Hondius զբոսանավի վրա հանտավիրուսի բռնկումը կարող է ՔՈՎԻԴ-19-ի նման նոր համավարակի սկիզբ դառնալ։ Լրագրողների ուղղակի հարցին՝ իրադարձությունների հնարավոր նմանության առնչությամբ, ԱՀԿ ղեկավարը բացասական պատասխան է տվել՝ ընդգծելով, որ ներկա փուլում համաշխարհային հանրային առողջապահության համար ռիսկը ցածր է գնահատվում։

Արգենտինայից Կաբո Վերդեի վրայով դեպի Կանարյան կղզիներ ընթացող նավի վրա հայտնաբերվել է հիվանդության ութ դեպք, որոնցից երեքը հաստատվել են լաբորատոր եղանակով։ Ողբերգությունն արդեն խլել է երեք մարդու՝ Նիդերլանդների և Գերմանիայի քաղաքացիների կյանք, ևս երեք տուժածներ շտապ տարհանվել են հոլանդական կլինիկաներ։ Չնայած դրան, Առողջապահության համաշխարհային կազմակերպությունը արտակարգ կոմիտե գումարելու անհրաժեշտություն չի տեսնում։ Փորձագետների հանգստությունը բացատրվում է հանտավիրուսների բնույթով. դրանք փոխանցվում են հիմնականում կրծողներից, իսկ մարդուց մարդուն վարակի փոխանցման դեպքերը չափազանց հազվադեպ են, ինչը բացառում է վիրուսի լայնածավալ տարածումը։  

Այս պահին ԱՀԿ-ն համակարգում է ջանքերը մի քանի երկրների իշխանությունների, ներառյալ՝ Իսպանիայի, Միացյալ Թագավորության և Հարավաֆրիկյան Հանրապետության հետ՝ նավի վրա գտնվող 147 մարդկանց հսկողության տակ պահելու համար։ Ակնկալվում է, որ Կաբո Վերդեի ափերի մոտ անհրաժեշտ բժշկական ընթացակարգերի ավարտից հետո զբոսանավը կուղևորվի Իսպանիա, որտեղից ուղևորները կուղարկվեն տուն:

ՏԿԵ նախարար Դավիթ Խուդաթյանն այսօր ընդունել է ԱՄՆ պետքարտուղարի՝ եվրոպական և եվրասիական հարցերով փոխտեղակալ Սոնաթա Քոուլթերի գլխավորած պատվիրակությանը։ Այդ մասին տեղեկանում ենք նախարարի Ֆեյսբուքի էջից:

«Ողջունել եմ հյուրերին և բարձր եմ գնահատել ԱՄՆ կառավարության հետ առկա հարուստ աշխատանքային օրակարգը՝ ընդգծելով երկկողմ համագործակցության շարունակական զարգացման կարևորությունը և պատրաստակամությունը՝ համատեղ ծրագրերի իրականացման ուղղությամբ։

Հանդիպման ընթացքում քննարկել ենք TRIPP նախագծի վերաբերյալ մի շարք հարցեր»,- գրել է Դավիթ Խուդաթյանը։

Մալայզիայի տիրակալ սուլթան Իբրահիմի ինքնաթիռը վայրէջք է կատարել Մոսկվայում. հայտնում է РИА Новости-ն։ Օդանավը Մալայզիայից դուրս էր եկել մայիսի 6-ի առավոտյան։

 Սուլթանը ժամանել է Ռուսաստանի նախագահ Վլադիմիր Պուտինի հրավերով՝ մասնակցելու Հաղթանակի տոնի առթիվ կազմակերպված տոնական միջոցառումներին։ Դրա մասին հաղորդվում է թագավորի ֆեյսբուքյան պաշտոնական էջում։

Ավելի վաղ Ռուսաստանի նախագահի օգնական Յուրի Ուշակովը հայտնել էր, որ մի շարք օտարերկրյա առաջնորդներ մտադիր են մայիսի 9-ին այցելել Մոսկվա։ Կրեմլը խոստացել է հյուրերի ամբողջական ցանկը հրապարակել ավելի ուշ։