Category: Oragir.news

ԱԺ նախկին պատգամավոր Տիգրան Աբրահամյանը գրում է․

«Իշխանությունը քաղաքական գլխավոր մրցասպարեզում բարեկրթության ակնկալիքից է խոսում, իսկ ինքը շարժվում է հաշվեհարդարի գործիքակազմով։

Մեկից բիզնես են խլում, մյուսից` ազատություն, երրորդից փորձում են խլել կրոնական համոզմունքներն ու ազատությունը։

Ունի՞ այս ռեժիմը որևէ սահման, որը դեռ չի հատել։ Կարծում եմ դժվար։ Խնդիր ունի՞ Վեհափառին, եպիսկոպոսներին դատարաններ, քննչականներ, դատախազություններ կամ բանտեր տանելու։ Միանշանակ ոչ։

Ամենուրեք պետք է պաշտպանել Հայոց Եկեղեցին, սակայն այս ամենին վերջ տալու, հանդարտվելու և խաղաղվելու ճանապարհն իշխանափոխությունն է։

Եթե գործընթացների կենտրոնացումն այդ ուղղությամբ չէ կամ դրան հասնելու համար պատշաճ աշխատանք չի տարվում, ապա ռեժիմին իր անբարոյական ու կազմաքանդող քայլերում կանգնեցնել չի լինի»։

ԱՄՆ նախագահ Դոնալդ Թրամփը լրագրողների հետ ճեպազրույցում կարծիք է հայտնել, որ Իրանի հետ պատերազմը շատ շուտով կավարտվի, քանի որ իրանական զինված ուժերը որոշ զինատեսակների առնչությամբ լուրջ խնդիրների են բախվել և չեն կարող երկար ձգել հակամարտությունը։

Այս հայտարարությունը հնչել է Reuters գործակալության այն հաղորդագրության ֆոնին, ըստ որի՝ հինգամսյա պատերազմի ընթացքում ամերիկյան բանակը սպառել է բարձր ճշգրտության հեռահար հրթիռների պաշարների զգալի մասը։

Ինչպես հայտնում է Reuters-ը՝ անդրադառնալով զինամթերքի դեֆիցիտի վերաբերյալ հարցին՝ Թրամփը նշել է, որ ԱՄՆ-ն ունի որոշակի տեսակի շատ հզոր զինատեսակներ, որոնց պաշարները փաստացի անսահմանափակ են, թեև ընդունել է, որ այլ տեսակներ մի փոքր ավելի սուղ են։

Նախագահի խոսքով՝ ամերիկյան ռազմաարդյունաբերական ընկերություններն արդեն իսկ կառուցում են արտադրական նոր գործարաններ, այդ թվում՝ Patriot և Tomahawk հրթիռների արտադրության համար։

Եկատերինբուրգում գտնվող Wildberries-ի լոգիստիկ կենտրոնը ենթարկվել է անօդաչու թռչող սարքերի հարձակման, ինչի հետևանքով տարածքում հրդեհ է բռնկվել. ընկերությունից հայտնել են, որ օբյեկտը նախապես տարհանվել է, տուժածներ չկան, իսկ հրշեջներն իրականացնում են մարման աշխատանքներ։

Ինչպես հայտնում է BBC-ն ուկրաինական մոնիթորինգային ալիքներն արդեն հրապարակել են հարվածի պահն ու ծխի ամպերը ֆիքսող տեսանյութեր, իսկ նահանգապետ Դենիս Պասլերը հայտարարել էր տարածաշրջանում օդային տագնապի մասին։

Սա վերջին երկու շաբաթվա ընթացքում ռուսական առցանց շուկաների պահեստների վրա Ուկրաինայի զինված ուժերի արդեն 15-րդ նմանատիպ հարձակումն է։

Թամարա Քալանթարյան

«Զանգվածային հարձակում է լինելու… սպասեք, մի անհանգստացեք, նրանք ուզում են բանակցել»:

Սա թատերական դիվանագիտություն է, որը կրկնվում է։ Այս մասին հայտարարել է Իրանի խորհրդարանի խոսնակ Մոհամմադ Բաղեր Ղալիբաֆը՝ խոսելով ԱՄՆ-ի հայտարարությունների մասին։

«Ծաղրը խախտված խոստումների և կեղծ լուրերի հետ որպես լծակ օգտագործելը ձախողված ռազմավարություն է։

Ճանաչեք փաստերը և կատարեք ձեր պարտավորությունները: Մեզ ավելի շատ թատրոն պետք չէ»,-գրել է նա։

Ուկրաինայի նախագահ Վլադիմիր Զելենսկին հինգշաբթի՝ օգոստոսի 6-ին, ստորագրել է հրամանագրեր Խորվաթիայում, Ալբանիայում և Չեռնոգորիայում Ուկրաինայի դեսպաններին պաշտոնից ազատելու մասին, հայտնում է «Европейская правда»-ն։

Ըստ №709/2026 հրամանագրի՝ Խորվաթիայում Ուկրաինայի արտակարգ և լիազոր դեսպանի պաշտոնը լքել է Վասիլի Կիրիլիչը։

Մեկ այլ՝ №710/2026 հրամանագրով Զելենսկին դադարեցրել է Վլադիմիր Շկուրովի լիազորությունները Ալբանիայում Ուկրաինայի դեսպանի պաշտոնում։ Նա այդ պաշտոնը զբաղեցնում էր 2020 թվականի ապրիլից։

Բացի դրանից, №711/2026 հրամանագրով պաշտոնից ազատվել է Չեռնոգորիայում Ուկրաինայի դեսպան Օլեգ Գերասիմենկոն։

Ավելի վաղ՝ օգոստոսի 3-ին, Զելենսկին պաշտոնանկ էր արել ԱՄՆ-ում Ուկրաինայի դեսպան Օլգա Ստեֆանիշինային։ Մի քանի օր անց Բարձր հակակոռուպցիոն դատարանը նրա նկատմամբ որպես խափանման միջոց ընտրել էր 6 միլիոն գրիվնա չափով գրավ՝ հնարավոր ապօրինի հարստացման և ոչ հավաստի հայտարարագրման գործով։

Ստեֆանիշինան հայտարարել է, որ գրավը մուծելու համար դատարանի սահմանած անհրաժեշտ միջոցների չի տիրապետում։

Դամասկոսում միկրոավտոբուսում տեղի ունեցած պայթյունի հետևանքով 2 մարդ զոհվել է, 13-ը՝ վիրավորվել, հայտնել են Սիրիայի առողջապահության նախարարությունից

Նախնական տեղեկություններով՝ միկրոավտոբուսում պայթուցիկ սարք է պայթել։

Հնդկաստանի վարչապետ Նարենդրա Մոդին և Իսրայելի վարչապետ Բենյամին Նեթանյահուն հեռախոսազրույցի ընթացքում քննարկել են երկկողմ համագործակցությունը և Մերձավոր Արևելքում տիրող իրավիճակը։

«Հեռախոսազրույց ունեցա վարչապետ Բենյամին Նեթանյահուի հետ։ Մենք քննարկեցինք Հնդկաստանի և Իսրայելի միջև հատուկ ռազմավարական գործընկերության տարբեր ասպեկտների զարգացումը, որը շարունակում է ամրապնդվել։ Մենք նաև մտքեր փոխանակեցինք Մերձավոր Արևելքում տիրող իրավիճակի վերաբերյալ»,- ինչպես հաղորդում է «Արմենպրես»-ը, վկայակոչելով «ՏԱՍՍ»-ը, այս մասին X-ում գրել է Մոդին։

Ինչպես առանձին հայտարարության մեջ նշել է Հնդկաստանի կառավարության մամուլի ծառայությունը, կառավարությունների ղեկավարները «վերահաստատել են իրենց հանձնառությունը՝ հետագայում ամրապնդելու երկկողմ համագործակցությունը տարբեր ոլորտներում՝ ի շահ երկու երկրների»։ Կողմերը պայմանավորվել են շարունակել շփումները։