Category: TopNews.am

Միասնական սոցիալական ծառայությունից տեղեկացնում են, որ կենսաթոշակների և նպաստների վճարման համար սահմանված որոշակի ծառայություններից Միասնական սոցիալական ծառայության ներկայացուցչի միջոցով օգտվելու և բանկային նվազագույն ծառայությունների հասանելիությունն ապահովելու նոր կարգավորման մասին։

Կենսաթոշակի վճարման ընթացքում իր ինքնուրույն գործողություններով (այդ թվում՝ լիազորագրով) օգտվելու հնարավորություն չունեցող կենսաթոշակառուն կամ նպաստառուն կարող է Միասնական սոցիալական ծառայության ներկայացուցչի միջոցով՝

• ձեռք բերել բանկի հաճախորդի իրավունքներ,

• շահառուի անունից կնքել բանկային հաշվի պայմանագիր,

• օգտվել հիմնական բանկային ծառայություններից։

Դրա համար քաղաքացին կարող է գրավոր, հեռախոսազանգով կամ այլ անձի միջոցով Ծառայությանը ներկայացնել դիմում՝ նշելով կոնկրետ պահանջվող ծառայությունը։

Ծառայության ներկայացուցչի միջոցով կենսաթոշակառուն կարող է ներկայացնել նաև կենսաթոշակին առնչվող ցանկացած դիմում, այն դեպքում, երբ օրենսդրությամբ նախատեսված է այդ դիմումն անձամբ ներկայացնելու պահանջ, սակայն նա չի կարող այդ պահանջը կատարել իր ինքնուրույն գործողություններով։

Այս դեպքում դիմումը սահմանված կարգով Ծառայություն ներկայացնելու գործառույթն իրականացվում է տարածքային կենտրոնների համապատասխան աշխատակիցների կողմից՝ կենսաթոշակառուի տնային կամ գտնվելու վայր այցելությունների միջոցով։

Էստոնիայի իշխանությունները Ռուսաստանին մեղադրել են Տալլինում գործող Milrem Robotics պաշտպանական ընկերության շենքի հրկիզումը կազմակերպելու մեջ։ Էստոնիայի պաշտոնյաների պնդմամբ՝ հրդեհը կազմակերպվել է ռուսական հետախուզական ծառայությունների հանձնարարությամբ։

Կրեմլը մեղադրանքներն անհիմն է անվանել։ Էստոնիայի վարչապետ Քրիստեն Միխալը հայտարարել է, որ ռուսական հետախուզական գործակալություններն են կանգնած Milrem Robotics-ի շենքում տեղի ունեցած հրդեհի հետևում։ Ընկերությունը մասնագիտացած է անօդաչու ցամաքային համակարգերի արտադրության մեջ և սարքավորումներ է մատակարարում Ուկրաինային։ Հրդեհը Տալլինում գտնվող ընկերության տարածքում բռնկվել է օգոստոսի 15-ի գիշերը։

ՀՀ քննչական կոմիտեից 1lurer.am-ին հայտնում են, որ դատարանը սցենարիստ Վահրամ Սահակյանի նկատմամբ խափանման միջոց է ընտրել վարչական հսկողությունը։ Սահակյանը ձերբակալվել է Facebook-ում ատելություն հրահրելու և քարոզելու վերաբերյալ հրապարակում կատարելու համար։

ՔԿ-ն հաղորդագրություն է տարածել՝ նշելով, որ ՀՀ քննչական կոմիտեի պետության, սահմանադրական կարգի հիմունքների և հասարակական անվտանգության դեմ ուղղված հանցագործությունների քննության գլխավոր վարչությունում նախաձեռնված քրեական վարույթի նախաքննության ընթացքում առերևույթ փաստական տվյալներ են ձեռք բերվել այն մասին, որ 2025 թվականի հունվարի 8-ին Վահրամ Սահակյանը, օգտագործելով տեղեկատվական և հաղորդակցական տեխնոլոգիաները, ֆեյսբուքյան իր էջում կատարել է ատելություն, անհանդուրժողականություն, թշնամանք հրահրելու և քարոզելու վերաբերյալ հրապարակում:

«2026 թվականի սեպտեմբերի 1-ին ստացված փորձաքննության եզրակացությամբ հաստատվել է, որ Վ.Ս.-ի հրապարակումը պարունակում է ատելություն:

Սեպտեմբերի 29-ին Վ.Ս.-ի նկատմամբ հսկող դատախազի որոշմամբ հարուցվել է հանրային քրեական հետապնդում՝ Քրեական օրենսգրքի 329-րդ հոդվածի 2-րդ մասի 3-րդ կետով (ատելություն, անհանդուրժողականություն կամ թշնամանք հրահրելուն կամ քարոզելուն ուղղված հրապարակային խոսքը, ինչպես նաև այդ նպատակով նյութեր կամ առարկաներ տարածելը՝ հրապարակայնորեն ցուցադրվող ստեղծագործությունների, զանգվածային լրատվության միջոցների կամ տեղեկատվական կամ հաղորդակցական տեխնոլոգիաների օգտագործմամբ)»,-նշվում է ՔԿ հաղորդագրության մեջ:

Հոկտեմբերի 1-ին՝ ժամը 20։30-ին, ՀՖՖ Տեխնիկական կենտրոն/Ֆուտբոլի ակադեմիայում կկայանա ՈՒԵՖԱ Եվրոպայի 2025/2027 Մ-21 առաջնության որակավորման խմբային փուլի Հայաստան Մ-21 – Իտալիա Մ-21 հանդիպումը։ Այս մասին հայտնում է ՀՖՖ-ն։

Ֆեդերացիան տեղեկացնում է, որ տոմսերը կարելի է ձեռք բերել հոկտեմբեր 1-ից` ժամը 12։00-ից, Ավան ակադեմիայի մարզադաշտի մուտքի մոտ գտնվող տոմսարկղից։ Տոմսերի արժեքը 1000 դրամ է։ 

Էյֆելյան աշտարակը շահագործող ընկերության՝ SETE-ի գլխավոր տնօրեն Պատրիկ Բրանկո Ռուվիոն հայտարարել է պաշտոնից հեռանալու մասին՝ այս տարվա վերջին։ Նրա հրաժարականը հաջորդում է ընկերության շուրջ առաջացած աղմուկին, երբ հինդուիստական կրոնական խմբի պատվիրակության այցի ընթացքում կին աշխատակիցներին հրահանգվել էր չսպասարկել այցելուներին։

Ընկերության ներքին հետաքննության արդյունքում պարզվել է, որ այցի կազմակերպման ընթացքում տեղի են ունեցել «գործառնական բացթողումներ», որոնց հետևանքով կին աշխատակիցները զրկվել են այցելուներին սպասարկելու հնարավորությունից։ SETE-ն այդ իրավիճակը որակել է որպես անընդունելի։

Դեպքը տեղի է ունեցել սեպտեմբերի սկզբին, երբ «Բոչասանվասի Ակշար Պուրուշոտտամ Սվամինարայան Սանստհա» (BAPS) հինդուիստական կրոնական խմբի շուրջ 100 անդամ այցելել է Էյֆելյան աշտարակ։

BAPS-ը կրոնական շարժում է, որը հիմնադրվել է 20-րդ դարի սկզբին։ Կազմակերպության միջոցառումների ժամանակ կանայք և տղամարդիկ սովորաբար առանձնացված են, այդ թվում՝ որոշ տաճարներում նախատեսված են առանձին մուտքեր։

SETE-ի փոխանցմամբ՝ BAPS-ի պատվիրակությունը խնդրել էր այցը կազմակերպել այնպես, որ հնարավորինս նվազագույնի հասցվի կանանց հետ շփումը։ Ընկերությունը, սակայն, նշել է, որ նման պայմաններին համաձայնելն անհնար է։

Չնայած դրան՝ այցի կազմակերպման ընթացքում կանանց աշխատանքը սահմանափակվել է, ինչն էլ հետագայում դարձել է ներքին հետաքննության և քննադատության պատճառ։

SETE-ն հայտարարել է, որ նման իրավիճակը հակասում է ընկերության սկզբունքներին։

ԱՄՆ-ում ՀՀ դեսպան Նարեկ Մկրտչյանը ֆեյսբուքյան իր էջում հայտնել է, որ հանդիպել է աշխարհահռչակ հոգևոր առաջնորդ, հումանիստ և խաղաղության ջատագով, «Ապրելու արվեստ» (Art of Living) միջազգային շարժման հիմնադիր Գուրուդև Շրի Շրի Ռավի Շանկարի հետ:

Դեսպանը նշել է, որ զրույցի ընթացքում քննարկել են խաղաղության վերաբերյալ նրա ուսմունքը, ինչպես նաև ներքին խաղաղության և երկխոսության կարևորությունը՝ տարաձայնությունները հաղթահարելու և խաղաղություն կառուցելու ճանապարհին։

«Շնորհակալ եմ իմաստուն և ոգեշնչող զրույցի համար»,– գրել է Նարեկ Մկրտչյանը։

Հայաստանի շախմատի ակադեմիան հյուրընկալել է ՖԻԴԵ-ի նորընտիր նախագահ Տիմուր Տուրլովին։ Այս մասին հայտնում է Հայաստանի շախմատի ֆեդերացիան։

Այցի ընթացքում Տիմուր Տուրլովը ծանոթացել է Ակադեմիայի գործունեությանը, կրթական ծրագրերին և շախմատի զարգացման ուղղությամբ իրականացվող աշխատանքներին։

Հանդիպման հիմնական թեման է եղել շախմատի դերը կրթության մեջ։ Խոսվել է Հայաստանում ձևավորված փորձի, դպրոցական կրթության մեջ շախմատի դերի, ուսուցիչների և մարզիչների վերապատրաստման մասին։

Իրանում ՀՀ դեսպան Գրիգոր Հակոբյանը հանդիպել է Իրանի արդյունաբերության, հանքերի և առևտրի նախարարի՝ փոքր արդյունաբերության և արդյունաբերական ավանների հարցերով տեղակալ Թահմորս Լահութիի հետ։

Ինչպես հայտնում են Իրանում ՀՀ դեսպանությունից, քննարկվել են երկու երկրների միջև արդյունաբերական ավանների բնագավառում համագործակցության զարգացման հեռանկարները:

Հանդիպմանը նախորդել է ՀՀ դեսպանի այցելությունը «Շամսաբադ» արդյունաբերական ավան, որտեղ Գ. Հակոբյանը ծանոթացել է արդյունաբերական ավանի հնարավորություններին, շրջայց կատարել ավանին պատկանող ապակու և ատամների իմպլանտների արտադրամասերում: