ՀՀ ՊՆ-ից հայտնում են, որ սեպտեմբերի 24-ին դեռևս չպարզված հանգամանքներում պայթյունի հետևանքով մահացել է պայմանագրային զինծառայող Դ. Կ.-ն (զինծառայողի ընտանիքը սահմանված կարգով տեղեկացված է):
Դեպքի հանգամանքներն ամբողջովին պարզելու նպատակով ընթանում է քննություն:
Պաշտպանության նախարարությունը վշտակցում և զորակցություն է հայտնում զինծառայողի ընտանիքի անդամներին, հարազատներին ու ծառայակիցներին։
Երևանի քաղաքապետարանը ներկայացնում է բացառիկ հանդիպում կինոյի լեգենդ Ջեյմս Քամերոնի հետ։ Համաշխարհային կինոյի պատմությունը փոխած ռեժիսոր, սցենարիստ և պրոդյուսեր Ջեյմս Քամերոնը՝ Երևանում։
«Տերմինատոր», «Այլմոլորակայիններ», «Տիտանիկ», «Ավատար» և այլ լեգենդար կինոնկարների հեղինակը կհանդիպի երևանյան հանդիսատեսի հետ՝ խոսելու կինոյի, ստեղծագործական ճանապարհի, մեծ գաղափարների և նորարարությունների մասին։
Սա բացառիկ հնարավորություն է հանդիպելու մեր ժամանակների ամենաազդեցիկ կինոգործիչներից մեկին, լսելու նրա պատմությունները կինոյի աշխարհից և բացահայտելու այն ստեղծագործական մտածողությունը, որի շնորհիվ ծնվել են համաշխարհային կինոյի ամենանշանավոր նախագծերից մի քանիսը։
Ջեյմս Քամերոն. հանդիպում, որը միավորում է կինոն, երևակայությունն ու ապագան։
Եվրահանձնաժողովի ղեկավար Ուրսուլա ֆոն դեր Լայենն անդրադարձել է ՀՀ վարչապետ Նիկոլ Փաշինյանի հետ հանդիպմանը:
«Հարգելի՛ պարոն Փաշինյան, ուրախ եմ Ձեզ տեսնել, ինչպես միշտ: Մենք Հայաստանը մոտեցնում ենք ԵՄ-ին՝ միաժամանակ աշխատելով խաղաղ և բարգավաճ Հարավային Կովկասի ստեղծման ուղղությամբ։
Մենք կառուցում ենք ճանապարհներ և կամուրջներ մեր 200 միլիոն եվրո արժողությամբ կապակցվածության փաթեթով, ինչպես նաև կամուրջներ մարդկանց միջև՝ խաղաղության ամրապնդմանն ուղղված մեր ներդրումներով:
Մեր Ինքնավար առևտրային միջոցները նոր հնարավորություններ կբացեն. այժմ Հայաստանի արտահանման 80%-ը դեպի ԵՄ շուկա չի հարկվում։ Մենք ակնկալում ենք, որ վաղը ԵՄ օրենսդիրների կողմից այս միջոցները վերջնական կընդունվեն՝ ռեկորդային ժամանակում:
Եվ, վերջապես, մենք ուժեղացնում ենք էներգետիկ անվտանգությունը:
Այսպիսով, Հայաստան-Եվրամիություն գործընկերությունը զարգանում է արագ, դեպի առաջ և ավելի ամուր է, քան երբևէ»,- X-ի իր էջում գրել է ֆոն դեր Լայենը:
Հայաստանը ցանկանում է խորացնել հարաբերությունները Ռուսաստանի հետ, սակայն Հայաստանի և Ռուսաստանի միջև հարաբերություններում օբյեկտիվ փոփոխություններ են տեղի ունենում։ Այս մասին Նյու Յորքում ռուս լրագրողի հետ զրույցում հայտարարել է ՀՀ վարչապետ Նիկոլ Փաշինյանը։
Նրա խոսքով՝ մինչ Հայաստանի և Ադրբեջանի միջև խաղաղության հաստատումը հայ-ռուսական հարաբերությունների շուրջ 90 տոկոսը կենտրոնացած էր անվտանգության խնդիրների վրա։
Փաշինյանի խոսքով՝ այժմ, երբ տարածաշրջանում խաղաղություն է հաստատվում, Հայաստանի և Ռուսաստանի հարաբերությունները կփոխակերպվեն։
«Այժմ՝ խաղաղության պայմաններում, ՌԴ-ի հետ մեր հարաբերությունները կփոխակերպվեն։ Մենք կառուցողական ենք տրամադրված»,– նշել է վարչապետը։
Սեպտեմբերի 16-ին՝ ժամը 12։10-ին, Կոտայքի մարզային օպերատիվ կառավարման կենտրոն ահազանգ է ստացվել, որ Ակունք բնակավայրում այրվում է խոտի դեզ։ Այս մասին տեղեկացնում են Փրկարար ծառայությունից:
Դեպքի վայր է մեկնել ՆԳՆ ՓԾ մարզային փրկարարական վարչության և Երևան քաղաքի հրշեջ-փրկարարական ջոկատներից երկու մարտական հաշվարկ։
Հրդեհը մեկուսացվել է ժամը 18։15-ին, մարվել՝ 21։45-ին։
Հրդեհաշիջման աշխատանքներին ներգրավվել են համայնքի 2 ջրատար, գյուղի մոտ 20 բնակիչ, 5 բեռնատար և 2 հատուկ տրակտոր։ Այրվել են մոտ 7000 հակ անասնակեր և հնամաշ անվադողեր։
Հրշեջ-փրկարարները կանխել են հրդեհի տարածումը։
Սեպտեմբերի 23-ին ՄԱԿ ԳԱ 81-րդ նստաշրջանի շրջանակներում ՀՀ արտաքին գործերի և միջազգային առևտրի նախարար Արարատ Միրզոյանը և Բենինի արտաքին գործերի նախարար Կորին Ամորի Բրունեն ստորագրել են:
«Հայաստանի Հանրապետության և Բենինի Հանրապետության միջև դիվանագիտական և ծառայողական անձնագրեր ունեցող անձանց մուտքի արտոնագրի պահանջից ազատման մասին» համաձայնագիր,
«Հայաստանի Հանրապետության արտաքին գործերի և միջազգային առևտրի նախարարության և Բենինի Հանրապետության արտաքին գործերի նախարարության միջև դիվանագիտական դասընթացների բնագավառում համագործակցության վերաբերյալ» փոխըմբռնման հուշագիր:
ՀՀ կառավարությունը հաստատեց Հայաստանի Հանրապետության կառավարության 2025 թվականի դեկտեմբերի 30-ի N 1986-Ն որոշման մեջ փոփոխություն կատարելու մասին Կառավարության որոշման նախագիծը:
«Նախագծով առաջարկվում է որոշման մեջ և այդ հիմքով կարգավիճակի դադարեցման ձևակերպումը հանել վերնագրից և կից հավելվածից: Որոշումը վերաբերում է առողջության համընդհանուր ապահովագրության շրջանակներում ապահովագրված անձի կարգավիճակի ապահովագրավճար վճարողի, չվճարողի կարգավիճակների վերաբերյալ ծանուցումների ներկայացման կարգին: Քանի որ «Առողջության համընդհանուր ապահովագրության մասին» օրենքում անձի կարգավիճակի դադարեցման հիմքը, ապահովագրավճար վճարողի կարգավիճակով պայմանավորված, արդեն հանվել է, և օրենսդրական փոփոխությունն իրականացվել է սույն թվականի ապրիլի 7-ի օրենքով, հետևաբար Կառավարության որոշման մեջ դրա վերաբերյալ ծանուցման դրույթն էլ առաջարկում ենք հանել»,- ասաց առողջապահության նախարարի տեղակալ Սամվել Խարազյանը:
Աշնան գալուստին զուգահեռ փոխվում է նաև եղանակը․ ջերմաստիճանի տատանումներն ու մարդկանց՝ փակ տարածքներում ավելի շատ ժամանակ անցկացնելը կարող են նպաստել շնչառական վարակների տարածմանը։ Այս շրջանում հատկապես մեծանում է գրիպի սեզոնային ակտիվացման հավանականությունը, և մասնագետները հորդորում են կանխարգելիչ միջոցները չհետաձգել մինչև հիվանդացության աճը։
Այս պահին Հայաստանում գրիպի առումով համաճարակային իրավիճակը գնահատվում է հանգիստ։ Սակայն մասնագետների դիտարկմամբ, ակտիվության աճ կարող է արձանագրվել արդեն հոկտեմբերի սկզբից, իսկ գրիպի առավել ինտենսիվ շրջանառությունը՝ նոյեմբեր և դեկտեմբեր ամիսներին։ Այդ պատճառով առողջապահական համակարգը պատվաստումը կազմակերպում է դեռևս սեզոնի ակտիվացումից առաջ։
Գրիպի դեմ պատվաստանյութերն արդեն հասանելի են հանրապետության բոլոր պոլիկլինիկաներում։ Իմունականխարգելման ծրագրի շրջանակում պատվաստումն անվճար է, և քաղաքացիները կարող են դիմել իրենց նախընտրած պոլիկլինիկա՝ անկախ նրանից, թե որ բժշկական հաստատությունում են կցագրված։ Պատվաստվել կարող են նաև Հայաստանում գտնվող օտարերկրյա քաղաքացիները։ Պատվաստման հասանելիությունն ավելացնելու նպատակով Երևանում նախատեսվում է նաև շարժական կենտրոնների աշխատանք։ Դրանք կգործեն Վերնիսաժի հատվածում, Հանրապետության հրապարակում և Գայի արձանի հարակից տարածքում՝ ժամը 10։00-ից 16։00-ն։
Առողջապահության ոլորտի մասնագետների խոսքով՝ պատվաստման անհրաժեշտությունն առավել ընդգծված է այն խմբերի համար, որոնց մոտ գրիպը կարող է ավելի ծանր ընթացք ունենալ։ Դրանց թվում են 65 տարեկանից բարձր անձինք, հղիները, 6 ամսականից մինչև 5 տարեկան երեխաները, սոցիալական խնամքի կենտրոնների շահառուներն ու աշխատակիցները, բուժաշխատողները և զինծառայողները։ Պատվաստումը, մասնագետների գնահատմամբ, ոչ միայն նվազեցնում է վարակվելու հավանականությունը, այլև կարևոր դեր ունի հիվանդության ծանր ընթացքի և դրա հետևանքով առաջացող բարդությունների կանխարգելման գործում։
Պատվաստման հնարավորությունը նախատեսված է նաև հենաշարժողական խնդիրներ ունեցող անձանց համար։ Այս դեպքում քաղաքացին կարող է դիմել իր կցագրված բժշկական կենտրոն, որի միջոցով պատվաստումը կարող է կազմակերպվել նրա գտնվելու վայրում։
Մասնագետների խոսքով՝ պատվաստվելու համար սպասել մինչև գրիպի տարածման ակտիվ փուլը անհրաժեշտ չէ։ Հիվանդության սեզոնային շրջանառության աճից առաջ պատվաստվելը հնարավորություն է տալիս նախապես ձևավորել պաշտպանություն։ Միևնույն ժամանակ, գրիպի կանխարգելման համար կարևոր են նաև ձեռքերի կանոնավոր լվացումը, փակ և մարդաշատ տարածքներում վարակի տարածումը սահմանափակող վարքագիծը, հիվանդության ախտանշանների դեպքում շրջապատի հետ շփումները նվազեցնելն ու անհրաժեշտության դեպքում բժշկին դիմելը։
Այսպիսով, աշնանային սեզոնի մեկնարկին մասնագետների հիմնական խորհուրդը կանխարգելումը չհետաձգելն է։ Գրիպի ակտիվ շրջանառությունը դեռևս չի սկսվել, սակայն հենց այս փուլն է համարվում պատվաստման և պաշտպանվելու միջոցները նախապես կիրառելու ժամանակը։
Շողեր Ղլիջյան
ԱՄՆ-ի և Իրանի միջև դիվանագիտական շփումները շարունակվել են Նյու Յորքում՝ ՄԱԿ-ի Գլխավոր ասամբալեայի շրջանակում, սակայն կողմերի միջև հիմնական տարաձայնությունները դեռևս պահպանվում են։
Սեպտեմբերի 22-ին ԱՄՆ նախագահի հատուկ բանագնաց Սթիվ Ուիթքոֆը և Ջարեդ Քուշները Իրանի արտգործնախարար Աբաս Արաղչիի հետ բանակցություններ են անցկացրել միջնորդների մասնակցությամբ։ ԱՄՆ նախագահ Դոնալդ Թրամփը հանդիպումը «շատ լավ» և «արդյունավետ» է անվանել։
Իրանական կողմի փոխանցմամբ՝ բանակցությունների ընթացքում ներկայացվել են պատերազմի ավարտի և հետագա բանակցությունների պայմանները։ Դրանց թվում են ԱՄՆ-ի ռազմածովային շրջափակման վերացումը, Իրանի սառեցված ակտիվների ազատումը և Հորմուզի նեղուցի վերաբացումը։ Իրանը հայտարարել է, որ համապատասխան պայմանների կատարման դեպքում կարող է նեղուցը վերաբացել յոթ օրվա ընթացքում։
Հորմուզի նեղուցը շարունակում է մնալ բանակցությունների առանցքային հարցերից մեկը։ Այն կարևոր ծովային ուղի է նավթի և գազի միջազգային փոխադրումների համար։
Միաժամանակ կողմերի միջև պահպանվում են կոշտ հայտարարությունները։ ՄԱԿ-ի Գլխավոր ասամբլեայում ունեցած ելույթում Թրամփը հայտարարել է, որ Իրանը կանգնած է համաձայնության հասնելու կամ «Իսլամական Հանրապետությունը ոչնչացնելու» ընտրության առաջ։ Իրանի նախագահ Մասուդ Փեզեշքիանը հաջորդ օրը հայտարարել է, որ Թեհրանը պատրաստ է շարունակել դիվանագիտական գործընթացը։
Բանակցություններին զուգահեռ՝ դիվանագիտական գործընթացում ներգրավված են նաև տարածաշրջանի երկրները։ Կատարն ու Օմանը մասնակցում են ԱՄՆ-ի և Իրանի միջև միջնորդական ջանքերին, մասնավորապես՝ Հորմուզի նեղուցով նավարկության և լարվածության թուլացման հարցերում։
Պլանային աշխատանքներ իրականացնելու նպատակով սեպտեմբերի 24-ին՝ ժամը 10:00-ից մինչև ժամը 15:00-ն, կդադարեցվի՝
Շիրակի մարզի Ախուրյան բնակավայրի Ախուրյանի խճուղու 2-րդ փակուղու և Պ. Սևակի փողոցի գազասպառողների, հարակից տարբեր նշանակության հանրային կազմակերպությունների,
ժամը 09:00-ից մինչև ժամը 18:00-ն՝ Արթիկ քաղաքի Գր․Լուսավորչի, Հակոբյան, Բաբաջանյան փողոցների, Շահումյան և Ռաֆֆու փողոցների խաչմերուկի հարակից տարածքների, Թումանյան փողոցի, Լնբաթ թաղամասի գազասպառողների, հարակից տարբեր նշանակության հանրային կազմակերպությունների,
ժամը 09:00-ից մինչև ժամը 18:00-ն՝ Մասիս քաղաքի Կայարան թաղամասի գազասպառողների, հարակից տարբեր նշանակության հանրային օբյեկտների գազամատակարարումը։
«Գազպրոմ Արմենիա»-ն հայցում է գազասպառողների ներողամտությունը և խնդրում պահպանել անվտանգության պահանջները: