Հայաստանը մտադիր է 250 միլիոն եվրոյի նոր վարկային համաձայնագիր ստորագրել Ֆրանսիական զարգացման գործակալության հետ։ Համապատասխան որոշման նախագիծն ընդգրկված է Կառավարության վաղվա նիստի օրակարգում։
Վարկային ծրագրի ֆինանսավորմանը մասնակցելու է նաև Ասիական զարգացման բանկը (ԱԶԲ)։ Ներգրավված միջոցների հիմնական մասն ուղղվելու է 2026 թվականի պետական բյուջեի դեֆիցիտի (պակասուրդի) ֆինանսավորմանը։
Ֆինանսների նախարարության հիմնավորման համաձայն՝ վարկային միջոցների ժամանակին ստացումն առանցքային է բյուջեով նախատեսված ծախսերի անխափան իրականացման համար։ Ծրագրի նպատակներն են նաև պետական ծախսերի ու ներդրումների որակի բարձրացումը և աստիճանաբար արտաքին ֆինանսավորումից կախվածության նվազեցումը։
Վարկի պայմաններն են՝
2026 թվականի պետական բյուջեով Կառավարությունը նախատեսել էր դեֆիցիտը ծածկելու նպատակով ներգրավել ընդհանուր առմամբ 1.6 միլիարդ դոլարի վարկային միջոցներ։
ԱՄՆ Գերագույն դատարանը սեպտեմբերի 29-ին վերացրել է ներգաղթյալներին երրորդ երկրներ արտաքսելու սահմանափակումները՝ միաժամանակ համաձայնելով դեկտեմբերին քննել այդ հարցը։ «Արմենպրես»-ի փոխանցմամբ՝ այս մասին հաղորդում է France 24 պարբերականը։
Դատարանը բավարարել է ԱՄՆ նախագահ Դոնալդ Թրամփի վարչակազմի արտակարգ միջնորդությունը՝ կասեցնելով ավելի ցածր ատյանի դատարանի որոշումը, որը սահմանափակում էր, սակայն ամբողջությամբ չէր արգելում ներգաղթյալների արտաքսումները երրորդ՝ ոչ իրենց հայրենի երկրներ։
Ավելի ցածր ատյանի դատարանը հայտարարել էր, որ արտաքսման ենթակա անձինք նախապես պետք է պատշաճ և արդյունավետ կերպով տեղեկացվեն այն մասին, թե ուր են ուղարկվելու, որպեսզի հնարավորություն ունենան բարձրաձայնելու հնարավոր հետապնդման վերաբերյալ իրենց մտահոգությունները։
Դոնալդ Թրամփը նախընտրական արշավի ընթացքում խոստացել էր միլիոնավոր անօրինական ներգաղթյալների արտաքսել Միացյալ Նահանգներից և 2025 թվականին Սպիտակ տուն վերադառնալուց հետո մի շարք քայլեր է ձեռնարկել՝ արտաքսումներն արագացնելու նպատակով։
Թրամփի վարչակազմը երրորդ երկրներ արտաքսումները հիմնավորել է որպես անհրաժեշտ միջոց, քանի որ արտաքսման ենթակա որոշ անձանց հայրենի երկրները երբեմն հրաժարվում են ընդունել նրանց։
AFP-ի հետաքննությունը պարզել է, որ ԱՄՆ-ն, այսպես կոչված, «երրորդ երկրներին», հատկապես՝ Աֆրիկայում գտնվող երկրներին, միլիոնավոր դոլարի գործարքներ է առաջարկել և սպառնացել է սահմանափակել վիզաների տրամադրումը, որպեսզի դրդի նրանց ընդունել արտաքսված անձանց։
Ըստ գործակալության՝ այս երկրներ տեղափոխվելուց հետո արտաքսված անձինք ենթարկվել են տեղի պահակների կողմից բռնությունների, անորոշ ժամկետով կալանքի կամ արագ կրկին արտաքսվել են իրենց հայրենի երկրներ։
Կոնգրեսը որպես ԱՄՆ-ի քաղաքականություն է սահմանել այն, որ մարդիկ չարտաքսվեն այնպիսի երկրներ, որտեղ նրանց կյանքը կարող է վտանգի ենթարկվել կամ նրանք կարող են ենթարկվել խոշտանգումների։
Մարդու իրավունքների պաշտպան Անահիտ Մանասյանի հանձնարարությամբ ՄԻՊ ներկայացուցիչները չհայտարարված մշտադիտարկման այց են իրականացրել ՀՀ աշխատանքի և բարեկեցության նախարարության «Շիրակի երեխայի խնամքի կենտրոն» պետական ոչ առևտրային կազմակերպություն (այսուհետ՝ նաև Հաստատություն):
Այցի ընթացքում ուսումնասիրվել են Հաստատության շենքային, սանիտարահիգիենիկ պայմանները, խնամքի, բժշկական օգնության, սննդի տրամադրման հետ կապված հարցերը, Հաստատության աշխատակազմի և շահառուների միջև հարաբերությունները, նրանց իրավունքների և շահերի պաշտպանության վիճակը, փաստաթղթերը, դրանց համապատասխանությունը սահմանված պահանջներին ու կիրառելի չափորոշիչներին:
Հաստատությունում արձանագրված խնդիրները, հիմնականում, համակարգային են։
Մասնավորապես՝
• հաստատությանը հատկացված ոչ բավարար տարածքի պատճառով պահպանված չէին բնակելի մակերեսի համար նախատեսված պահանջները, ինչով պայմանավորված` ննջասենյակներում առկա էին իրար միացված կամ շատ մոտ տեղադրված մահճակալներ, ապահովված չէր շահառուների համար անհրաժեշտ անձնական տարածքը։ Միաժամանակ, սանհանգույցների և լոգարանների կառուցվածքային առանձնահատկություններով պայմանավորված՝ ապահովված չէին շահառուների անձնական հիգիենայի պահանջներն առանձնացված պայմաններում բավարարելու համար անհրաժեշտ պայմանները։
• հաստատության ֆիզիկական միջավայրը չէր համապատասխանում համընդհանուր դիզայնի սկզբունքներին, առկա էր խելամիտ հարմարեցումների ապահովման անհրաժեշտություն։
Վերոնշյալ և արձանագրված այլ խնդիրները Պաշտպանի աշխատակազմի ներկայացուցիչները քննարկել են հաստատության տնօրինության հետ:
Խնդիրներն արտացոլող փաստաթուղթը` դրանց լուծմանն ուղղված առաջարկների հետ մեկտեղ, կներկայացվի ոլորտի իրավասու մարմիններին:
Այցի ընթացքում Հաստատության տնօրինությունը և անձնակազմն արդյունավետ համագործակցել են Պաշտպանի աշխատակազմի ներկայացուցիչների հետ: Միաժամանակ, այցի ընթացքում քննարկումների և արձանագրված հարցերի շրջանակում կարևորվել է դրանց լուծման ուղղությամբ հետագա աշխատանքների շարունակականությունը։
Մարդու իրավունքների պաշտպանը, որպես «Հաշմանդամություն ունեցող անձանց իրավունքների մասին» ՄԱԿ-ի կոնվենցիայի դրույթների կիրառության մշտադիտարկում իրականացնող պաշտոնատար անձ, հատուկ ընդգծում է պետության կողմից հաշմանդամություն ունեցող անձանց շուրջօրյա խնամքի հաստատությունների ապաինստիտուցիոնալացման ուղղությամբ գործուն քայլեր ձեռնարկելու, կառուցվածքային բարեփոխումներ իրականացնելու և համակարգված մոտեցում որդեգրելու անհրաժեշտությունը:
Reuters-ը հաղորդում է, որ ԱՄՆ-ն պատժամիջոցներ է կիրառել 13 անձի և ընկերության նկատմամբ, այդ թվում՝ ռուսական, չինական, հոնկոնգյան և պակիստանյան, որոնք, Վաշինգտոնի տվյալներով, օգնել են Իրանին զենք և զենքի բաղադրիչներ ձեռք բերել։ Սահմանափակումների տակ հայտնված ռուսական ընկերություններն են MG-Flot LLC-ն, որը գործում է Կասպից ծովում, և A.S. Yakovlev Design Bureau-ն, որը մշակում է ինքնաթիռներ, ուղղաթիռներ և անօդաչու թռչող սարքեր։
ԱՄՆ ֆինանսների նախարարության և պետքարտուղարության հայտարարած պատժամիջոցներն ուղղված են տնտեսապես մեկուսացնելու Իսլամական Հանրապետությանը և ստիպելու նրան բանակցություններ վարել ԱՄՆ-ի և Իսրայելի միջև պատերազմի ավարտի վերաբերյալ։
Իր հերթին, ԱՄՆ ֆինանսների նախարարությունը շեշտում է, որ պատժամիջոցները նպատակ ունեն թուլացնել զենքի ստեղծման ծրագրերը վերականգնելու Թեհրանի հնարավորությունները և մեծացնել Իրանի գնումների ջանքերին աջակցողների ծախսերը։
Օգոստոսին NBC News-ը, հղում անելով «Եվրոպայից ստացված կառավարության փաստաթղթին», իր կայքում հաղորդել էր, որ Ռուսաստանը Կասպից ծովի միջոցով Իրանին մատակարարում է անօդաչու թռչող սարքերի բաղադրիչներ, զինամթերք և պայթուցիկ նյութեր, որոնք կօգնեն Թեհրանին համալրել ԱՄՆ-Իսրայելական պատերազմի ընթացքում վնասված զենքի պաշարները։
ՀՀ քննչական կոմիտեի Գեղարքունիքի մարզային քննչական վարչությունում նախաձեռնված քրեական վարույթի նախաքննության ընթացքում առերևույթ փաստական տվյալներ են ձեռք բերվել այն մասին, որ Ա.Շ.-ն հանդիսանալով Մ.Ք.-ի մերձավոր ազգականը՝ ամուսնու մայրը, համատեղ բնակության ընթացքում պարբերաբար նվաստացրել է Մ.Ք.-ին, ինչի հետևանքով վերջինս գտնվելով լարված և խիստ ընկճված հոգեվիճակում, 2024 թվականի նոյեմբերի 27-ին տանը կից անասնագոմում պարանով առաստաղից կախվելու միջոցով կատարել է ինքնասպանություն:
Ա.Շ.-ի նկատմամբ հարուցվել է հանրային քրեական հետապնդում՝ Քրեական օրենսգրքի 162-րդ հոդվածի 2-րդ մասի 3-րդ կետով (ինքնասպանության հասցնելը):
Քրեական վարույթը մեղադրական եզրակացությամբ ուղարկվել է հսկող դատախազին:
«Պարտադի՞ր է արդյոք փոխել հին նմուշի անձնագիրը կամ նույնականացման քարտը, եթե դրանք ժամկետի մեջ են։
Հարգելի’ քաղաքացիներ, հին փաստաթղթերը շարունակելու են մնալ վավեր մինչև նոր օրենքի ուժի մեջ մտնելը տրամադրված անձնագրերը և նույնականացման քարտերը պահպանելու են իրենց իրավական ուժը մինչև դրանցում նշված վավերականության ժամկետի ավարտը։ Հետևաբար, փաստաթղթերը անհապաղ փոխարինելու պարտադրանք չկա։
Այդուհանդերձ, անհրաժեշտ է նկատի ունենալ, որ նոյեմբերի 1-ից հետո, եթե որոշեք փոխարինել Ձեր հին նմուշի փաստաթուղթը կորցնելու կամ վնասելու պատճառով, անկախ անձնագրի վավերականության ժամկետից, դուք արդեն պետք է դիմեք նոր նմուշի կենսաչափական փաստաթուղթ ստանալու համար։
Իսկ ե՞րբ է հին փաստաթուղթը կորցնելու իրավական ուժը։ Եթե դիմեք և ստանաք նոր կենսաչափական փաստաթուղթ, հին փաստաթուղթն ավտոմատ կերպով կճանաչվի անվավեր, իսկ գործող վիզաների համար անհանգստանալու կարիք չկա։
Անձնագիրը կդակվի աշխատակցի կողմից և նոր փաստաթղթի հետ միասին կվերադարձվի Ձեզ»։
Միասնական սոցիալական ծառայությունից հայտնում են, որ աշխատանքային կենսաթոշակի նշանակման նպատակով Ձեր կողմից ներկայացված դիմումների հիման վրա կայացված որոշումները այսուհետ կուղարկվեն ինքնաշխատ եղանակով՝ դիմումում նշված հեռախոսահամարին SMS հաղորդագրության միջոցով։
Որոշմանը ծանոթանալու համար անհրաժեշտ է անցնել SMS հաղորդագրության մեջ նշված հղումով և բացել ծանուցագիրը։
Ծանուցագիրը պարունակում է տեղեկատվություն՝
• կենսաթոշակի նշանակման ժամկետի և չափի,
• հաշվարկված աշխատանքային ստաժի,
• կամ կենսաթոշակ նշանակելը մերժելու պատճառների վերաբերյալ։
Լրացուցիչ հարցերի դեպքում կարող եք զանգահարել 114 հեռախոսահամարով, գրավոր դիմել [email protected] էլեկտրոնային փոստի հասցեին կամ այցելել Միասնական սոցիալական ծառայության ցանկացած տարածքային կենտրոն։
Իրանը միջուկային ծրագրի շուրջ ԱՄՆ-ի հետ բանակցությունների վերսկսման համար ներկայացրել է յոթօրյա ծրագիր։ Այս մասին հաղորդում է Իրանի պետական լրատվական գործակալությունը՝ IRNA-ն։
Թեհրանի առաջարկով՝ նախ պետք է վերականգնվի նավարկությունը Հորմուզի նեղուցով և դադարեցվի ռազմական ու տնտեսական ճնշումը, որից հետո հնարավոր կլինի անցնել միջուկային հարցի շուրջ բանակցություններին։
Իրանական կողմի մոտեցմամբ՝ այս պայմանների կատարումից հետո հնարավոր կլինի յոթ օրվա ընթացքում վերականգնել նավարկությունը և սկսել բանակցությունները։
Վաշինգտոնը, սակայն, պնդում է, որ նախ Իրանը պետք է միջուկային ոլորտում կոնկրետ զիջումների գնա, որից հետո հնարավոր կլինի քննարկել պատժամիջոցների մեղմացումը։
Այսպիսով, կողմերի հիմնական տարաձայնությունն այժմ վերաբերում է ոչ այնքան զիջումների ծավալին, որքան այն հարցին, թե ով պետք է կատարի առաջին քայլը։
Դոնալդ Թրամփի մոտեցմամբ՝ Իրանի առաջարկի ընդունումը կարող է այնպիսի տպավորություն ստեղծել, թե ԱՄՆ-ը, ռազմական ծախսերից և պատժամիջոցների կիրառումից հետո, ստիպված է եղել տնտեսական զիջումների գնալ՝ Հորմուզի նեղուցով նավարկությունը վերականգնելու համար։
Վաշինգտոնը ցանկանում է համաձայնություն, որը կներկայացվի ոչ թե Իրանի միջուկային ծրագրի վերաբերյալ նախկին համաձայնագրի՝ Գործողությունների համատեղ համապարփակ ծրագրի (JCPOA) նոր տարբերակ, այլ ավելի խիստ պայմաններով փաստաթուղթ, որի շրջանակում Իրանը նախ կընդունի միջուկային ոլորտում չափելի սահմանափակումներ, իսկ դրանից հետո կստանա պատժամիջոցների մեղմացում։