Ամերիկյան ընկերությունների ծախսերը սրընթաց աճում են Իրանի դեմ ԱՄՆ-ի և Իսրայելի պատերազմի ֆոնին: Բազմաթիվ տնտեսագետներ մռայլ կանխատեսումներ են անում՝ ակնկալելով առաջիկա ամիսներին աշխատուժի հավաքագրման և ներդրումների տեմպերի կրճատում, գրում է Associated Press գործակալությունը:
Ըստ Բիզնես տնտեսագիտության ազգային ասոցիացիայի (NABE) երկուշաբթի հրապարակած զեկույցի՝ հարցված մասնագետների գրեթե կեսը հաստատել է հակամարտության բացասական ազդեցությունն իրենց ընկերությունների գործունեության վրա.
54%-ը զգացել է էներգակիրների գների աճի հետևանքները:
Ավելի քան 66%-ը հայտնել է վերջին երեք ամսում նյութերի ծախսերի կտրուկ աճի մասին. դա 2022 թվականի հուլիսից ի վեր ամենաբարձր ցուցանիշն է:
Ընկերությունների 48%-ն արդեն իսկ աճող ծախսերի մի մասը փոխանցում է վերջնական սպառողներին:
Պատերազմը, որը սկսվել է փետրվարի 28-ին ԱՄՆ-ի և Իսրայելի հարձակումներով, հանգեցրել է համաշխարհային էներգետիկ ճգնաժամի: Հում նավթի արժեքը շարունակում է աճել Հորմուզի նեղուցում Վաշինգտոնի և Թեհրանի շարունակվող դիմակայության պատճառով, ինչը հարվածում է ամբողջ աշխարհի ընկերությունների և տնային տնտեսությունների գրպանին:
Բացի վառելիքի գներից, բիզնեսը բախվում է տրանսպորտային ծախսերի աճի և առաջին անհրաժեշտության ապրանքների, դրանց թվում՝ պարարտանյութերի մատակարարման խափանումների հետ:
Չնայած ընթացիկ վաճառքները մնում են կայուն, իսկ Ուոլ սթրիթը բարձր շահույթներ է արձանագրում տեխնոլոգիական և նավթային ոլորտներում, բիզնեսի վստահությունը ապագայի նկատմամբ անկում է ապրում.
Շահութաբերության նվազում. հարցվածների միայն 13%-ն է ակնկալում շահույթի աճ մոտ ապագայում. դա 2023 թվականից ի վեր ամենացածր ցուցանիշն է:
Գնային ճնշում. հարցվածների 16%-ը ծրագրում է առաջիկա կես տարում բարձրացնել գները, և ոչ մի ընկերություն մտադիր չէ նվազեցնել դրանք:
Հաստիքների կրճատում. հարցվածների գրեթե քառորդը ծրագրում է առաջիկա վեց ամսում կրճատել ներդրումների ծավալները և աշխատակիցների հավաքագրումը:
«Վերջին երեք ամսվա վաճառքները կայուն էին, բայց նյութերի արժեքն աճել է, իսկ շահույթի մարժան՝ կրճատվել»,- նշել է NABE-ի հարցումների կոմիտեի նախագահ Մարթա Մուրը: Ըստ նրա՝ բիզնեսի սպասումները «մեղմացել են» բոլոր առանցքային ցուցանիշներով:
Ըստ NABE-ի տվյալների՝ ռեցեսիայի վերաբերյալ մտավախություններն ուժեղանում են. հարցված տնտեսագետների 50%-ը հաջորդ տարվա ընթացքում ԱՄՆ տնտեսության անկման հավանականությունը գնահատում է «25%-ից բարձր» (հունվարի 44%-ի համեմատ):