Իսրայելի պաշտպանության նախարար Իսրայել Կացը գնահատել է Իսրայելի և Լիբանանի միջև երեկ ստորագրված «պատմական» համաձայնագիրը՝ հայտարարելով, որ այն «տասնամյակների ընթացքում առաջին անգամ կարող է ձևավորել նոր և ավելի անվտանգ իրականություն հյուսիսային սահմանի երկայնքով և Լիբանանում», հաղորդել է The Times of Israel-ը։
Նրա խոսքով՝ Իսրայելի պաշտպանության բանակը (ՑԱԽԱԼ) ամբողջությամբ չի դուրս բերվի Լիբանանից, ինչպես ավելի վաղ խոստացել էր նա, և զինվորականները կպահպանեն իրենց անվտանգության գոտին, այդ թվում՝ Բոֆորի ամրոցի լեռնաշղթայի շրջանը։
«Փորձությունը լինելու է համաձայնագրի կատարումը, դեռ բազմաթիվ մարտահրավերներ են սպասվում», — ասել է Կացը՝ հավելելով, որ հանձնարարել է զինվորականներին «պատրաստվել անվտանգության գոտում երկարատև ներկայության և ձեռնարկել անհրաժեշտ միջոցներ ՑԱԽԱԼ-ի զինվորներին պաշտպանելու և հյուսիսում գտնվող բնակավայրերի համար սպառնալիքները վերացնելու համար»։
Նա նշել է, որ «համաձայնագրում ամրագրված կարևոր սկզբունքն այն է, որ որևէ դուրսբերում չի լինի, քանի դեռ «Հեզբոլլահ» ահաբեկչական կազմակերպությունն ամբողջությամբ չի զինաթափվել Լիբանանի ամբողջ տարածքում»։
Կացի խոսքով՝ համաձայնագիրը «նաև ռազմավարական հարված է իրանական առանցքին»։
«Իրանը փորձել է ստիպել Իսրայելին դուրս բերել զորքերը Լիբանանից սպառնալիքների և ԱՄՆ-ի վրա ճնշման միջոցով, սակայն ձախողվել է», — ասել է Իսրայելի պաշտպանության նախարարը։
Նա նաև զգուշացրել է Թեհրանին՝ հայտարարելով, որ «եթե Իրանը փորձի հարձակվել Իսրայելի վրա՝ համաձայնագրի կատարմանը խոչընդոտելու համար, մենք մեծ ուժով կգործենք նրա դեմ»։